દિલ્હીની સાકેત કોર્ટે ફરિયાદી વિકાસ પાંડેની અરજી પર યુટ્યુબર ધ્રુવ રાઠી સામે નવું સમન્સ જાહેર કર્યું છે. આ કેસ ફોજદારી માનહાનિ સાથે જોડાયેલો છે. કોર્ટે સમન્સની સીધી બજવણી કરવાની પણ મંજૂરી આપી છે.

ન્યાયિક મેજિસ્ટ્રેટ રાહુલ જૈનની અદાલતે ફરિયાદી વિકાસ સાંકૃત્યાયન ઉર્ફે વિકાસ પાંડેની અરજી પર આ આદેશ આપ્યો હતો. ધ્રુવ રાઠી સામેનો આ કેસ 2018થી પેન્ડિંગ છે.

આ કેસ ધ્રુવ રાઠીના ‘BJP IT Cell Part 2’ નામના વીડિયો સાથે જોડાયેલો છે. ફરિયાદીનો આરોપ છે કે આ વીડિયોમાં તેમના વિશે ભાજપના IT સેલ સાથે જોડાયેલા હોવાનો અને 50 લાખ રૂપિયા આપવાની ઓફર કરવાનો આરોપ મૂકવામાં આવ્યો હતો.

ફરિયાદીના વકીલે કોર્ટમાં શું કહ્યું?

ફરિયાદીના વકીલે કોર્ટને જણાવ્યું કે ધ્રુવ રાઠી ઑસ્ટ્રિયામાં રહે છે અને છેલ્લાં કેટલાંક વર્ષોથી તેમને સમન્સ પહોંચાડવાની પ્રક્રિયામાં વિલંબ થઈ રહ્યો છે. આ પછી કોર્ટે ગુરુગ્રામના સેક્ટર-56માં આવેલા સરનામે નવું સમન્સ જાહેર કરવાનો આદેશ આપ્યો હતો. સાથે જ સમન્સની પ્રક્રિયા ઝડપી બનાવવા પણ જણાવ્યું હતું.

ફરિયાદીના વકીલની માગ પર સીધું સમન્સ પહોંચાડવાની મંજૂરી

ફરિયાદીના વકીલની માગને ધ્યાનમાં રાખીને કોર્ટે સમન્સની સીધી બજવણી કરવાની મંજૂરી આપી હતી. આ હેઠળ ફરિયાદીને સમન્સ પહોંચાડવાની પ્રક્રિયામાં સહયોગ કરવાની છૂટ આપવામાં આવી છે.

10 ઓક્ટોબરે ધ્રુવ રાઠીને કસ્ટડીમાં લેવાયા હતા

યુટ્યુબર ધ્રુવ રાઠીને શનિવારે, 10 ઓક્ટોબરે, જંતર-મંતર પર કોકરોચ જનતા પાર્ટી (CJP)ના પ્રસ્તાવિત વિરોધ પ્રદર્શન પહેલાં ગુરુગ્રામમાં આવેલા તેમના નિવાસસ્થાનેથી કસ્ટડીમાં લેવામાં આવ્યા હતા.

જોકે, 11 ઓક્ટોબરે રાઠીએ દાવો કર્યો હતો કે દિલ્હીમાં મુખ્ય ચૂંટણી કમિશનર જ્ઞાનેશ કુમાર સામે યોજાનારા પ્રસ્તાવિત વિરોધ પ્રદર્શન પહેલાં સાદાં કપડાંમાં આવેલા લોકો તેમને તેમના ઘરેથી લઈ ગયા હતા. તેમણે એવો પણ દાવો કર્યો હતો કે તેમને અલગ-અલગ પોલીસ સ્ટેશનોમાં લઈ જવામાં આવ્યા હતા.

રાઠીએ પોતાની નાગરિકતાને લઈને ઊભા થયેલા સવાલો અંગે પણ સ્પષ્ટતા કરી હતી. તેમણે કહ્યું હતું કે, “હું ભારતીય નાગરિક છું. મારી પાસે ભારતીય પાસપોર્ટ છે અને હું અહીં વિરોધ પ્રદર્શનમાં ભાગ લેવા આવ્યો છું, કારણ કે મારું માનવું છે કે મતચોરી અને ચૂંટણી પંચમાં ગેરરીતિ એક મોટો મુદ્દો છે.”