રોજબરોજ હાઇવે પર મુસાફરી કરતા વાહનચાલકો માટે એક ખૂબ જ મોટા અને રાહતના સમાચાર સામે આવી રહ્યા છે. આગામી 1 નવેમ્બર 2026 થી નેશનલ હાઇવે ઓથોરિટી દ્વારા લોકલ ટોલ પાસ માટેના નવા નિયમો લાગુ કરવામાં આવી રહ્યા છે. જો તમે પણ નેશનલ હાઇવેના કોઈ ટોલ પ્લાઝાની આસપાસ રહો છો, તો હવે તમારે દરરોજ પ્રાઇવેટ વાહન માટે મોટો ટોલ ટેક્સ ભરવાની જરૂર નહીં પડે. સરકારના આ નવા નિયમથી સ્થાનિક રહેવાસીઓનો હાઇવે પર આવન-જાવન કરવાનો ખર્ચ ઘણો ઘટી જશે.

કોણ હશે આ પાસ માટે પાત્ર?

આ સુવિધાનો લાભ ફક્ત તે જ વાહનચાલકો લઈ શકશે જેઓ નેશનલ હાઇવેના ફી પ્લાઝાથી 20 કિલોમીટરના ઘેરાવાની અંદર રહેતા હોય. આ પાસ માત્ર નોન-કમર્શિયલ પ્રાઇવેટ વાહનો માટે જ ઉપલબ્ધ હશે, એટલે કે કોમર્શિયલ વાહનોને આનો લાભ મળશે નહીં. આ ઉપરાંત, વાહનચાલક પાસે યોગ્ય અને એક્ટિવ FASTag હોવું અનિવાર્ય છે, જે બિન-વ્યાવસાયિક ઉપયોગ માટે રજીસ્ટર્ડ થયેલું હોવું જોઈએ.

જાણો વાર્ષિક પાસનો કેટલો ખર્ચ થશે?

લોકલ કન્સેશનલ પાસનો વાર્ષિક ચાર્જ ટોલ પ્લાઝાના લોકેશનના આધારે નક્કી કરવામાં આવ્યો છે:

• ₹1,500 પ્રતિ વર્ષ: જો ટોલ પ્લાઝા મ્યુનિસિપલ કે સ્થાનિક ટાઉન લિમિટની બહાર આવેલો હોય.

• ₹3,000 પ્રતિ વર્ષ: જો ટોલ પ્લાઝા મ્યુનિસિપલ કે સ્થાનિક ટાઉન લિમિટની અંદર આવેલો હોય. 

આ પાસ માત્ર તે જ ચોક્કસ ટોલ પ્લાઝા માટે લાગુ થશે જેના માટે તેને ઇશ્યુ કરવામાં આવ્યો હોય. તેમજ કેન્દ્ર સરકાર દર વર્ષે 1 એપ્રિલના રોજ આ પાસની ફીમાં વાર્ષિક સુધારો કરી શકે છે.

કયા વિસ્તારોમાં નહીં મળે આ પાસની સુવિધા?

સરકારના નિયમો મુજબ આ સુવિધા તમામ ટોલ પ્લાઝા પર ઉપલબ્ધ નહીં થાય. જે નેશનલ હાઇવે અથવા એક્સપ્રેસવે પર ક્લોઝ્ડ યુઝર ફી કલેક્શન સિસ્ટમ કામ કરતી હોય ત્યાં આ પાસ લાગુ પડશે નહીં. આ ઉપરાંત, જ્યાં મુસાફરો માટે સર્વિસ રોડ કે વૈકલ્પિક રસ્તો ઉપલબ્ધ હોય ત્યાં પણ આ સુવિધાનો લાભ નહીં મળે. તેથી વાહનચાલકોએ અરજી કરતા પહેલા પોતાના વિસ્તારના નિયમો અવશ્ય ચકાસી લેવા જોઈએ.

આ પણ વાંચો: