ગણેશ ચતુર્થી પહેલાં ગૂગલના બેંગલુરુ સ્થિત ઓફિસનો એક રસપ્રદ વીડિયો સોશિયલ મીડિયા પર ચર્ચામાં છે. ગૂગલના અનંતા ઓફિસમાં કર્મચારીઓ માટે ખાસ મોદક બનાવવાની પ્રવૃત્તિનું આયોજન કરવામાં આવ્યું હતું. આ પ્રવૃત્તિમાં કર્મચારીઓએ ઉત્સાહપૂર્વક ભાગ લીધો હતો અને જાતે મોદક બનાવીને તહેવારની ઉજવણી કરી હતી.

ગૂગલમાં કામ કરતી ગઝલ અરોરાએ આ ખાસ પ્રવૃત્તિનો વીડિયો પોતાના ઇન્સ્ટાગ્રામ અકાઉન્ટ પર શેર કર્યો છે. વીડિયોમાં તેઓ ગૂગલ ઓફિસ દ્વારા ઉપલબ્ધ કરાવવામાં આવેલી સામગ્રી અને મોદકના મોલ્ડની મદદથી મોદક બનાવતી જોવા મળે છે. વીડિયો શેર કરતી વખતે તેમણે ‘મોદક એક્ટિવિટી ઇન ગૂગલ’ એવું કેપ્શન લખ્યું હતું.

‘છ મહિનામાં ઘર કરતાં વધુ તહેવાર ઉજવ્યા’

વીડિયોમાં માત્ર મોદક બનાવવાની પ્રવૃત્તિ જ નહીં, પરંતુ ગઝલનો ગૂગલમાં કામ કરવાનો અનુભવ પણ લોકોનું ધ્યાન ખેંચી રહ્યો છે. તેમણે જણાવ્યું કે ગૂગલમાં જોડાયા બાદ છેલ્લા છ મહિનામાં તેમણે એટલા બધા તહેવારોની ઉજવણી કરી છે, જેટલી કદાચ તેમણે પોતાના ઘરે પણ કરી ન હોય.

ગઝલના જણાવ્યા અનુસાર ગૂગલના ઓફિસમાં માત્ર કામ પર જ ધ્યાન આપવામાં આવતું નથી, પરંતુ વિવિધ તહેવારો અને ખાસ પ્રસંગોને યાદગાર બનાવવા માટે કર્મચારીઓ માટે અલગ અલગ પ્રવૃત્તિઓનું પણ આયોજન કરવામાં આવે છે. તેમણે જણાવ્યું કે ઓણમથી લઈને સ્વતંત્રતા દિવસ સુધી અનેક પ્રસંગોએ ઓફિસમાં વિશેષ કાર્યક્રમો યોજાયા છે.

આ જ શ્રેણીમાં ગણેશ ચતુર્થી પહેલાં બેંગલુરુના ગૂગલ અનંતા ઓફિસમાં મોદક બનાવવાની ખાસ પ્રવૃત્તિ રાખવામાં આવી હતી. કર્મચારીઓએ કામની સાથે આ પરંપરાગત મીઠાઈ બનાવવાનો આનંદ માણ્યો હતો.

ગણેશ ચતુર્થી પર મોદક કેમ બનાવાય છે?

ગણેશ ચતુર્થી ભારતના મહત્વપૂર્ણ તહેવારોમાંનો એક છે. આ પર્વ દરમિયાન ભગવાન ગણેશની પૂજા કરવામાં આવે છે અને તેમને મોદકનો પ્રસાદ ધરાવવામાં આવે છે. ધાર્મિક માન્યતાઓ અનુસાર મોદક ભગવાન ગણેશને પ્રિય છે. તેથી ગણેશ ચતુર્થી દરમિયાન અનેક ઘરોમાં ખાસ મોદક બનાવવામાં આવે છે.

<a href="

==” target=”_blank”>

==

મોદકને માત્ર પ્રસાદ તરીકે જ નહીં, પરંતુ આનંદ અને શુભતાના પ્રતીક તરીકે પણ જોવામાં આવે છે. આ કારણે વિવિધ સંસ્થાઓ અને સમુદાયો પણ ગણેશોત્સવ દરમિયાન મોદક બનાવવાની પ્રવૃત્તિઓનું આયોજન કરે છે.

સોશિયલ મીડિયા પર લોકોએ કરી પ્રશંસા

ગઝલ અરોરાના વીડિયોને સોશિયલ મીડિયા પર સારો પ્રતિસાદ મળ્યો છે. ઘણા યુઝર્સે ગૂગલના ઓફિસ કલ્ચરની પ્રશંસા કરી હતી. એક યુઝરે લખ્યું કે ગૂગલ જાણે છે કે તહેવાર કેવી રીતે ઉજવવા જોઈએ. અન્ય એક યુઝરે કહ્યું કે ઓફિસ કલ્ચર આવું જ હોવું જોઈએ. કેટલાક યુઝર્સે મોદક પર પણ ધ્યાન આપ્યું. એક યુઝરે મોદકને સ્વાદિષ્ટ ગણાવ્યા, જ્યારે અન્ય લોકોએ આ પ્રવૃત્તિને મજેદાર અને આનંદદાયક ગણાવી હતી.

ગૂગલ બેંગલુરુ ઓફિસનો આ વીડિયો એટલા માટે પણ ચર્ચામાં છે કારણ કે તેમાં કામની સાથે ભારતીય તહેવારો અને પરંપરાઓને ઉજવતા કર્મચારીઓની એક અલગ તસવીર જોવા મળે છે. ઓફિસમાં મોદક બનાવવાની આ પ્રવૃત્તિએ કર્મચારીઓને તહેવારની ઉજવણીનો આનંદ આપવાની સાથે ભારતીય સંસ્કૃતિ સાથે જોડાવાની તક પણ આપી.

આ પણ વાંચો: Kalank Chauth 2026: ચંદ્રને જોવાથી કેમ લાગે છે કલંક? જાણો જીવનની સમસ્યાઓ દૂર કરવાના ખાસ ઉપાય