ભારતીય ક્રિકેટ ટીમના મુખ્ય કોચ ગૌતમ ગંભીર મેદાન પર પોતાના આક્રમક સ્વભાવ માટે જાણીતા છે. પરંતુ મેદાનની બહાર તેમનો અંદાજ અલગ હોય છે. પૂર્વ ભારતીય સ્પિનર અમિત મિશ્રાએ ગંભીર સાથે થયેલી જૂની બોલાચાલીનો કિસ્સો સંભળાવીને આ વાત જણાવી છે. દિલ્હી અને હરિયાણા વચ્ચે રમાયેલી એક ઘરેલુ મેચમાં બંને વચ્ચે ઉગ્ર બોલાચાલી થઈ હતી. જોકે, મેચ પૂરી થયા બાદ ગંભીર પોતે જ મિશ્રાને ફોન કરીને ડિનર માટે બોલાવ્યા હતા. આકાશ ચોપરાના પોડકાસ્ટમાં મિશ્રાએ આ રસપ્રદ કિસ્સો શેર કર્યો હતો. 

શું થયું હતું મેદાન પર?

અમિત મિશ્રાના જણાવ્યા પ્રમાણે, દિલ્હી અને હરિયાણા વચ્ચેની મેચ દરમિયાન તેઓ સતત વિકેટ લઈ રહ્યા હતા, જ્યારે ગૌતમ ગંભીર બીજી તરફ બેટિંગ કરી રહ્યા હતા. મેચ દરમિયાન એક સમયે બંને વચ્ચે વાતચીત શરૂ થઈ, જે ધીમે ધીમે બોલાચાલીમાં ફેરવાઈ ગઈ. મિશ્રાએ ગંભીરને કહ્યું કે તેઓ વિકેટ લઈ રહ્યા છે તો ગંભીરને તેનાથી શું તકલીફ છે. આ વાતના જવાબમાં ગંભીર ગુસ્સે થયા અને મિશ્રાને ચૂપ રહીને બોલિંગ કરવા કહ્યું. ગંભીરના આ જવાબથી મિશ્રા પણ નારાજ થઈ ગયા અને મેદાન પર જ બંને વચ્ચે ઉગ્ર બોલાચાલી થઈ હતી. 

મેચ પૂરી થયા બાદ ગંભીરનો આવ્યો ફોન

મેદાન પર થયેલી બોલાચાલી બાદ બંને ખેલાડીઓ હોટેલ પહોંચ્યા હતા. મિશ્રા હજુ પણ ગંભીરની વાતથી નારાજ હતા. એવામાં ગંભીરનો ફોન આવ્યો. તેમણે મિશ્રાને ડિનર માટે સાથે આવવાનું કહ્યું. પરંતુ મિશ્રાનો ગુસ્સો હજુ શાંત થયો ન હતો. તેમણે ગંભીરને કહી દીધું કે તેઓ જમવાનું ખાઈ ચૂક્યા છે. જોકે, ગંભીર અહીં અટક્યા નહીં. તેમણે મિશ્રાને ગુસ્સો ભૂલીને સાથે કોલ્ડ કોફી પીવા આવવા કહ્યું. આ કિસ્સો સંભળાવતા મિશ્રાએ જણાવ્યું કે ગંભીર મેદાન પર ભલે આક્રમક રીતે રમતા હોય, પરંતુ મિત્રતામાં મેદાનની તકરારને વચ્ચે આવવા દેતા નથી. જો તેઓ કોઈને મિત્ર માને છે, તો મેચ દરમિયાન થયેલી બોલાચાલીને વ્યક્તિગત સંબંધો પર હાવી થવા દેતા નથી. 

ગંભીરની સાદગીને લઈને પણ કર્યો ખુલાસો

અમિત મિશ્રાએ પોડકાસ્ટમાં ગંભીરના સ્વભાવની બીજી એક ખાસિયત પણ જણાવી. તેમના કહેવા પ્રમાણે, ગંભીરનો પરિવાર આર્થિક રીતે સધ્ધર હોવા છતાં તેમણે ક્યારેય પોતાની સંપત્તિનો દેખાડો કર્યો નહોતો. મિશ્રાએ જણાવ્યું કે તેમની પહેલી કાર મારુતિ અલ્ટો હતી, જ્યારે ગંભીર પાસે BMW હતી. તેમ છતાં ગંભીર તેમની અલ્ટોમાં બેસીને પ્રેક્ટિસ માટે જવા તૈયાર થઈ જતા હતા. તેમણે ક્યારેય મિશ્રા કે અન્ય સાથી ખેલાડીઓને એવું અનુભવવા દીધું નહોતું કે તેઓ આર્થિક રીતે વધારે સધ્ધર પરિવારમાંથી આવે છે. મિશ્રાના મતે, ગંભીરની આ સાદગી અને મિત્રોને માન આપવાની આદત તેમની મિત્રતાનું એક મોટું કારણ છે. મેદાન પર જીતવા માટે આક્રમક રહેવું અને મેદાનની બહાર મિત્રતા જાળવી રાખવી, ગંભીરના વ્યક્તિત્વની આ બંને બાજુઓનો ઉલ્લેખ મિશ્રાએ કર્યો હતો. 

જૂની મિત્રતા અને ક્રિકેટની સફર

અમિત મિશ્રા અને ગૌતમ ગંભીર એકબીજાને લાંબા સમયથી ઓળખે છે. બંનેએ દિલ્હીમાં કોચ સંજય ભારદ્વાજની એકેડમીમાં સાથે તાલીમ લીધી હતી. ત્યારબાદ ભારતીય ટીમ અને IPLમાં દિલ્હી ડેરડેવિલ્સ, જે હવે દિલ્હી કેપિટલ્સ તરીકે ઓળખાય છે, તરફથી પણ સાથે રમ્યા હતા. મિશ્રાએ સંભળાવેલો આ કિસ્સો દર્શાવે છે કે ક્રિકેટના મેદાન પર ખેલાડીઓ વચ્ચેની સ્પર્ધા કેટલીયે તીવ્ર હોય, પરંતુ વ્યક્તિગત સંબંધો અને મિત્રતા તેની બહાર પણ જળવાઈ રહી શકે છે.

આ પણ વાંચો: Record: ભારતે ટી-20 ક્રિકેટમાં રચ્યો ઐતિહાસિક વિશ્વવિક્રમ, પાકિસ્તાનને પાછળ છોડ્યું