ભારત અને ન્યૂઝીલેન્ડ વચ્ચે રમાઈ રહેલી 5 મેચની T20 શ્રેણીની ચોથી મેચમાં ગ્લેન ફિલિપ્સે પોતાની બેટિંગથી ધમાલ મચાવી દીધી હતી.ઓકલેન્ડના ઇડન પાર્કમાં રમાયેલી આ મેચમાં ફિલિપ્સે માત્ર 49 બોલમાં 107 રનની તોફાની સદી ફટકારી હતી.તેની આ ઇનિંગના આધારે ન્યૂઝીલેન્ડે 20 ઓવરમાં 3 વિકેટે 259 રનનો વિશાળ સ્કોર બનાવ્યો હતો.આ શાનદાર પ્રદર્શન સાથે ફિલિપ્સે એક મોટો રેકોર્ડ પોતાના નામે કર્યો છે.તે એક T20 આંતરરાષ્ટ્રીય શ્રેણીમાં ભારત સામે સૌથી વધુ રન બનાવનાર બેટ્સમેન બની ગયો છે.

ફિલિપ્સે શાઈ હોપનો રેકોર્ડ તોડ્યો

ભારત સામેની આ T20 શ્રેણીમાં ગ્લેન ફિલિપ્સ સતત શાનદાર ફોર્મમાં જોવા મળ્યો છે.ચોથી મેચમાં ન્યૂઝીલેન્ડે માત્ર 34 રનના સ્કોર પર પોતાની 2 વિકેટ ગુમાવી દીધી હતી. આવી મુશ્કેલ સ્થિતિમાં ફિલિપ્સ બેટિંગ કરવા આવ્યો હતો.તેણે એક છેડો સાચવી રાખવાની સાથે આક્રમક બેટિંગ પણ ચાલુ રાખી હતી.ફિલિપ્સે માત્ર 49 બોલમાં 6 ચોગ્ગા અને 10 છગ્ગાની મદદથી 107 રન બનાવ્યા હતા.આ સદી સાથે જ તેણે વેસ્ટ ઇન્ડિઝના કેપ્ટન શાઈ હોપનો રેકોર્ડ તોડી નાખ્યો હતો. શાઈ હોપે ઓક્ટોબર 2026માં ભારત સામેની T20 શ્રેણીમાં કુલ 261 રન બનાવ્યા હતા.જ્યારે ફિલિપ્સે ન્યૂઝીલેન્ડ સામેની વર્તમાન શ્રેણીમાં અત્યાર સુધી 276 રન બનાવીને નવો રેકોર્ડ સ્થાપિત કર્યો છે.

માર્ટિન ગપ્ટિલની પણ કરી બરાબરી

ઓકલેન્ડમાં રમાયેલી ચોથી T20 મેચમાં ન્યૂઝીલેન્ડે ભારતને 87 રનથી હરાવ્યું હતું.ગ્લેન ફિલિપ્સને તેની શાનદાર સદી માટે પ્લેયર ઓફ ધ મેચનો એવોર્ડ આપવામાં આવ્યો હતો.આ એવોર્ડ સાથે જ તેણે ન્યૂઝીલેન્ડના પૂર્વ દિગ્ગજ બેટ્સમેન માર્ટિન ગપ્ટિલની પણ બરાબરી કરી લીધી છે. T20 આંતરરાષ્ટ્રીય ક્રિકેટમાં ન્યૂઝીલેન્ડ તરફથી સૌથી વધુ વખત પ્લેયર ઓફ ધ મેચનો એવોર્ડ જીતવાના મામલે બંને ખેલાડીઓ હવે સંયુક્ત રીતે આગળ છે.ફિલિપ્સે અત્યાર સુધી 10 વખત આ એવોર્ડ પોતાના નામે કર્યો છે. આમ, ભારત સામેની ચોથી T20માં તેણે સદી ફટકારવાની સાથે એક નહીં, પરંતુ બે મોટી સિદ્ધિઓ મેળવી છે.

આ પણ વાંચો – U19 એશિયા કપ માટે ટીમ ઈન્ડિયાની જાહેરાત, દ્રવિડ અને સેહવાગના દીકરાઓને મળી તક!