ગુજરાતમાં ચોમાસાની વિદાય બાદ હવે વાતાવરણમાં મોટો પલટો જોવા મળી રહ્યો છે. હવામાન વિભાગ દ્વારા કરવામાં આવેલી નવી આગાહી મુજબ રાજ્યમાં આગામી દિવસોમાં મિશ્ર ઋતુ (ડબલ સઝન) ની અસર પ્રવર્તશે. નાગરિકોને સવારના સમયે વાતાવરણમાં હળવી ગુલાબી ઠંડીનો અહેસાસ થશે, જ્યારે બપોરના સમયે સૂર્યનારાયણના આકરા તાપને કારણે કાળઝાળ ગરમી અનુભવાશે. વાતાવરણમાં આવી રહેલા આ ફેરફારથી લોકો બેવડી મોસમનો સામનો કરી રહ્યા છે.

તાપમાનનો પારો અને પવનની ગતિ અંગે આગાહી

હવામાન વિભાગના જણાવ્યા મુજબ રાજ્યમાં દિવસ દરમિયાન મહત્તમ તાપમાન 37 થી 38 ડિગ્રી સેલ્સિયસ વચ્ચે રહેવાની શક્યતા છે, જેના કારણે બપોરે ઉકળાટ અને બળબળતો તાપ અનુભવાશે. જ્યારે રાત્રિ અને સવારના સમયે લઘુત્તમ તાપમાન ઘટીને 25 થી 26 ડિગ્રી સેલ્સિયસ સુધી પહોંચી જતાં ઠંડક પ્રસરી જશે. આ ઉપરાંત, પવનની દિશા દક્ષિણ-પશ્ચિમી રહેવાની સાથે પવનની ગતિ કલાકના 15 થી 20 કિલોમીટરની ઝડપે રહેવાનો અંદાજ વર્તાવવામાં આવ્યો છે.

આરોગ્ય જાળવવા અને સાવચેતી રાખવા તંત્રની સલાહ

એક જ દિવસમાં તાપમાનમાં મોટા તફાવત અને મિશ્ર ઋતુના કારણે શરદી, ઉધરસ અને તાવ જેવા વાયરલ ઈન્ફેક્શનના કેસો વધવાની પૂરતી શક્યતાઓ રહેલી છે. ખાસ કરીને નાના બાળકો અને વડીલોને આરોગ્ય સંભાળવાની અને બદલાતા વાતાવરણ સામે જરૂરી સાવચેતી રાખવા તબીબો દ્વારા સલાહ આપવામાં આવી રહી છે. ઓક્ટોબર મહિનાના આ સંક્રાંતિના સમયગાળા દરમિયાન તાપમાનમાં હજુ પણ ઉતાર-ચઢાવ ચાલુ રહેશે તેમ જણાઈ રહ્યું છે.

ગુજરાતના વધુ સમાચાર વાંચવા માટે ક્લિક કરો