ટેસ્ટ ક્રિકેટને વધુ દેશો સુધી પહોંચાડવા માટે ICC વર્લ્ડ ટેસ્ટ ચેમ્પિયનશિપ (WTC)ના માળખામાં મોટો ફેરફાર થઈ શકે છે. હાલમાં WTCમાં નવ ટીમો રમે છે, પરંતુ આગામી ચક્રથી તેમાં દસ કે તમામ 12 પૂર્ણ સભ્ય દેશોને સામેલ કરવાની ચર્ચા ચાલી રહી છે. ઇન્ડોનેશિયાના બાલીમાં 11થી 15 નવેમ્બર દરમિયાન યોજાઈ રહેલી ICCની બોર્ડ બેઠકોમાં આ મુદ્દો મહત્ત્વનો બન્યો છે. જોકે, હજુ સુધી કોઈ અંતિમ નિર્ણય જાહેર થયો નથી

હાલમાં નવ ટીમો જ રમે છે

હાલની WTC સ્પર્ધામાં ભારત, ઓસ્ટ્રેલિયા, ઇંગ્લેન્ડ, દક્ષિણ આફ્રિકા, ન્યૂઝીલેન્ડ, પાકિસ્તાન, શ્રીલંકા, બાંગ્લાદેશ અને વેસ્ટ ઇન્ડીઝનો સમાવેશ થાય છે. બીજી તરફ ICCના પૂર્ણ સભ્ય હોવા છતાં ઝિમ્બાબ્વે, આયર્લેન્ડ અને અફઘાનિસ્તાનને અત્યાર સુધી WTCમાં સ્થાન મળ્યું નથી. હવે આ ત્રણેય દેશોને સામેલ કરવાની શક્યતા પર ચર્ચા થઈ રહી છે. એક વિકલ્પ તમામ 12 પૂર્ણ સભ્યોને એક જ સ્પર્ધામાં સામેલ કરવાનો છે. બીજો વિકલ્પ દસ ટીમોનો છે, જેમાં ઝિમ્બાબ્વેને સ્થાન મળી શકે છે, જ્યારે આયર્લેન્ડ અને અફઘાનિસ્તાનને બહાર રાખવામાં આવે. 

ઝિમ્બાબ્વેને સૌથી વધુ તક?

ત્રણેય દેશોમાં ઝિમ્બાબ્વે WTCમાં પ્રવેશ મેળવવાની દૃષ્ટિએ સૌથી આગળ હોવાનું અહેવાલોમાં જણાવાયું છે. ઝિમ્બાબ્વેએ 2025માં દસ ટેસ્ટ અને 2026માં બે ટેસ્ટ રમી હતી. આથી તેની પાસે નિયમિત ટેસ્ટ ક્રિકેટ રમવાનો અનુભવ છે. આ ઉપરાંત ઇંગ્લેન્ડ 2028માં ઝિમ્બાબ્વેના પ્રવાસે જઈ ઓછામાં ઓછી એક ટેસ્ટ રમે તેવી યોજના છે. ઝિમ્બાબ્વે 2027માં દક્ષિણ આફ્રિકાના પ્રવાસે પણ ટેસ્ટ રમવાનું છે. આ બાબતો તેના દાવાને મજબૂત બનાવે છે. જોકે, WTCમાં સ્થાન મળશે કે નહીં તે ICCના અંતિમ નિર્ણય પર નિર્ભર રહેશે. 

ઇંગ્લેન્ડ 12 ટીમોના વિસ્તરણની તરફેણમાં નથી?

WTCને 12 ટીમો સુધી વિસ્તૃત કરવામાં સૌથી મોટો પડકાર ઇંગ્લેન્ડ ક્રિકેટ બોર્ડ તરફથી આવી શકે છે. અહેવાલો અનુસાર, ઇંગ્લેન્ડને વધુ ટેસ્ટ મેચો ઉમેરવાથી પ્રવાસ, ઘરઆંગણાની સિઝન અને ક્રિકેટ કેલેન્ડર પર વધારાનો બોજ પડવાની ચિંતા છે. નાના ક્રિકેટ બોર્ડ માટે પણ ટેસ્ટ મેચોનું આયોજન ખર્ચાળ હોય છે. જો 12 ટીમોનો સમાવેશ થાય તો દરેક દેશ વચ્ચે પૂરતી મેચો યોજવી અને પોઇન્ટ્સની ગણતરીનું માળખું તૈયાર કરવું સરળ નહીં રહે. એકમાત્ર ટેસ્ટની શ્રેણીઓને પણ WTCના પોઇન્ટ્સમાં કેવી રીતે ગણવી તે મોટો પ્રશ્ન બની શકે છે. 

2027-29ના ચક્ર માટે પણ તૈયારી

બાલી બેઠકમાં ICC 2027-29 અને 2029-31ના WTC ચક્ર માટેના મુકાબલાઓનું માળખું પણ રજૂ કરવાની છે. આ ઉપરાંત 2028થી 2035 દરમિયાન યોજાનારી મોટી પુરુષ ક્રિકેટ ટૂર્નામેન્ટ્સના સમયગાળાને મંજૂરી માટે રજૂ કરવામાં આવશે.

એટલે બાલી બેઠક માત્ર WTCના વિસ્તરણ પૂરતી મર્યાદિત નથી. અહીં આગામી વર્ષોના આંતરરાષ્ટ્રીય ક્રિકેટનું સમગ્ર સમયપત્રક અને સ્પર્ધાત્મક માળખું નક્કી કરવાની દિશામાં પણ ચર્ચા થઈ રહી છે. હવે જોવાનું એ રહેશે કે ICC નવ ટીમોનું વર્તમાન માળખું જાળવે છે, દસ ટીમોનો રસ્તો પસંદ કરે છે કે પછી તમામ 12 પૂર્ણ સભ્યોને તક આપે છે. 

આ પણ વાંચો: KS Bharat: ભારત માટે રમ્યો, હવે UAEની જર્સીમાં દેખાશે! પૂર્વ ભારતીય વિકેટકીપરનો મોટો નિર્ણય