ભારત અને અફઘાનિસ્તાન વચ્ચે 3 મેચની T20 આંતરરાષ્ટ્રીય શ્રેણીનો પ્રારંભ આજે નવી દિલ્હીના અરુણ જેટલી સ્ટેડિયમમાં થશે.આ સીરિઝની સૌથી ખાસ વાત એ છે કે ભારતીય ટીમ પોતાના જ દેશમાં અફઘાનિસ્તાન સામે ‘મહેમાન’ તરીકે રમશે.સામાન્ય રીતે ભારતીય ખેલાડીઓ જે ડ્રેસિંગ રૂમનો ઉપયોગ કરે છે, તેના બદલે આ વખતે તેઓ મહેમાન ટીમના ડ્રેસિંગ રૂમમાં જોવા મળશે.જોકે ડ્રેસિંગ રૂમ બદલાયો છે, પરંતુ મેદાન અને દિલ્હીની પરિસ્થિતિ ભારતીય ખેલાડીઓ માટે નવી નથી. ટીમ ઈન્ડિયા આ મેદાન પર અગાઉ પણ T20 મેચ રમી ચૂકી છે. આ કારણે પરિસ્થિતિઓની જાણકારી ભારતીય ટીમ માટે મહત્વનો ફાયદો બની શકે છે.

ટીમ ઈન્ડિયાનું પલડું ભારે

ભારતીય ટીમ વર્તમાન વિશ્વ ચેમ્પિયન છે અને અફઘાનિસ્તાન સામેની શ્રેણીમાં મજબૂત ટીમ સાથે મેદાનમાં ઉતરી રહી છે. આ ઉપરાંત દિલ્હીના મેદાન પર રમવાનો અનુભવ પણ ટીમ ઈન્ડિયા પાસે છે.આ વર્ષે ફેબ્રુઆરીમાં T20 વર્લ્ડ કપ દરમિયાન ભારતે અરુણ જેટલી સ્ટેડિયમમાં નામિબિયાને 93 રનથી હરાવ્યું હતું. આ જીત ભારતીય ટીમના આત્મવિશ્વાસને વધારવા માટે મહત્વની સાબિત થઈ શકે છે.પરંતુ દિલ્હીના મેદાનનો રેકોર્ડ જોવામાં આવે તો ભારત માટે બધું એટલું સરળ પણ નથી.

અરુણ જેટલી સ્ટેડિયમમાં ભારતનો T20 રેકોર્ડ

અરુણ જેટલી સ્ટેડિયમમાં ભારતીય ટીમે અત્યાર સુધી કુલ 5 T20 આંતરરાષ્ટ્રીય મેચ રમી છે. તેમાંથી ભારતને 3 મેચમાં જીત મળી છે, જ્યારે 2 મેચમાં હારનો સામનો કરવો પડ્યો છે.ભારતને અહીં મળેલી બંને હાર પણ નોંધપાત્ર ટીમો સામે આવી છે. ટીમ ઈન્ડિયા બાંગ્લાદેશ અને દક્ષિણ આફ્રિકા સામે આ મેદાન પર T20 મેચ હારી ચૂકી છે. તેથી અફઘાનિસ્તાન સામેની મેચમાં ભારતીય ટીમ કોઈપણ પ્રકારની બેદરકારી રાખવા માંગશે નહીં.

દિલ્હીમાં પહેલા બોલિંગ કરનાર ટીમને ફાયદો

અરુણ જેટલી સ્ટેડિયમના T20 આંકડા પણ રસપ્રદ છે.અત્યાર સુધી અહીં કુલ 14 T20 આંતરરાષ્ટ્રીય મેચ રમાઈ છે.તેમાં 9 વખત પ્રથમ બોલિંગ કરનારી ટીમે જીત મેળવી છે, જ્યારે માત્ર 5 વખત પ્રથમ બેટિંગ કરનારી ટીમ વિજયી બની છે.આ આંકડા જોતા ટોસ જીતનારી ટીમ માટે પહેલા બોલિંગ કરવાનો વિકલ્પ મહત્વનો બની શકે છે. જોકે પિચ અને મેચના દિવસે રહેલી પરિસ્થિતિ પણ અંતિમ નિર્ણયમાં મહત્વની રહેશે.

10 વર્ષ બાદ દિલ્હીમાં અફઘાનિસ્તાન

અફઘાનિસ્તાન માટે પણ આ મેચ ખાસ છે.અફઘાનિસ્તાનની ટીમ લગભગ 10 વર્ષ બાદ અરુણ જેટલી સ્ટેડિયમમાં T20 આંતરરાષ્ટ્રીય મેચ રમવા ઉતરશે.આ મેદાન પર અફઘાનિસ્તાનની પ્રથમ T20 આંતરરાષ્ટ્રીય મેચ 2016માં ઈંગ્લેન્ડ સામે થઈ હતી. તે મેચમાં ઈંગ્લેન્ડે જીત મેળવી હતી. હવે એક દાયકાના અંતર બાદ અફઘાનિસ્તાન ફરી દિલ્હીના આ મેદાનમાં ઉતરશે.આમ, ભારતીય ટીમને ઘરઆંગણે રમવાનો અનુભવ અને પરિસ્થિતિની જાણકારીનો લાભ ચોક્કસ મળી શકે છે, પરંતુ દિલ્હીના મેદાનનો જૂનો રેકોર્ડ ટીમ ઈન્ડિયાને સાવચેત રહેવાનો સંકેત પણ આપે છે. અફઘાનિસ્તાનની ટીમ T20 ક્રિકેટમાં આક્રમક રમત માટે જાણીતી છે, તેથી ભારતીય ટીમ માટે શ્રેણીની શરૂઆત પડકારજનક બની શકે છે.

આ પણ વાંચો – Sports News : ભારત-અફઘાનિસ્તાન વચ્ચે ‘ફ્રેન્ડશિપ કપ’નો જંગ, અરુણ જેટલી સ્ટેડિયમમાં રમાશે પ્રથમ T20 મુકાબલો