ઉત્તર પ્રદેશના બરેલી સ્થિત ભોજીપુરા પોલીસ સ્ટેશન વિસ્તારમાં પોલીસે ઓટો લૂંટની ઘટનાનો પર્દાફાશ કરીને બે સગા ભાઈઓ વિશાલ ઉર્ફે છોટુ અને ભારત રત્નની ધરપકડ કરી છે. પોલીસ તપાસમાં સામે આવ્યું છે કે બંને ભાઈઓએ પોતાના અન્ય એક સાથી શિવમ સાથે મળીને ઓટો ડ્રાઈવરોને લૂંટવાની યોજના બનાવી હતી. આ ગુના પાછળનો મુખ્ય હેતુ તેમની ગર્લફ્રેન્ડના શોખ અને પોતાના નશાની જરૂરિયાતો પૂરી કરવા માટે નાણાં એકઠા કરવાનો હતો. યોજના મુજબ 27 ઓગસ્ટની રાત્રે આરોપીઓએ સિટી સ્ટેશનથી જાંદૌપુર જવા માટે ઓટો ચાલક સગ્ગનનો ઓટો રૂ.500માં બુક કર્યો હતો.

ગળામાં ફાંસો આપી ડ્રાઈવર પર લોખંડના વજનિયાથી ખૌફનાક હુમલો

મુસાફરી દરમિયાન અવાવરુ જગ્યા આવતાં જ આરોપીઓએ ઓટોનો રૂટ બદલાવ્યો હતો અને પાછળ બેઠેલા શખ્સોએ ડ્રાઈવર સગ્ગનના ગળામાં ગમછા વડે ફાંસો લગાવી દીધો હતો. ત્યારબાદ આશરે બે કિલો વજનના લોખંડના વજનિયાથી ચાલકના માથા પર નિર્દયતાથી વાર કરવામાં આવ્યા હતા. ડ્રાઈવર લોહીલુહાણ હાલતમાં રોડ પર પડી જતાં જ આરોપીઓ ઓટો લઈને ફરાર થઈ ગયા હતા અને લૂંટેલી કારને સેમીખેડા સ્થિત પોતાની દુકાનમાં છુપાવી દીધી હતી. પીડિત ડ્રાઈવરે રસ્તા પરથી પસાર થતા લોકોની મદદ લઈને તુરંત પોલીસને આ ઘટનાની જાણ કરી હતી.

પહેલી જ ગુનાહિત વારદાતમાં પોલીસના હથ્થે ચડ્યા આરોપીઓ

ઘટના અંગે ગુનો નોંધાયા બાદ ભોજીપુરા પોલીસે ત્વરિત કાર્યવાહી હાથ ધરી સેમીખેડા-બરોર રોડ પર ઘેરાબંધી કરીને બંને ભાઈઓને ઝડપી લીધા હતા. પોલીસની કડક પૂછપરછમાં આરોપીઓએ લૂંટની કબૂલાત કરી હતી. તેમની પાસેથી લૂંટેલી ઓટો, 315 બોરનો તમંચો તેમજ ત્રણ જીવંત કારતૂસ જપ્ત કરવામાં આવ્યા છે. એસપી નોર્થ મુકેશ ચંદ્ર મિશ્રાના જણાવ્યા અનુસાર આરોપીઓ સામે અગાઉ દહેજ ઉત્પીડનનો કેસ દાખલ છે, પરંતુ લૂંટની આ તેમની પહેલી જ વારદાત હતી. હાલ પોલીસ આ ઘટનામાં સામેલ ત્રીજા ફરાર સાથી શિવમને પકડવા માટે વિવિધ ઠેકાણાઓ પર દરોડા પાડી રહી છે.

આ પણ વાંચો : Delhiમાં કચરાના પહાડ હટાવાયા, 2.16 કરોડ મેટ્રિક ટન કચરાનું કરાયું પ્રોસેસિંગ