જાપાન ક્રિકેટ માટે 22 સપ્ટેમ્બરનો દિવસ ઐતિહાસિક બનવા જઈ રહ્યો છે.આ દિવસે જાપાનની ટીમ પ્રથમ વખત ભારતીય ક્રિકેટ ટીમ સામે T20 મેચ રમશે.ભારત અને જાપાન વચ્ચેનો આ મુકાબલો સાનો ઈન્ટરનેશનલ ક્રિકેટ ગ્રાઉન્ડ પર રમાશે.એશિયન ગેમ્સની કેટલીક મેચો પણ આ મેદાન પર યોજાવાની છે.ભારત સામેની આ ઐતિહાસિક મેચ માટે જાપાને પોતાની ટીમ જાહેર કરી છે.ટીમની કમાન કેન્ડલ કાડોવાકી-ફ્લેમિંગના હાથમાં છે. ખાસ વાત એ છે કે જાપાનના આ કેપ્ટનનો ભારત સાથે નહીં, પરંતુ ભારતીય ક્રિકેટના પૂર્વ કેપ્ટન મહેન્દ્ર સિંહ ધોની સાથે ખાસ કનેક્શન છે. એક સમય હતો જ્યારે ધોની ક્રિઝ પર આવતા ત્યારે ફ્લેમિંગ ખૂબ જ દબાણ અનુભવતા હતા.

કેન્ડલ કાડોવાકી-ફ્લેમિંગ કોણ છે?

કેન્ડલ કાડોવાકી-ફ્લેમિંગ જાપાનના સૌથી મહત્વના ક્રિકેટરોમાંથી એક છે.તે જાપાન માટે સૌથી વધુ T20 રન બનાવનાર ખેલાડી છે. તેણે અત્યાર સુધી 55 T20 મેચમાં 38ની સરેરાશથી 1871 રન બનાવ્યા છે.તેના નામે 2 સદી અને 12 અડધી સદી પણ નોંધાયેલી છે.ફ્લેમિંગનો જન્મ જાપાનમાં થયો હતો,પરંતુ 7 વર્ષની ઉંમરે તે ઓસ્ટ્રેલિયા ચાલ્યો ગયો હતો.ઓસ્ટ્રેલિયામાં તેણે ક્વીન્સલેન્ડ માટે અંડર-17 સ્તર સુધી ક્રિકેટ રમ્યું હતું.ત્યારબાદ 18 વર્ષની ઉંમરે જાપાન ક્રિકેટ તરફથી તેનો સંપર્ક કરવામાં આવ્યો.આ પછી ફ્લેમિંગ દર વર્ષે જાપાન માટે ક્રિકેટ રમવા આવવા લાગ્યો અને ધીમે-ધીમે ટીમનો મહત્વનો ખેલાડી બની ગયો.આજે તે જાપાનની ટીમનો કેપ્ટન છે અને તેની બેટિંગ પર ટીમ ઘણી હદ સુધી આધાર રાખે છે.

ક્રિકેટની સાથે નોકરી પણ કરે છે

કેન્ડલ કાડોવાકી-ફ્લેમિંગ માત્ર ક્રિકેટર જ નથી.તે એક મોટી કંપનીમાં સિનિયર ફાઇનાન્શિયલ એનાલિસ્ટ તરીકે પણ કામ કરે છે.આ ઉપરાંત તેની પોતાની પ્લેયર મેનેજમેન્ટ કંપની પણ છે.ફ્લેમિંગ ઓસ્ટ્રેલિયન ક્રિકેટ ટીમને જોતા મોટા થયા છે. ઓસ્ટ્રેલિયા અને ભારત વચ્ચેની મેચો દરમિયાન તે ખાસ કરીને ધોનીની બેટિંગથી ખૂબ પ્રભાવિત થતા હતા.

ધોની ક્રિઝ પર આવતા જ થતું હતું ટેન્શન

એક ઇન્ટરવ્યૂમાં ફ્લેમિંગે ધોની સાથે જોડાયેલી પોતાની જૂની યાદ શેર કરી હતી. તેમણે જણાવ્યું હતું કે જ્યારે ધોની બેટિંગ કરવા માટે ક્રિઝ પર આવતા ત્યારે તેઓ અસહજ થઈ જતા હતા.તેનું કારણ એ હતું કે ધોની જ્યાં સુધી ક્રિઝ પર રહેતા, ત્યાં સુધી ઓસ્ટ્રેલિયા માટે મેચ જીતવાની ખાતરી રહેતી નહોતી. ધોનીની મેચ પૂરી કરવાની ક્ષમતા સામે ઓસ્ટ્રેલિયન ટીમને સતત સાવધાન રહેવું પડતું હતું.હવે સમય બદલાઈ ગયો છે. જે ખેલાડી એક સમયે ધોનીની બેટિંગથી નર્વસ થઈ જતો હતો, તે હવે જાપાનની ટીમની આગેવાની કરીને ભારત સામે મેદાનમાં ઉતરશે.

ભારત સામે ફ્લેમિંગનું કેવું રહેશે પ્રદર્શન?

22 સપ્ટેમ્બરે જાપાન પ્રથમ વખત ભારત સામે T20 મેચ રમશે. ભારતીય ટીમ સામે રમવાનો અનુભવ જાપાનના ખેલાડીઓ માટે પણ ખાસ રહેશે. હવે સૌથી વધુ નજર કેન્ડલ કાડોવાકી-ફ્લેમિંગ પર રહેશે.જે ફ્લેમિંગ ક્યારેક ધોનીને ક્રિઝ પર જોઈને દબાણ અનુભવતા હતા, તે હવે ભારતીય ટીમ સામે પોતાની ટીમને જીત અપાવવા માટે મેદાનમાં ઉતરશે. આ ઐતિહાસિક મુકાબલામાં તેઓ પોતાની બેટિંગથી ભારત સામે કેટલો પડકાર ઊભો કરી શકે છે, તે જોવું રસપ્રદ રહેશે.

આ પણ વાંચો – ENG vs PAK : પાકિસ્તાની દિગ્ગજે ઈંગ્લેન્ડ સામે ત્રીજી ટેસ્ટ પહેલાં ઉઠાવ્યા ગંભીર સવાલો