IPL 2027 પહેલાં ચેન્નાઈ સુપર કિંગ્સ (CSK) એ પોતાની ટીમમાં મોટો ફેરફાર કર્યો છે. 5 વખતની ચેમ્પિયન CSK એ સનરાઇઝર્સ હૈદરાબાદ (SRH) સાથે 4 ખેલાડીઓની અદલાબદલી કરી છે. આ ટ્રેડમાં સૌથી વધુ ચર્ચા ઇંગ્લેન્ડના વિસ્ફોટક ઓલરાઉન્ડર લિયામ લિવિંગસ્ટોનની થઈ રહી છે. કારણ કે CSK એ તેને તેની અગાઉની ₹13 કરોડની કિંમત કરતાં ઘણી ઓછી એટલે કે માત્ર ₹6 કરોડમાં પોતાની ટીમમાં સામેલ કર્યો છે. આ ટ્રેડની સત્તાવાર જાહેરાત 5 નવેમ્બર 2026ના રોજ કરવામાં આવી હતી. 

CSKમાં કયા 2 ખેલાડીઓ જોડાયા?

આ ટ્રેડ હેઠળ લિયામ લિવિંગસ્ટોન અને ઓસ્ટ્રેલિયાના ઓલરાઉન્ડર જેક એડવર્ડ્સ હવે CSK તરફથી રમતા જોવા મળશે. લિવિંગસ્ટોન પોતાની આક્રમક બેટિંગ અને લાંબી સિક્સર ફટકારવાની ક્ષમતા માટે જાણીતો છે. તે જરૂરિયાતના સમયે સ્પિન બોલિંગ પણ કરી શકે છે. SRH એ અગાઉ તેને ₹13 કરોડમાં પોતાની ટીમમાં સામેલ કર્યો હતો, પરંતુ હવે CSK માં જોડાતાં તેની નવી કિંમત ₹6 કરોડ નક્કી કરવામાં આવી છે. એટલે કે CSK ને આ ખેલાડી અગાઉની કિંમત કરતાં ₹7 કરોડ ઓછામાં મળ્યો છે. બીજી તરફ ઓસ્ટ્રેલિયાનો જેક એડવર્ડ્સ પણ CSK સાથે જોડાયો છે. તેની કિંમત ₹3 કરોડ યથાવત્ રાખવામાં આવી છે. SRH એ તેને IPL 2026 પહેલાં પોતાની ટીમમાં સામેલ કર્યો હતો, પરંતુ પગની ઈજાને કારણે તે આખી સિઝન રમી શક્યો નહોતો. હવે CSK તરફથી તેને IPL માં રમવાની નવી તક મળશે. 

SRHમાં કયા ખેલાડીઓની એન્ટ્રી થઈ?

CSK એ પોતાની ટીમના 2 ખેલાડીઓને SRH સાથે ટ્રેડ કર્યા છે. જેમાં ડાબા હાથના ઝડપી બોલર ખલીલ અહેમદ અને ઓસ્ટ્રેલિયાના ફાસ્ટ બોલર નાથન એલિસનો સમાવેશ થાય છે. ખલીલ અહેમદ હવે ફરી પોતાની જૂની ટીમ SRH સાથે જોડાશે. તે અગાઉ 2018થી 2021 દરમિયાન પણ આ ટીમનો ભાગ રહી ચૂક્યો છે. IPL 2025માં તેણે CSK તરફથી 14 મેચમાં 15 વિકેટ ઝડપી હતી. જોકે IPL 2026માં જમણી જાંઘના સ્નાયુની ઈજાને કારણે તે માત્ર 5 મેચ જ રમી શક્યો હતો. હવે હૈદરાબાદની ટીમને તેની પાસેથી ઝડપી બોલિંગમાં સારા પ્રદર્શનની આશા રહેશે. બીજી તરફ ઓસ્ટ્રેલિયાનો નાથન એલિસ પણ SRHમાં જોડાયો છે. તેની કિંમત ₹2 કરોડ યથાવત્ રાખવામાં આવી છે. એલિસ ખાસ કરીને ડેથ ઓવરમાં બોલિંગ અને પોતાની વિવિધ બોલિંગ શૈલી માટે જાણીતો છે. તેના આવવાથી હૈદરાબાદની ઝડપી બોલિંગને વધુ મજબૂતી મળી શકે છે. 

CSK અને SRH માટે કેટલો ફાયદો?

આ ટ્રેડમાં બંને ટીમોએ પોતાની જરૂરિયાત પ્રમાણે ખેલાડીઓની અદલાબદલી કરી છે. CSKને લિવિંગસ્ટોનના રૂપમાં આક્રમક બેટિંગ અને ઓલરાઉન્ડ વિકલ્પ મળ્યો છે. સાથે જ જેક એડવર્ડ્સ પણ ટીમને વધારાનો વિકલ્પ આપશે. બીજી તરફ SRH એ ખલીલ અહેમદ અને નાથન એલિસના રૂપમાં પોતાની ઝડપી બોલિંગ મજબૂત કરવાનો પ્રયાસ કર્યો છે. ખાસ કરીને ડેથ ઓવરમાં એલિસની ભૂમિકા મહત્વની બની શકે છે. હવે જોવાનું એ રહેશે કે IPL 2027માં આ ચારેય ખેલાડીઓ પોતાની નવી ટીમ માટે કેવું પ્રદર્શન કરે છે. જોકે એક વાત સ્પષ્ટ છે કે આ ટ્રેડથી આગામી સિઝન પહેલાં CSK અને SRH બંનેની ટીમમાં મોટા ફેરફાર થયા છે.

શું છે IPL નો ટ્રેડ વિન્ડો નિયમ?

ઘણા વાંચકોને પ્રશ્ન થતો હશે કે ઓક્શન વગર ખેલાડીઓ કેવી રીતે બદલાઈ શકે? તો જણાવી દઈએ કે BCCI ના નિયમ મુજબ, IPL ની બે સીઝન વચ્ચે ‘ટ્રેડ વિન્ડો’ ખુલ્લી હોય છે. જેમાં બે ફ્રેન્ચાઈઝી પરસ્પર સહમતિથી પોતાના ખેલાડીઓની અદલાબદલી કરી શકે છે અથવા રોકડ રકમ આપીને ખેલાડીને ખરીદી શકે છે. CSK અને SRH એ પોતાની ટીમની જરૂરિયાત અને સંતુલનને ધ્યાનમાં રાખીને આ 4 ખેલાડીઓની અદલાબદલી કરી છે. લિવિંગસ્ટોન અગાઉ IPL માં 117 મીટરની સૌથી લાંબી સિક્સર ફટકારવાનો રેકોર્ડ પણ બનાવી ચૂક્યો છે. હવે તેને પીળી જર્સીમાં રમતો જોવા માટે CSK ના ફેન્સ ખૂબ જ ઉત્સાહિત છે.

આ પણ વાંચો: Rohit-Kohaliના વિરોધ છતાં BCCI નો મોટો નિર્ણય! IPL માં આ નિયમ હવે 2027 સુધી ચાલુ રહેશે, જાણો કેમ?