ગુજરાત ટાઇટન્સે IPL 2027 પહેલાં પોતાની ટીમને મજબૂત કરવાની દિશામાં મોટું પગલું ભર્યું છે. અહેવાલો અનુસાર, સનરાઇઝર્સ હૈદરાબાદના ઝડપી બોલર હર્ષલ પટેલને ગુજરાત ટાઇટન્સ ₹4 કરોડના ઓલ-કેશ ટ્રેડમાં પોતાની ટીમમાં સામેલ કરવા જઈ રહી છે. ખાસ વાત એ છે કે હૈદરાબાદે 2025ની મેગા ઓક્શનમાં હર્ષલને ₹8 કરોડમાં ખરીદ્યો હતો. એટલે હવે ગુજરાતને આ બોલર અડધી કિંમતે મળી શકે છે. હર્ષલ અમદાવાદના હોવાથી આ ટ્રેડ તેમના માટે ઘરવાપસી સમાન રહેશે. જોકે, બંને ફ્રેન્ચાઇઝી તરફથી સત્તાવાર જાહેરાતની રાહ જોવાઈ રહી છે.

₹8 કરોડના બોલર માટે હવે ₹4 કરોડની ડીલ

હર્ષલ પટેલને સનરાઇઝર્સ હૈદરાબાદે 2025ની મેગા ઓક્શનમાં ₹8 કરોડમાં ખરીદ્યો હતો. IPL 2025માં તેણે 13 મેચમાં 16 વિકેટ ઝડપી હતી. જોકે, IPL 2026માં તેને માત્ર પાંચ મેચ રમવાની તક મળી હતી અને તે એક પણ વિકેટ લઈ શક્યો નહોતો. તેણે આ સિઝનમાં 10.82ના ઇકોનોમી રેટથી રન આપ્યા હતા. હવે અહેવાલો પ્રમાણે હૈદરાબાદે તેને ₹4 કરોડમાં ગુજરાત ટાઇટન્સને ટ્રેડ કરવાની સંમતિ આપી છે. આ ઓલ-કેશ ડીલ પૂર્ણ થયા બાદ ગુજરાતના ઓક્શન પર્સમાંથી ₹4 કરોડ કપાશે. IPLની રિટેન્શન યાદી જાહેર કરવાની છેલ્લી તારીખ 17 નવેમ્બર છે. તેથી આ ટ્રેડ તે પહેલાં પૂર્ણ થવાની શક્યતા છે.

બે વખત જીતી ચૂક્યો છે પર્પલ કેપ

હર્ષલ પટેલનું IPL કરિયર ઉતાર-ચઢાવથી ભરેલું રહ્યું છે, પરંતુ તેની પાસે બે વખત પર્પલ કેપ જીતવાનો અનુભવ છે. 2021માં રોયલ ચેલેન્જર્સ બેંગલુરુ તરફથી રમતાં તેણે 32 વિકેટ ઝડપી હતી અને સિઝનનો સૌથી સફળ બોલર બન્યો હતો. ત્યારબાદ 2024માં પંજાબ કિંગ્સ તરફથી રમતાં તેણે 14 મેચમાં 24 વિકેટ ઝડપી હતી. આ પ્રદર્શનના આધારે તેણે બીજી વખત પર્પલ કેપ જીતી હતી. ડેથ ઓવર્સમાં તેની ધીમી ગતિની બોલિંગ અને વિવિધતા ગુજરાત માટે ઉપયોગી બની શકે છે.

ગુજરાત ટાઇટન્સ અગાઉ પણ હર્ષલ પાછળ પડી હતી

ગુજરાત ટાઇટન્સ માટે હર્ષલ નવો વિકલ્પ નથી. ફ્રેન્ચાઇઝીએ 2024ની ઓક્શનમાં પણ તેને ખરીદવા માટે ₹10.5 કરોડ સુધી બોલી લગાવી હતી, પરંતુ પંજાબ કિંગ્સે ₹11.75 કરોડમાં તેને ખરીદી લીધો હતો. 2025ની મેગા ઓક્શનમાં પણ ગુજરાતે હર્ષલ માટે રસ દાખવ્યો હતો અને ₹6.5 કરોડ સુધી બોલી લગાવી હતી. જોકે, તે સમયે હૈદરાબાદે ₹8 કરોડની બોલી સાથે તેને પોતાની ટીમમાં સામેલ કર્યો હતો. હવે બે ઓક્શનમાં ખરીદવામાં નિષ્ફળ રહ્યા બાદ ગુજરાતને ટ્રેડ દ્વારા હર્ષલને મેળવવાની તક મળી છે.

ગુજરાતના પેસ એટેકને મળશે અનુભવ

હર્ષલ ગુજરાત ટાઇટન્સમાં જોડાય તો તેની પાસે કાગિસો રબાડા, મોહમ્મદ સિરાજ, પ્રસિદ્ધ કૃષ્ણા અને જેસન હોલ્ડર જેવા ઝડપી બોલરોનો સાથ હશે. ટીમને ડેથ ઓવર્સમાં અનુભવ ધરાવતો ભારતીય બોલર મળશે.

હર્ષલ માટે આ પાંચમી IPL ફ્રેન્ચાઇઝી હશે. તેણે 2012માં IPL ડેબ્યૂ કર્યું હતું. ત્યારથી તે રોયલ ચેલેન્જર્સ બેંગલુરુ, દિલ્હી કેપિટલ્સ, પંજાબ કિંગ્સ અને સનરાઇઝર્સ હૈદરાબાદ તરફથી રમી ચૂક્યો છે. હવે ટ્રેડ પૂર્ણ થાય તો તે પોતાના ઘરઆંગણે ગુજરાત ટાઇટન્સ તરફથી રમતો જોવા મળશે.

આ પણ વાંચો: WPL 2027ની ફાઇનલનું મેદાન બદલાશે? બ્રેબોર્ન પાસેથી છીનવાઈ શકે છે મોટી મેચોની યજમાની!