IPL 2027ની સિઝન શરૂ થવામાં હજુ સમય છે, પરંતુ આજનો દિવસ તમામ 10 ટીમો માટે ખૂબ જ મહત્ત્વનો બની રહ્યો છે. આગામી સિઝન પહેલાં કઈ ટીમ કયા ખેલાડીઓને પોતાની સાથે જાળવી રાખશે અને કોને બહારનો રસ્તો બતાવશે તેનો નિર્ણય આજે થશે. તમામ ફ્રેન્ચાઇઝીએ 17 નવેમ્બર સુધી પોતાની રિટેન્શન લિસ્ટ જાહેર કરવાની છે. બીજી તરફ, હરાજી પહેલાં ખેલાડીઓની અદલાબદલી એટલે કે ટ્રેડને લઈને પણ ભારે ચર્ચા ચાલી રહી છે.આ વખતે અત્યાર સુધી ઘણા મોટા ખેલાડીઓ એક ટીમ છોડીને બીજી ટીમમાં સામેલ થઈ ચૂક્યા છે. તેમાં ઋષભ પંત,હાર્દિક પંડ્યા, અર્શદીપ સિંહ અને લિયામ લિવિંગસ્ટન જેવા મોટા નામ સામેલ છે.
આજે સાંજ સુધીમાં જાહેર થશે 10 ટીમોની રિટેન્શન લિસ્ટ
BCCI દ્વારા તમામ 10 ટીમોને 17 નવેમ્બર સુધી પોતાની રિટેન્શન લિસ્ટ જાહેર કરવા માટે કહેવામાં આવ્યું છે. અગાઉ આ માટે 15 નવેમ્બરની તારીખ નક્કી કરવામાં આવી હતી, પરંતુ ભારત અને ન્યૂઝીલેન્ડ વચ્ચેની પાંચમી વનડે મેચને ધ્યાનમાં રાખીને તારીખમાં ફેરફાર કરવામાં આવ્યો હતો.આજે સાંજ સુધીમાં તમામ ટીમો પોતાના જાળવી રાખેલા ખેલાડીઓનાં નામ જાહેર કરશે. જે ખેલાડીઓને ટીમો રિલીઝ કરશે તેઓ ફરીથી હરાજીમાં સામેલ થઈ શકશે. રિલીઝ થયેલા ખેલાડીઓએ 23 નવેમ્બર સુધીમાં હરાજી માટે પોતાનું રજિસ્ટ્રેશન કરાવવાનું રહેશે.
16 ડિસેમ્બરે ગોવામાં IPL 2027ની હરાજી
આગામી સિઝન માટે ખેલાડીઓની હરાજી 16 ડિસેમ્બરે ગોવામાં યોજાવાની છે. હરાજી માટે રજિસ્ટ્રેશન કરાવનારા ખેલાડીઓની યાદી BCCI દ્વારા 3 ડિસેમ્બર સુધીમાં જાહેર કરવામાં આવશે. ત્યારબાદ તમામ ટીમો પોતાની જરૂરિયાત પ્રમાણે ખેલાડીઓની પસંદગી કરશે.આઈપીએલની એક ટીમમાં મહત્તમ 25 ખેલાડીઓ હોઈ શકે છે. રિટેન્શન બાદ જે જગ્યાઓ ખાલી રહેશે તે માટે ટીમો હરાજીમાં ખેલાડીઓ ખરીદશે. આગામી સિઝન માર્ચના અંતિમ સપ્તાહથી શરૂ થવાની શક્યતા છે.
ઋષભ પંતની દિલ્હી કેપિટલ્સમાં વાપસી
આ વખતના મોટા ટ્રેડની વાત કરીએ તો સૌથી પહેલાં ઋષભ પંત અને કુલદીપ યાદવના નામ ચર્ચામાં આવ્યા હતા. લખનઉ સુપર જાયન્ટ્સે પોતાના કેપ્ટન ઋષભ પંતને દિલ્હી કેપિટલ્સમાં મોકલ્યો હતો. બીજી તરફ કુલદીપ યાદવ દિલ્હી છોડીને લખનઉની ટીમમાં સામેલ થયો હતો.આ ટ્રેડમાં ઋષભ પંતને 15 કરોડ રૂપિયા અને કુલદીપ યાદવને 13.5 કરોડ રૂપિયાનો પગાર મળવાનો છે.
ટી નટરાજન અને ઝીશાન અન્સારીની અદલાબદલી
ઓક્ટોબરમાં દિલ્હી કેપિટલ્સ અને સનરાઇઝર્સ હૈદરાબાદ વચ્ચે પણ ટ્રેડ થયો હતો. ટી નટરાજન દિલ્હી છોડીને ફરીથી સનરાઇઝર્સ હૈદરાબાદમાં જોડાયો હતો. જ્યારે હૈદરાબાદના ઝીશાન અન્સારી દિલ્હી કેપિટલ્સમાં સામેલ થયા હતા.આ ટ્રેડ પ્રમાણે નટરાજનને 5 કરોડ રૂપિયા અને ઝીશાન અન્સારીને 40 લાખ રૂપિયાનો પગાર મળશે.
CSK અને SRH વચ્ચે ચાર ખેલાડીઓનો ટ્રેડ
5 નવેમ્બરે ચેન્નાઈ સુપર કિંગ્સ અને સનરાઇઝર્સ હૈદરાબાદ વચ્ચે ચાર ખેલાડીઓની અદલાબદલી થઈ હતી. લિયામ લિવિંગસ્ટન અને જેક એડવર્ડ્સ ચેન્નાઈ સુપર કિંગ્સમાં સામેલ થયા હતા. જ્યારે ખલીલ અહેમદ અને નાથન એલિસ સનરાઇઝર્સ હૈદરાબાદમાં ગયા હતા.આ ટ્રેડમાં લિયામ લિવિંગસ્ટનને 6 કરોડ રૂપિયા અને જેક એડવર્ડ્સને 3 કરોડ રૂપિયા મળશે. બીજી તરફ ખલીલ અહેમદને 4.8 કરોડ રૂપિયા અને નાથન એલિસને 2 કરોડ રૂપિયાનો પગાર મળશે.
હાર્દિક પંડ્યા અને અર્શદીપ સિંહની ટીમ બદલાઈ
11 નવેમ્બરે મુંબઈ ઇન્ડિયન્સ અને પંજાબ કિંગ્સ વચ્ચે મોટો ટ્રેડ થયો હતો. મુંબઈ ઇન્ડિયન્સનો કેપ્ટન હાર્દિક પંડ્યા પંજાબ કિંગ્સમાં સામેલ થયો હતો. જ્યારે પંજાબનો સ્ટાર ફાસ્ટ બોલર અર્શદીપ સિંહ મુંબઈ ઇન્ડિયન્સમાં જોડાયો હતો.બંને ખેલાડીઓનો પગાર 18-18 કરોડ રૂપિયા નક્કી કરવામાં આવ્યો છે. આ ટ્રેડે IPL 2027 પહેલાં ક્રિકેટ જગતમાં ભારે ચર્ચા જગાવી છે.
મોહમ્મદ શમી અને સેમ કરન પર પણ નજર
આ તમામ ટ્રેડ વચ્ચે મોહમ્મદ શમી અને સેમ કરન જેવા ખેલાડીઓનાં નામની પણ ચર્ચા થઈ રહી છે. જોકે, તેમના ટ્રેડ અંગે હજુ સુધી કોઈ અંતિમ નિર્ણય કે સત્તાવાર જાહેરાત થઈ નથી.હવે તમામની નજર આજની રિટેન્શન લિસ્ટ પર છે. સાંજ સુધીમાં સ્પષ્ટ થઈ જશે કે કઈ ટીમે કયા ખેલાડીઓ પર વિશ્વાસ મૂક્યો છે અને કયા મોટા ખેલાડીઓ હરાજીમાં ઉતરવાના છે.
આ પણ વાંચો- IND vs NZ ટેસ્ટ સિરીઝ પહેલાં ન્યૂઝીલેન્ડને મોટો ઝટકો, સ્ટાર ખેલાડી આખી સિરીઝમાંથી બહાર
