ઓસ્ટ્રેલિયાના સ્ટાર ફાસ્ટ બોલર જોશ હેઝલવુડે દક્ષિણ આફ્રિકા સામેની પ્રથમ ટેસ્ટમાં શાનદાર પ્રદર્શન કરીને ક્રિકેટ જગતમાં નવો ઈતિહાસ રચી દીધો છે. ડરબનના કિંગ્સમીડ મેદાન પર રમાયેલી રોમાંચક મેચમાં હેઝલવુડે પોતાની ઘાતક બોલિંગના જોરે કાંગારૂ ટીમને ભવ્ય જીત અપાવી હતી.આ સાથે જ તેણે ઓસ્ટ્રેલિયાના પૂર્વ સ્પીડ સ્ટાર બ્રેટ લીનો વર્ષો જૂનો રેકોર્ડ તોડીને એક ખાસ ક્લબમાં એન્ટ્રી કરી લીધી છે.

ડરબન ટેસ્ટમાં હેઝલવુડની સુનામી

દક્ષિણ આફ્રિકા અને ઓસ્ટ્રેલિયા વચ્ચે 9 થી 13 ઓક્ટોબર દરમિયાન રમાયેલી પ્રથમ ટેસ્ટ મેચમાં પ્રવાસી ઓસ્ટ્રેલિયન ટીમે યજમાન આફ્રિકાને 214 રનના વિશાળ અંતરથી હરાવ્યું હતું. જીત માટે 421 રનના મુશ્કેલ લક્ષ્યાંકનો પીછો કરવા ઉતરેલી દક્ષિણ આફ્રિકાની ટીમ બીજી ઇનિંગમાં માત્ર 206 રનમાં ઓલઆઉટ થઈ ગઈ હતી.ઓસ્ટ્રેલિયાની આ એકતરફી જીતના અસલી હીરો જોશ હેઝલવુડ રહ્યા હતા. હેઝલવુડે પ્રથમ ઇનિંગમાં 2 વિકેટ લીધા બાદ, બીજી ઇનિંગમાં રુદ્ર સ્વરૂપ ધારણ કર્યું હતું. તેણે માત્ર 16.5 ઓવરમાં 49 રન આપીને દક્ષિણ આફ્રિકાના 6 બેટ્સમેનોને પેવેલિયન ભેગા કરી દીધા હતા અને મેચ ઓસ્ટ્રેલિયાની ઝોળીમાં નાખી દીધી હતી.

હેઝલવુડે બ્રેટ લીનો રેકોર્ડ તોડ્યો 

આ શાનદાર પ્રદર્શન સાથે જોશ હેઝલવુડના નામે ટેસ્ટ ક્રિકેટમાં કુલ 311 વિકેટ થઈ ગઈ છે. તેણે ઓસ્ટ્રેલિયાના પૂર્વ દિગ્ગજ ફાસ્ટ બોલર બ્રેટ લી (310 વિકેટ)ને પાછળ છોડી દીધો છે.આ સિદ્ધિ સાથે હેઝલવુડ હવે ઓસ્ટ્રેલિયા માટે ટેસ્ટ ક્રિકેટમાં સૌથી વધુ વિકેટ લેનારા બોલરોની યાદીમાં 8મા ક્રમે પહોંચી ગયો છે.

હવે મિચેલ જોન્સનનો રેકોર્ડ નિશાના પર

બ્રેટ લીને પાછળ છોડ્યા બાદ હવે હેઝલવુડની નજર ઓસ્ટ્રેલિયાના ભૂતપૂર્વ ડાબા હાથના ઘાતક ફાસ્ટ બોલર મિચેલ જોન્સનના રેકોર્ડ પર છે. જોન્સને પોતાની કારકિર્દીમાં 73 ટેસ્ટ મેચ રમીને 313 વિકેટ ઝડપી હતી. હેઝલવુડને જોન્સનથી આગળ નીકળવા માટે હવે માત્ર 3 વિકેટની જરૂર છે. દક્ષિણ આફ્રિકા સામેની આગામી બે ટેસ્ટ મેચમાં જો હેઝલવુડ આ 3 વિકેટ મેળવી લેશે, તો તે ઓસ્ટ્રેલિયાના ઓલ-ટાઇમ મહાન બોલરોની યાદીમાં 7મા સ્થાને પહોંચી જશે.

આ પણ વાંચો – ICC T20I રેન્કિંગમાં શ્રેયસ ઐયરનો ધમાકો, ઈશાન-અભિષેક વચ્ચે નંબર-1ની લડાઈ