દક્ષિણ આફ્રિકાના સ્ટાર ફાસ્ટ બોલર કાગિસો રબાડાએ ટેસ્ટ ક્રિકેટમાં નવો ઇતિહાસ રચ્યો છે.ઓસ્ટ્રેલિયા સામે કેપટાઉનમાં રમાઈ રહેલી ત્રીજી ટેસ્ટ મેચમાં રબાડાએ શાનદાર બોલિંગ કરતાં 4 વિકેટ ઝડપી હતી.આ સાથે જ તેણે ટેસ્ટ ક્રિકેટમાં 350 વિકેટ પૂરી કરવાની મોટી સિદ્ધિ મેળવી છે. ખાસ વાત એ છે કે રબાડા બોલની સંખ્યાની દૃષ્ટિએ ટેસ્ટ ક્રિકેટમાં સૌથી ઝડપી 350 વિકેટ લેનારો વિશ્વનો પ્રથમ બોલર બની ગયો છે.31 વર્ષીય રબાડાએ આ સિદ્ધિ મેળવીને દક્ષિણ આફ્રિકાના દિગ્ગજ બોલર ડેલ સ્ટેન સહિત અનેક મહાન બોલરોને પાછળ છોડી દીધા છે.

રબાડાએ 350 વિકેટ લઈને રચ્યો ઇતિહાસ

ઓસ્ટ્રેલિયા સામે કેપટાઉનમાં રમાતી આ ટેસ્ટ રબાડાની કારકિર્દીની 75મી ટેસ્ટ મેચ છે. 350 વિકેટનો આંકડો પાર કરવા માટે તેને 4 વિકેટની જરૂર હતી. મેચની પ્રથમ ઇનિંગમાં રબાડા માત્ર 1 વિકેટ લઈ શક્યો હતો.જોકે, બીજી ઇનિંગમાં તેણે પોતાની બોલિંગનો જાદુ બતાવ્યો હતો. રબાડાએ બીજી ઇનિંગની શરૂઆતની 4 ઓવરમાં જ ઓસ્ટ્રેલિયાના 3 બેટ્સમેનોને પેવેલિયન ભેગા કર્યા હતા. આ સાથે જ તેણે ટેસ્ટ ક્રિકેટમાં પોતાની 350 વિકેટ પૂરી કરી હતી.

ડેલ સ્ટેનનો રેકોર્ડ તોડ્યો

રબાડાએ માત્ર 13,808 બોલમાં ટેસ્ટ ક્રિકેટમાં 350 વિકેટ પૂરી કરી છે. આ સાથે તેણે દક્ષિણ આફ્રિકાના પૂર્વ ફાસ્ટ બોલર ડેલ સ્ટેનનો રેકોર્ડ તોડી નાખ્યો છે. સ્ટેને 14,719 બોલમાં આ સિદ્ધિ મેળવી હતી.

ઓસ્ટ્રેલિયન બેટિંગ લાઇનઅપના કર્યા કટકા

આ મેચ પહેલા રબાડાને 350 વિકેટના આંકડા સુધી પહોંચવા માટે 4 વિકેટની જરૂર હતી. પ્રથમ ઇનિંગમાં તેને માત્ર 1 જ વિકેટ મળી શકી હતી, પરંતુ બીજી ઇનિંગમાં રબાડાએ કાંગારુઓ પર કેર વર્તાવ્યો હતો. તેણે બીજી ઇનિંગની શરૂઆતની માત્ર 4 ઓવરમાં જ ઓસ્ટ્રેલિયાના 3 ટોપ ઓર્ડર બેટ્સમેનોને પેવેલિયનનો રસ્તો બતાવીને વિકેટોની ટેલી 350 પાર પહોંચાડી દીધી હતી.

દક્ષિણ આફ્રિકા માટે સૌથી ઝડપી 350 વિકેટ લેનારો બીજો બોલર બન્યો 

રબાડા હવે દક્ષિણ આફ્રિકા તરફથી સૌથી ઓછી ટેસ્ટ મેચમાં 350 વિકેટ લેનારા બોલરોની યાદીમાં બીજા સ્થાને પહોંચી ગયો છે. આ યાદીમાં પ્રથમ સ્થાન ડેલ સ્ટેનના નામે છે. સ્ટેને પોતાની કારકિર્દીની 69મી ટેસ્ટ મેચમાં 350 વિકેટ પૂરી કરી હતી.બીજી તરફ, રબાડાએ 75 ટેસ્ટ મેચમાં આ સિદ્ધિ મેળવી છે. આમ, તેણે દક્ષિણ આફ્રિકાના મહાન બોલરોની યાદીમાં પોતાનું નામ વધુ એક વખત નોંધાવ્યું છે.

આ પણ વાંચો – Mohammed Shamiએ હસીન જહાનના ચૂંટણી લડવાના એલાન પર તોડ્યું મૌન!