દેશની રાષ્ટ્રીય રાજધાની દિલ્હીમાં ડુંગળીના વધતા જતા ભાવોથી પરેશાન સામાન્ય જનતા માટે એક મોટા રાહતના સમાચાર સામે આવ્યા છે. બજારોમાં ડુંગળીના ભાવ ૫૫ થી ૬૦ રૂપિયા પ્રતિ કિલોગ્રામ સુધી પહોંચી ગયા હતા, જેને નિયંત્રિત કરવા માટે કેન્દ્ર સરકારે એક મહત્વપૂર્ણ અને મોટું પગલું ભર્યું છે. મહારાષ્ટ્રના નાસિક જિલ્લામાં આવેલા એશિયાના સૌથી મોટા જથ્થાબંધ ડુંગળી બજાર લાસલગાંવથી ૪૫૦ ટન ડુંગળી ભરીને ખાસ ‘કાંદા એક્સપ્રેસ’ માલગાડી દિલ્હી પહોંચી ગઈ છે.
840 ટન કાંદા સાથે ટ્રેન પહોંચી દિલ્હી
21 ડબ્બાવાળી આ ખાસ ટ્રેન બુધવારે બપોરે 3.10 વાગ્યે લાસલગાંવ સ્ટેશનથી દિલ્હી જવા રવાના થઈ હતી અને શુક્રવારે સવારે દિલ્હીના આદર્શ નગર રેલ્વે સ્ટેશને સુરક્ષિત રીતે આવી પહોંચી હતી. લાસલગાંવ સ્ટેશનના મેનેજર પ્રિતેશ દુબેના જણાવ્યા અનુસાર, શહેરી ગ્રાહકોને મોંઘવારીમાંથી મોટી રાહત આપવા માટે કેન્દ્ર સરકારે તેના બફર સ્ટોકમાંથી કુલ 840 ટન ડુંગળી દિલ્હી મોકલવાનો નિર્ધાર કર્યો છે.
ગુરૂવારથી જ 35 રૂ કિલો વેચાણ શરૂ
આ ખાસ ટ્રેનના આગમન સાથે જ કેન્દ્ર સરકારે ગુરુવારથી દિલ્હીમાં માત્ર 35 રૂપિયા પ્રતિ કિલોગ્રામના સબસિડીવાળા અને ડિસ્કાઉન્ટ દરે ડુંગળીનું છૂટક વેચાણ શરૂ કરી દીધું છે. સરકારનો મુખ્ય ઉદ્દેશ્ય બજારમાં ડુંગળીના કૃત્રિમ કે અસામાન્ય વધતા ભાવને રોકવાનો અને સામાન્ય જનતાને પોષણક્ષમ ભાવે ખાદ્ય ચીજવસ્તુઓ પૂરી પાડવાનો છે. અગાઉ દિલ્હીના છૂટક બજારોમાં ગ્રાહકોને ૫૦ રૂપિયા કે તેથી વધુ ભાવે ડુંગળી ખરીદવી પડતી હતી, જેના કારણે રસોડાનું બજેટ ગણું ખોરવાઈ ગયું હતું.
કાંદા એક્સપ્રેસના કારણે ગ્રાહકોને મળશે રાહત
હવે ‘કાંદા એક્સપ્રેસ’ દ્વારા જથ્થાબંધ ડુંગળી ઉપલબ્ધ થવાથી ગ્રાહકોને રાહત મળશે અને બજારમાં કિંમતો સ્થિર થવાની પૂરેપૂરી આશા છે. સરકારની આ સરાહનીય પહેલથી રાજધાનીના નાગરિકોમાં ખુશીની લહેર જોવા મળી રહી છે, કારણ કે હવે તેઓ સસ્તા દરે ગુણવત્તાયુક્ત ડુંગળી ખરીદી શકશે. પ્રશાસન દ્વારા આ ડુંગળીનું વિતરણ વ્યવસ્થિત રીતે થાય તે માટે પણ પૂરતી તૈયારીઓ કરવામાં આવી છે.