શ્રીલંકાના નવા ટેસ્ટ કેપ્ટન કુસલ મેન્ડિસે પાકિસ્તાન સામેની પ્રથમ ટેસ્ટ મેચમાં શાનદાર સદી ફટકારીને ઇતિહાસ રચ્યો છે. રાવલપિંડીમાં રમાઈ રહેલી આ ટેસ્ટમાં મેન્ડિસે 202 બોલમાં 10 ચોગ્ગા અને 4 છગ્ગાની મદદથી 119 રનની યાદગાર ઇનિંગ્સ રમી હતી. આ સાથે જ તેણે વિરાટ કોહલી, જો રૂટ અને શુભમન ગિલ જેવા દિગ્ગજ ખેલાડીઓની ખાસ યાદીમાં સ્થાન મેળવ્યું છે.મેન્ડિસે માત્ર સદી જ ફટકારી નથી, પરંતુ મુશ્કેલ પરિસ્થિતિમાં ટીમને સંભાળીને શ્રીલંકાને મજબૂત સ્થિતિમાં પહોંચાડ્યું છે. તેણે ધનંજય ડી સિલ્વા સાથે મળીને પાંચમી વિકેટ માટે 249 રનની શાનદાર ભાગીદારી પણ કરી હતી.

શ્રીલંકાને મળી 12 રનની સરસાઈ

પાકિસ્તાને પ્રથમ ઇનિંગ્સમાં 9 વિકેટ ગુમાવીને 434 રન બનાવ્યા હતા. તેના જવાબમાં શ્રીલંકાની ટીમે 446 રન બનાવ્યા હતા. આ રીતે શ્રીલંકાને પ્રથમ ઇનિંગ્સના આધારે 12 રનની સરસાઈ મળી હતી.શ્રીલંકા તરફથી ધનંજય ડી સિલ્વાએ 167 રનની શાનદાર ઇનિંગ્સ રમી હતી. જ્યારે કુસલ મેન્ડિસે 119 રન બનાવ્યા હતા. આ ઉપરાંત કમિન્દુ મેન્ડિસે પણ 58 રનનું યોગદાન આપ્યું હતું.બીજા દિવસની રમત પૂરી થઈ ત્યારે પાકિસ્તાને પોતાની બીજી ઇનિંગ્સમાં 1 વિકેટ ગુમાવીને 57 રન બનાવ્યા હતા. હવે મેચમાં બંને ટીમો વચ્ચે રસપ્રદ જંગ જોવા મળી રહ્યો છે.

ટેસ્ટ કેપ્ટન તરીકે પહેલી જ મેચમાં સદી

કુસલ મેન્ડિસે પોતાની પહેલી ટેસ્ટમાં કેપ્ટન તરીકે ઉતરીને સદી ફટકારવાની સિદ્ધિ મેળવી છે. આ સાથે તે શ્રીલંકાના ટેસ્ટ ક્રિકેટ ઇતિહાસમાં કેપ્ટનશિપની શરૂઆતની મેચમાં સદી ફટકારનાર પ્રથમ ખેલાડી બન્યો છે.આ પહેલાં દુનિયાના અનેક દિગ્ગજ ખેલાડીઓ પોતાની પ્રથમ ટેસ્ટ કેપ્ટનશિપમાં સદી ફટકારી ચૂક્યા છે.

આંતરરાષ્ટ્રીય ક્રિકેટમાં 13 હજાર રન પૂરા

પાકિસ્તાન સામેની આ શાનદાર ઇનિંગ્સ દરમિયાન કુસલ મેન્ડિસે આંતરરાષ્ટ્રીય ક્રિકેટમાં પોતાના 13,000 રન પણ પૂરા કર્યા છે. આ સિદ્ધિ મેળવનાર તે શ્રીલંકાનો આઠમો બેટ્સમેન બન્યો છે.શ્રીલંકા માટે આંતરરાષ્ટ્રીય ક્રિકેટમાં સૌથી વધુ રન બનાવવાનો રેકોર્ડ કુમાર સંગાકારાના નામે છે. તેમણે પોતાની કારકિર્દીમાં કુલ 27,757 રન બનાવ્યા હતા.

આ પણ વાંચો – IND vs NZ: ચોથી વનડેમાં મોટો ફેરફાર! ભારત-ન્યૂઝીલેન્ડની ટીમમાં 9 નવા ખેલાડીઓની એન્ટ્રી