પાટણ જિલ્લાના શંખેશ્વર તાલુકાના મનવરપુરા ગામની સીમમાંથી એલ.સી.બી. પાટણની ટીમે દેશી દારૂ ગાળવાની ચાલુ ભઠ્ઠી ઝડપી પાડી છે. આ કાર્યવાહીમાં એક આરોપીની ધરપકડ કરવામાં આવી છે. પોલીસે સ્થળ પરથી દારૂ, દારૂ ગાળવાનો વોશ અને ભઠ્ઠીના સાધનો સહિત કુલ ₹1,56,250નો મુદ્દામાલ જપ્ત કર્યો છે. પાટણ પોલીસ અધિક્ષક વી.કે.નાયી દ્વારા જિલ્લામાં દારૂ અને જુગારની ગેરકાયદે પ્રવૃત્તિઓ રોકવા સૂચનાઓ આપવામાં આવી હતી. આ સૂચનાના આધારે, એલ.સી.બી. પાટણના પોલીસ ઇન્સપેક્ટર આર.જી.ઉનાગરના માર્ગદર્શન હેઠળ પોલીસ સ્ટાફ શંખેશ્વર વિસ્તારમાં પેટ્રોલિંગ કરી રહ્યો હતો. પેટ્રોલિંગ દરમિયાન મળેલી બાતમીના આધારે, મનવરપુરા ગામે અજીતજી વશરામજી ઠાકોરના ખેતરમાં દારૂ અંગે રેડ કરવામાં આવી હતી. રેડ દરમિયાન, દેશી દારૂ ગાળવાની ચાલુ ભઠ્ઠીએથી અજીતજી વશરામજી ઠાકોર (રહે. મનવરપુરા, તા. શંખેશ્વર, જી. પાટણ) ને ઝડપી લેવામાં આવ્યો હતો. પોલીસે સ્થળ પરથી 5560 લીટર દેશી દારૂ ગાળવાનો વોશ (કિંમત ₹1,38,250) અને 90 લીટર દેશી દારૂ (કિંમત ₹18,000) જપ્ત કર્યો હતો. આ ઉપરાંત, દારૂ ઉકાળવા માટેના પીપ, ચાડા, લાકડાં અને નળી જેવા સાધનો પણ કબ્જે કરવામાં આવ્યા હતા. પકડાયેલા આરોપી અને જપ્ત કરાયેલા મુદ્દામાલ સામે કાયદેસરની કાર્યવાહી હાથ ધરી, વધુ તપાસ માટે શંખેશ્વર પોલીસ સ્ટેશનને સોંપવામાં આવ્યા છે.