દેશભરમાં ઘરેલુ LPG ગેસ સિલિન્ડરનો ઉપયોગ કરતા કરોડો લોકો માટે મહત્વના સમાચાર છે. 1 ઓક્ટોબર 2026થી સબસિડીવાળા ઘરેલુ LPG રિફિલ માટે આધાર બાયોમેટ્રિક ઓથેન્ટિકેશન (BAA) જરૂરી બનશે. જે ગ્રાહકોએ હજુ સુધી આ પ્રક્રિયા પૂરી કરી નથી, તેઓએ સબસિડી સાથે સિલિન્ડર બુક કરવા માટે BAA પૂર્ણ કરવું પડશે. જોકે, સરકારના જણાવ્યા મુજબ BAA ન કરાવવાથી LPG સપ્લાય સંપૂર્ણપણે બંધ થશે નહીં.
1 ઓક્ટોબરથી શું બદલાશે?
સરકારના નવા નિયમ મુજબ, 1 ઓક્ટોબરથી સબસિડી સાથે નિયંત્રિત રિટેલ વેચાણ કિંમત (RSP) પર ઘરેલુ LPG રિફિલ બુક કરવા માટે આધાર બાયોમેટ્રિક ઓથેન્ટિકેશન જરૂરી રહેશે. જે ગ્રાહકોએ પહેલેથી BAA પૂર્ણ કરી લીધું છે, તેમને ફરીથી ઓથેન્ટિકેશન કરાવવાની જરૂર નથી અને તેમનું રિફિલ પહેલાની જેમ ચાલુ રહેશે. જે ઘરેલુ LPG ગ્રાહકોએ BAA પૂર્ણ કર્યું નથી, તેમના માટે ઓથેન્ટિકેશન પૂર્ણ થયા બાદ જ સબસિડી સાથે RSP પર રિફિલ બુકિંગની સુવિધા શરૂ થશે. એટલે કે BAA પૂર્ણ ન હોય ત્યાં સુધી સબસિડીવાળા દરે રિફિલ બુક કરવામાં મુશ્કેલી પડી શકે છે.
ઘરે બેઠા કેવી રીતે કરશો આધાર ઓથેન્ટિકેશન?
સરકારના જણાવ્યા મુજબ, જે ગ્રાહકો BAA કરાવવા ઇચ્છતા નથી અથવા કરી શકતા નથી, તેમને પણ LPG મળી શકશે. તેમણે પોતાની પસંદગી OMCના વેબ પોર્ટલ, મોબાઇલ એપ, WhatsApp ચેટબોટ અથવા IVRS જેવા ઉપલબ્ધ માધ્યમથી નોંધાવવાની રહેશે. આવા ગ્રાહકોને સ્થાનિક ઉપલબ્ધતા મુજબ 5 અથવા 10 કિલોના સિલિન્ડર બજાર ભાવે, સબસિડી વગર મળી શકે છે. જો તમે હજુ સુધી BAA પૂર્ણ કર્યું નથી, તો ગેસ એજન્સી જવું જરૂરી નથી. તમે તમારી ગેસ કંપનીની મોબાઇલ એપ દ્વારા ઘરે બેઠા પ્રક્રિયા પૂર્ણ કરી શકો છો. Indane ગ્રાહકો IndianOil ONE, Bharatgas ગ્રાહકો HelloBPCL અને HP Gas ગ્રાહકો HP PAY એપનો ઉપયોગ કરી શકે છે. આ ઉપરાંત સિલિન્ડરની ડિલિવરી વખતે અથવા ગેસ વિતરકના શોરૂમ પર જઈને પણ ઓથેન્ટિકેશન કરાવી શકાય છે.
નવો નિયમ શા માટે લાગુ થઈ રહ્યો છે?
સરકારના જણાવ્યા મુજબ, BAAનો હેતુ સબસિડીનો લાભ માત્ર સાચા અને પાત્ર ગ્રાહકો સુધી પહોંચાડવાનો છે. આધાર ઓથેન્ટિકેશનથી ડુપ્લિકેટ અને અપાત્ર ગેસ કનેક્શનની ઓળખ કરવામાં તથા સબસિડીવાળા ઘરેલુ સિલિન્ડરના વ્યાવસાયિક અને ઔદ્યોગિક ઉપયોગને રોકવામાં મદદ મળશે.
LPG ગ્રાહકોએ હવે શું કરવું?
19 સપ્ટેમ્બર 2026 સુધીમાં 27.43 કરોડ સક્રિય ઘરેલુ LPG ગ્રાહકોએ BAA પૂર્ણ કરી લીધી હતી, જે કુલ ગ્રાહકોના 89.9 ટકા છે. જેમણે BAA પૂર્ણ કરી લીધી છે, તેમને ફરીથી આ પ્રક્રિયા કરવાની જરૂર નથી. જો તમે ઘરેલુ LPG સિલિન્ડર પર સબસિડીનો લાભ લો છો, તો સૌથી પહેલા તમારું આધાર બાયોમેટ્રિક ઓથેન્ટિકેશન પૂર્ણ થયું છે કે નહીં તે તપાસો. જો BAA હજુ પૂર્ણ ન થયું હોય, તો 1 ઓક્ટોબર 2026 પહેલાં ઉપલબ્ધ માધ્યમોમાંથી કોઈ એક દ્વારા પ્રક્રિયા પૂર્ણ કરી લેવી યોગ્ય રહેશે, જેથી સબસિડી સાથે LPG રિફિલ બુક કરવામાં મુશ્કેલી ન પડે.
આ પણ વાંચો: ઉજ્જવલા યોજનાના સક્રિય ગ્રાહકોમાં આશરે 6 લાખનો ઘટાડો, LPGના 62 લાખ ઘટ્યા