મહીસાગર જિલ્લામાંથી ધાર્મિક આસ્થા સાથે ચેડા કરતી અને દિલ કંપાવનારી એક ઘટના સામે આવી છે. જિલ્લાના શ્રદ્ધાળુ વડીલોને ધાર્મિક યાત્રાએ લઈ જવાની લાલચ આપીને તેમની સાથે રૂ. 5.08 લાખની મસમોટી છેતરપિંડી કરવામાં આવી છે. પ્રાપ્ત વિગતો મુજબ, એક શખ્સ દ્વારા 121 જેટલા સિનિયર સિટીઝનોને નિશાન બનાવવામાં આવ્યા હતા અને તેમની પાસેથી યાત્રાના ખર્ચ પેટે પ્રતિ વ્યક્તિ 4,200 રૂપિયા જેટલી માતબર રકમ ઉઘરાવવામાં આવી હતી. વડીલોએ પોતાની શ્રદ્ધા અને ઉત્સાહ સાથે આ નાણાં ચૂકવ્યા હતા, પરંતુ અંતે યાત્રા શરૂ થવાના સમયે આયોજક નાણાં લઈને ફરાર થઈ જતાં સમગ્ર મામલો પ્રકાશમાં આવ્યો હતો.

વડીલોની આસ્થા સાથે વિશ્વાસઘાત

ધાર્મિક યાત્રાએ જવાની આશાએ બેઠેલા આ વૃદ્ધ નાગરિકો સાથે થયેલા આ વિશ્વાસઘાતને કારણે ભારે નિરાશા વ્યાપી ગઈ છે. જીવનના આ તબક્કે ધાર્મિક સ્થળોના દર્શન કરવાની ઇચ્છા ધરાવતા અસંખ્ય વડીલોને આ ઠગે પોતાની છેતરપિંડીનો ભોગ બનાવ્યા છે. પૈસા પડાવ્યા બાદ આરોપીએ ફોન બંધ કરી દીધા હતા અને ભૂગર્ભમાં ઉતરી ગયો હતો, જેના કારણે કુલ 5.08 લાખ રૂપિયાની રકમ ફસાઈ ગઈ છે અને શ્રદ્ધાળુઓ પોતપોતાની રીતે ઠગાઈનો ભોગ બન્યા હોવાનું સમજીને હચમચી ગયા હતા.

પોલીસ દ્વારા તપાસ શરૂ

આ અસહ્ય છેતરપિંડીથી પીડિત બનેલા તમામ વડીલોએ એકઠા થઈને લુણાવાડા પોલીસ મથકનો સંપર્ક સાધ્યો હતો અને લેખિત અરજી આપી હતી. પોલીસ સમક્ષ હાજર રહીને આ વડીલોએ પોતાની હૈયાફાટ વેદના ઠાલવી હતી અને પોતાની પરસેવાની કમાણી પર પાણી ફેરવનાર આરોપી સામે કડક કાનૂની કાર્યવાહી કરવાની માંગ કરી હતી. લુણાવાડા પોલીસે વડીલોની અરજીને અત્યંત ગંભીરતાથી લઈને આરોપીને શોધી કાઢવા અને નાણાં પરત અપાવવા માટે ટેક્નિકલ સર્વેલન્સ તથા અન્ય માધ્યમોથી સઘન તપાસના ચક્રો ગતિમાન કર્યા છે.

આ પણ વાંચો : Bopal Hit And Run Case : નશામાં હતો કે કેમ? બ્લડ ટેસ્ટના ખુલાસા વિના જ જામીન મળતા પોલીસની કામગીરી સામે સવાલો…