Vansh Bedi Breaks Silence: દિલ્હીના ક્રિકેટર વંશ બેદીએ કોઈપણ પ્રકારની મેચ ફિક્સિંગ સાથે જોડાયેલી પ્રવૃત્તિમાં સામેલ ન હોવાનો દાવો કર્યો છે. તાજેતરમાં એક સટ્ટાબાજનું સ્ટિંગ ઓપરેશન કરવામાં આવ્યું હતું, જેને ચેન્નાઈ સુપર કિંગ્સના પૂર્વ ખેલાડી સાથે જોડાયેલું હોવાનું જણાવવામાં આવ્યું હતું. દાવો કરવામાં આવ્યો હતો કે આ ખેલાડી પૈસાના બદલામાં ટીમની પ્લેઇંગ-11 સાથે જોડાયેલી માહિતી લીક કરતો હતો, જે ICCના એન્ટી કરપ્શન નિયમોની વિરુદ્ધ છે. આ પછી વંશ બેદીનું નામ વિવાદમાં આવ્યું હતું, પરંતુ હવે તેમણે આ મામલે સ્પષ્ટતા કરી છે.

શું છે સમગ્ર મામલો?

તહલકાના રિપોર્ટ મુજબ, પૂર્વ રણજી ટ્રોફી ક્રિકેટર રચિત ભાટિયાએ એક પત્રકારને જણાવ્યું હતું કે, IPL 2025 દરમિયાન તેમણે ચેન્નાઈ સુપર કિંગ્સની પ્લેઇંગ-11 લંડનમાં હાજર એક સટ્ટાબાજ સાથે શેર કરીને 5 મેચ ફિક્સ કરી હતી. તેમણે દાવો કર્યો હતો કે ટીમની અંદરથી તેમને માહિતી મળતી હતી. ભાટિયાનો દાવો છે કે દિલ્હી પ્રીમિયર લીગ દરમિયાન પણ તેઓ આવી પ્રવૃત્તિઓમાં સામેલ હતા. રિપોર્ટમાં CSKના ક્રિકેટરનો ઉલ્લેખ કરવામાં આવ્યો હતો, પરંતુ કોઈ નામ સામે આવ્યું ન હતું.

DDCAએ શું કહ્યું?

દિલ્હી એન્ડ ડિસ્ટ્રિક્ટ ક્રિકેટ એસોસિએશને થોડા કલાકો બાદ સ્પષ્ટતા કરતા જણાવ્યું હતું કે વંશ બેદીએ તેમને પાડોશી રાજ્યના એક ખેલાડીને મેચ ફિક્સિંગ માટે સંપર્ક કરવામાં આવ્યો હોવાની જાણકારી આપી હતી. ત્યારબાદ DDCAએ આ માહિતી BCCI સાથે શેર કરી હતી. આ પછી વંશ બેદીનું નામ દરેક જગ્યાએ આવવા લાગ્યું અને ઘણા લોકો તેમને મેચ ફિક્સિંગ સાથે જોડાયેલી પ્રવૃત્તિનો ભાગ માનવા લાગ્યા હતા. જોકે, વંશ બેદીનું કહેવું છે કે એવું કંઈ નથી.

વંશ બેદીએ આરોપો પર શું કહ્યું?

વંશ બેદીએ સોશિયલ મીડિયા પર કહ્યું, “હું જણાવવા માગું છું કે સોશિયલ મીડિયા અને વેબસાઇટ્સ પર મારા વિરુદ્ધ ફેલાવવામાં આવતી ખબરો ખોટી છે. હું સ્પષ્ટપણે કહેવા માગું છું કે પૂર્વ રણજી ટ્રોફી ક્રિકેટર રચિત ભાટિયાએ તહલકા સ્ટિંગ ઓપરેશનમાં CSK ખેલાડીના મેચ ફિક્સિંગ સાથે જોડાયેલા મામલા વિશે જણાવ્યું હતું. તે મામલા સાથે મારો કોઈ સંબંધ નથી અને હું તે વ્યક્તિ નથી. મને આ આરોપો સાથે જોડવામાં આવવું માનહાનિ છે. મારી લીગલ ટીમ ખોટા સમાચાર ફેલાવનારાઓ વિરુદ્ધ સિવિલ અને ક્રિમિનલ કાર્યવાહી કરવા માટે તૈયાર છે. હું દરેકને વિનંતી કરું છું કે આ પ્રકારના ખોટા સમાચાર ફેલાવવાથી દૂર રહે.”

CSK માટે ક્યારેય ડેબ્યૂ કર્યું નથી

અલ્મોડા, ઉત્તરાખંડના વંશ બેદી બાળપણમાં ક્રિકેટમાં કરિયર બનાવવા માટે દિલ્હી આવ્યા હતા. 2024માં તેમણે દિલ્હી પ્રીમિયર લીગમાં સારું પ્રદર્શન કર્યું હતું, જેના કારણે તેમને IPL 2025ની હરાજીમાં ચેન્નાઈ સુપર કિંગ્સે 55 લાખ રૂપિયામાં પોતાની ટીમમાં સામેલ કર્યા હતા. જોકે, CSK માટે તેમને ડેબ્યૂ કરવાની તક મળી નહોતી. ટખાની ઈજાના કારણે તેઓ અડધી સિઝનથી બહાર થઈ ગયા હતા અને ત્યારબાદ IPL 2026 પહેલાં CSKએ તેમને રિલીઝ કરી દીધા હતા.

આ પણ વાંચો: શું IPL 2027માં રમશે એમએસ ધોની?, CSK ડ્રેસિંગ રૂમની અંદરની વાત આવી સામે