મેરઠના ચકચારી અને કમકમાટીભર્યા સૌરભ રાજપૂત હત્યા કેસમાં અદાલતે આખરે મોટો ન્યાયિક ચુકાદો આપીને હત્યારી પત્ની મુસ્કાન રસ્તોગી અને તેના પ્રેમી સાહિલ શુક્લાને દોષિત ઠેરવીને મૃત્યુદંડની આકરી સજા ફટકારી છે. જે પતિની નિર્દયતાપૂર્વક હત્યા કરી લાશના ટુકડા નીલા ડ્રમમાં છુપાવી દીધા હતા, તે મામલે ન્યાયાધીશ સમક્ષ રડી પડેલા બંને ગુનેગારોને આખરે ફાંસી થઈ છે.

સૌરભ રાજપૂતે મુસ્કાન સાથે પ્રેમ લગ્ન કર્યા હતા

મેરઠના ચકચારી બ્રહ્મપુરી હત્યાકાંડની પૃષ્ઠભૂમિ તપાસવામાં આવે તો આ લોહિયાળ ઘટનાની શરૂઆત વર્ષો પહેલાં થયેલા પ્રેમ સંબંધ અને ત્યારબાદ ઊભા થયેલા પારિવારિક તણાવ સાથે જોડાયેલી છે. મૃતક સૌરભ રાજપૂતે વર્ષ 2016માં મુસ્કાન રસ્તોગી સાથે પ્રેમ લગ્ન કર્યા હતા અને પ્રારંભિક સમયમાં બંનેનું દાંપત્યજીવન રાબેતા મુજબ ચાલતું હતું. 

પરસ્પર સંમતિથી અલગ રહેવા લાગ્યા

જોકે થોડા જ વર્ષોમાં બંને વચ્ચે ગંભીર મતભેદો અને પારિવારિક વિવાદો સર્જાવા લાગ્યા હતા, જેના પરિણામે વર્ષ 2019માં સૌરભ અને મુસ્કાન પરસ્પર સંમતિથી અલગ રહેવા લાગ્યા હતા. આ જ વર્ષ દરમિયાન મુસ્કાને પોતાની વહાલી પુત્રી પીહૂને જન્મ આપ્યો હતો, જે પુત્રી હાલમાં તેના નાના અને નાનીના ઘરે રહીને પોતાનું જીવન વિતાવી રહી છે. 

મુસ્કાનની મુલાકાત જૂના સહપાઠી સાહિલ શુક્લા સાથે થઈ

આ ગાળા દરમિયાન મુસ્કાનની મુલાકાત તેની શાળા વખતના જૂના સહપાઠી સાહિલ શુક્લા સાથે થઈ હતી અને બંને વચ્ચે ફરીથી નિયમિત વાતચીતનો દોર શરૂ થયો હતો. બીજી બાજુ બંને પક્ષના પરિવારજનોએ આગળ આવીને મધ્યસ્થી કરી હતી અને સૌરભ તથા મુસ્કાન વચ્ચે સમાધાન કરાવી આપીને બંનેને ફરીથી સાથે રહેવા માટે તૈયાર કર્યા હતા. પરિવારમાં થયેલા આ સમાધાન બાદ સૌરભ પોતાના ઘરનું ગુજરાન ચલાવવા અને પરિવારના આર્થિક ભવિષ્યને સુરક્ષિત કરવા માટે નોકરી અર્થે વિદેશ એટલે કે લંડન ચાલ્યો ગયો હતો. 

મુસ્કાન અને સાહિલ નજીક આવ્યા

જોકે સૌરભ લંડન ગયો તે સમયગાળા દરમિયાન ભારતમાં મુસ્કાન અને તેનો જૂનો સ્કૂલમિત્ર સાહિલ શુક્લા અત્યંત નજીક આવી ગયા હતા અને તેમની વચ્ચે ગેરકાયદે પ્રેમ સંબંધ બંધાઈ ગયો હતો. લંડનમાં રહેતા સૌરભની સંપૂર્ણ ગેરહાજરીમાં મુસ્કાન અને સાહિલનો આ ગેરકાયદે સંબંધ દિનપ્રતિદિન વધુ ગાઢ અને બેફામ બનતો ગયો હતો. 

વિદેશથી સૌરભ પરત ફર્યો

લાંબો સમય વિદેશમાં રહ્યા પછી સૌરભ રાજપૂત 24 ફેબ્રુઆરી, 2025ના રોજ લંડનથી ભારત પોતાના ઘરે મેરઠ પરત ફર્યો હતો. પતિ લંડનથી પરત ફરતાં જ પત્ની મુસ્કાને બીજા દિવસે એટલે કે 25 ફેબ્રુઆરીના રોજ સૌરભના ઘેર આગમનની ખુશી વ્યક્ત કરવા માટે ઘરમાં એક ભવ્ય પાર્ટીનું આયોજન કર્યું હતું. આ પછી થોડા દિવસો બાદ એટલે કે 28 ફેબ્રુઆરીના રોજ સમગ્ર પરિવારે સાથે મળીને દીકરી પીહૂનો જન્મદિવસ પણ અત્યંત ઉત્સાહભેર ઉજવ્યો હતો. પરંતુ આ દેખીતી ખુશીની પાછળ મુસ્કાન અને તેના પ્રેમી સાહિલના મનમાં એક અત્યંત ખતરનાક ષડયંત્ર આકાર લઈ રહ્યું હતું, કારણ કે સૌરભના પાછા આવવાથી તેમના આડા સંબંધોમાં મોટો અવરોધ ઊભો થઈ રહ્યો હતો અને તેમણે સૌરભને કાયમ માટે ખતમ કરવાનો નિર્ણય કર્યો હતો.

ત્યારબાદ ઘટનાક્રમે લોહિયાળ વળાંક લીધો

પોતાના આડા સંબંધોને અવરોધમુક્ત રાખવા માટે ઘડાયેલા ક્રૂર કાવતરા મુજબ 3 માર્ચ, 2025ના રોજ સમગ્ર ઘટનાક્રમે લોહિયાળ વળાંક લીધો હતો. તે રાત્રે મુસ્કાને રાત્રિભોજન વખતે સૌરભને પીરસવામાં આવતી શાકભાજીની વાનગીમાં ઘેનની દવા અથવા નશીલું પ્રવાહી ભેળવી દીધું હતું. આ નશીલું ભોજન આરોગ્યા બાદ સૌરભ જ્યારે અર્ધબેભાન અને ગાઢ નિંદ્રામાં સરી પડ્યો, ત્યારે મુસ્કાને પૂર્વઆયોજિત કાવતરા અનુસાર ફોન કરીને પોતાના પ્રેમી સાહિલ શુક્લાને ઘરમાં બોલાવી લીધો હતો. 

સૌરભ પર તીક્ષ્ણ છરી વડે આડેધડ ઘાતકી હુમલો કર્યો

ઘરમાં પ્રવેશતા જ બંનેએ મળીને સૌરભ પર તીક્ષ્ણ છરી વડે આડેધડ ઘાતકી હુમલો કરી દીધો હતો અને તેના હૃદય તથા ગળાના ભાગે ઉપરાઉપરી જીવલેણ ઘા ઝીંકીને નિર્દયતાપૂર્વક તેની હત્યા કરી નાખી હતી. હત્યા કર્યા બાદ પોતાના પાપને છુપાવવા અને પુરાવાનો કાયમ માટે નાશ કરવાના ઈરાદે બંનેએ ઈન્દિરા નગરની ગલીઓમાં આવેલા આ મકાનમાં જ સૌરભના મૃતદેહના ટુકડા કરવાનું શરૂ કર્યું હતું.

મૃતદેહના ટુકડા કરી નીલા રંગના પ્લાસ્ટિકના ડ્રમમાં ઠાંસી દીધા

તેમણે સૌરભના મૃતદેહના ટુકડા કરીને એક મોટા નીલા રંગના પ્લાસ્ટિકના ડ્રમમાં ઠાંસી દીધા હતા. લાશમાંથી દુર્ગંધ ન આવે અને કોઈને પણ આ ભયાનક હત્યાકાંડની ગંધ ન આવે તે માટે તેમણે નીલા ડ્રમની અંદર સિમેન્ટનું પ્રવાહી ઘોળ રેડીને લાશના તમામ ટુકડાઓને સિમેન્ટથી ઢાંકી દઈને ડ્રમને સંપૂર્ણપણે સીલ કરી દીધું હતું. 

મુસ્કાન અને સાહિલ હિમાચલ ગયા

આ અરેરાટીભર્યા ગુનાને અંજામ આપ્યા બાદ 4 માર્ચના રોજ મુસ્કાન પોતાની માસૂમ પુત્રી પીહૂને પોતાની માતાના ઘરે એટલે કે બાળકીના નાના-નાની પાસે મૂકી આવી હતી. પુત્રીને ત્યાં છોડ્યા બાદ મુસ્કાન અને તેનો હત્યારો પ્રેમી સાહિલ બંને કોઈ જ પસ્તાવા વિના હિમાચલ પ્રદેશ ફરવા માટે રવાના થઈ ગયા હતા. લાશ ડ્રમમાં સિમેન્ટ વચ્ચે બંધ પડી રહી અને આ બંને આરોપીઓ હિમાચલની ખીણોમાં મોજમાણી કરી રહ્યા હતા. 

સમગ્ર લોહિયાળ હત્યાકાંડની કબૂલાત કરી 

છેવટે 17 માર્ચે બંને હિમાચલથી મેરઠ પરત ફર્યા હતા અને મુસ્કાને પોતાના પિયર પહોંચીને માતા-પિતા સમક્ષ આ સમગ્ર લોહિયાળ હત્યાકાંડની કબૂલાત કરી લીધી હતી. મુસ્કાનની આ ભયાનક કબૂલાત સાંભળીને પરિવારજનો સ્તબ્ધ થઈ ગયા હતા અને આખરે 18 માર્ચે આ સમગ્ર મામલાનો પર્દાફાશ થયો હતો. 

નીલા ડ્રમમાંથી સૌરભનો ક્ષત-વિક્ષત મૃતદેહ મળી આવ્યો

માહિતી મળતા જ પોલીસ તુરંત ઈન્દિરા નગર સ્થિત મકાન પર પહોંચી હતી, જ્યાં તપાસ દરમિયાન બંધ ઘરમાંથી સિમેન્ટ ભરેલા નીલા ડ્રમમાંથી સૌરભનો ક્ષત-વિક્ષત મૃતદેહ મળી આવ્યો હતો. પોલીસે ઘટનાસ્થળેથી ડ્રમ કબજે કરીને 19 માર્ચે મુસ્કાન રસ્તોગી અને સાહિલ શુક્લા બંનેની સત્તાવાર ધરપકડ કરીને તેમને જેલમાં ધકેલી દીધા હતા. પોલીસે બંને આરોપીઓને આમને-સામને બેસાડીને આકરી પૂછપરછ હાથ ધરી હતી અને સાથે જ સૌરભના મૃતદેહના તમામ ટુકડાઓનું પેનલ ડોક્ટરો દ્વારા વિગતવાર પોસ્ટમોર્ટમ કરાવવામાં આવ્યું હતું.

પોલીસે 1,000 પાનાની ચાર્જશીટ દાખલ કરી

આ ભયાનક હત્યાકાંડની ઊંડાણપૂર્વક તપાસ પૂર્ણ કરીને પોલીસે 12 મેના રોજ અદાલતમાં 1,000 પાનાની વિસ્તૃત ચાર્જશીટ દાખલ કરી હતી, જેમાં કુલ 34 જેટલા સાક્ષીઓનો સમાવેશ કરવામાં આવ્યો હતો. આ ચાર્જશીટમાં પોલીસ તપાસ દરમિયાન સામે આવેલા તમામ મહત્વના તથ્યો અને સાક્ષીઓના નિવેદનોના આધારે ગુનાની એક-એક કડી જોડવામાં આવી હતી. ત્યારબાદ 17 જૂનના રોજ કોર્ટ દ્વારા મુસ્કાન અને સાહિલ સામે હત્યા તેમજ પુરાવાનો નાશ કરવાના ગંભીર આરોપો નક્કી કરવામાં આવ્યા હતા. 

કોર્ટમાં મહત્વની જુબાની લેવામાં આવી

જુલાઈ 2025થી મેરઠ જિલ્લા અદાલતમાં આ કેસનો સત્તાવાર ટ્રાયલ શરૂ થયો હતો, જેમાં 4 જુલાઈના રોજ સૌરભના ભાઈ બબલૂની કોર્ટમાં મહત્વની જુબાની લેવામાં આવી હતી. જુલાઈથી નવેમ્બર દરમિયાન મૃતકના પરિવારજનો, પોલીસકર્મીઓ, તબીબો, ડાન્સર તેમજ જેની પાસેથી નીલું ડ્રમ ખરીદાયું હતું તે ડ્રમ વેચનાર વેપારી સહિતના તમામ મહત્વપૂર્ણ સાક્ષીઓની જુબાનીઓ નોંધવામાં આવી હતી. 

બંને આરોપીઓ ધ્રૂસકે ને ધ્રૂસકે રડી પડ્યા

આ સમગ્ર કેસ ટ્રાયલ પર આવ્યાના 577 દિવસ બાદ 30 સપ્ટેમ્બરના રોજ અદાલતે બંને આરોપીઓને સૌરભની હત્યામાં દોષિત ઠેરવ્યા હતા. સજાની સુનાવણી વખતે જેલમાંથી વિડીયો કોન્ફરન્સિંગ દ્વારા મુસ્કાન અને સાહિલને અદાલત સમક્ષ રજૂ કરવામાં આવ્યા ત્યારે બંને આરોપીઓ ધ્રૂસકે ને ધ્રૂસકે રડી પડ્યા હતા. 

મુસ્કાન જેલના સળિયા પાછળ ધ્રૂજી ઊઠી

ન્યાયાધીશે મુસ્કાનની સામે જોઈને સીધો સવાલ પૂછ્યો કે તું તારા પતિ સૌરભ રાજપૂતની હત્યામાં દોષિત ઠરી છે, તું પોતાના માટે શું સજા ઈચ્છે છે? ત્યારે પોતાના જ પતિની ગરદન કાપતી વખતે જરાય ન કાંપેલી મુસ્કાન જેલના સળિયા પાછળ ધ્રૂજી ઊઠી હતી અને તેણે ગળગળા થઈને કહ્યું કે મારી બંને દીકરીઓ ઘણી નાની છે, તેમની સંભાળ રાખવામાં આવે અને મને ઓછામાં ઓછી સજા આપવામાં આવે. આટલું કહીને તે માથું ઝુકાવીને ગહન શાંતિમાં ડૂબી ગઈ હતી. ત્યારબાદ અદાલતે તેના પ્રેમી સાહિલ શુક્લાને આ જ સવાલ પૂછ્યો ત્યારે તેનો અહંકાર પણ ઓગળી ગયો હતો અને તેણે પણ કાંપતા અવાજે માત્ર એટલું જ કહ્યું કે સાહેબ, મને પણ ઓછામાં ઓછી સજા આપો. 

ફાંસીની આકરી સજા ફટકારી

આ પછી અદાલતના ખંડમાં ભારે સોપો પડી ગયો હતો. એક નિર્દોષ યુવકના ટુકડા કરનાર આ પ્રેમી યુગલ કાયદાના ડરથી ધ્રૂજી રહ્યું હતું. અદાલતે આ કૃત્યને અતિ ઘાતકી ગણીને મુસ્કાન અને સાહિલ બંનેને મૃત્યુદંડ એટલે કે ફાંસીની આકરી સજા ફટકારી દીધી હતી. 

આ પણ વાંચો    :   Rajkot : 2 વર્ષની બાળકીનું પડી જવાથી મોત નહીં પણ હત્યા થયાનો ખુલાસો, કોઈએ ધક્કો માર્યાનું તપાસમાં ખુલ્યું