પાકિસ્તાનના સ્ટાર બેટર મોહમ્મદ રિઝવાનનો મોબાઇલ ફોન છેલ્લા લગભગ 4 અઠવાડિયાથી તપાસ એજન્સી પાસે છે. હવે રિઝવાને આ મામલે ઔપચારિક રીતે પગલું ભર્યું છે. તેમણે નેશનલ સાયબર ક્રાઇમ ઇન્વેસ્ટિગેશન એજન્સી એટલે કે NCCIAને પત્ર લખીને પોતાનો મોબાઇલ ફોન પરત કરવાની માંગ કરી છે.રિઝવાને એજન્સી પાસે એ પણ સ્પષ્ટતા માંગી છે કે તેમની સામે કયા ચોક્કસ મામલાની તપાસ ચાલી રહી છે. આ ઉપરાંત તેમણે પૂછ્યું છે કે તેમને આગળની પૂછપરછ માટે ક્યારે અને કયા હેતુથી NCCIA સમક્ષ હાજર થવાનું રહેશે.

31 ઓગસ્ટે ઇંગ્લેન્ડમાં લેવાયો હતો ફોન

રિઝવાનના જણાવ્યા મુજબ, 31 ઓગસ્ટે ઇંગ્લેન્ડમાં લોર્ડ્સ ખાતે પાકિસ્તાન અને ઇંગ્લેન્ડ વચ્ચેની ટેસ્ટ મેચ બાદ તેમનો મોબાઇલ ફોન લેવામાં આવ્યો હતો. તે સમયે તેમને કહેવામાં આવ્યું હતું કે ફોન લગભગ 3 કલાકમાં પરત આપી દેવામાં આવશે.પરંતુ 3 કલાકની જગ્યાએ લગભગ 4 અઠવાડિયા વીતી ગયા હોવા છતાં તેમનો ફોન પરત કરવામાં આવ્યો નથી. હવે રિઝવાને NCCIAને પત્ર લખીને આ અંગે સ્પષ્ટ જવાબ માગ્યો છે.

લાહોર હાઇકોર્ટના નિર્ણય બાદ પત્ર સામે આવ્યો

રિઝવાનનો આ પત્ર લાહોર હાઇકોર્ટના તાજેતરના નિર્ણયના લગભગ 2 અઠવાડિયા બાદ સામે આવ્યો છે. રિઝવાને કોર્ટમાં અરજી કરીને દાવો કર્યો હતો કે NCCIAને આ મામલાની તપાસ કરવાનો અધિકાર નથી.કોર્ટે તેમની અરજી ફગાવી દીધી હતી. જોકે, કોર્ટે રિઝવાનને તપાસમાં સહયોગ આપવા જણાવ્યું હતું. સાથે જ NCCIAને પણ નિર્દેશ આપ્યો હતો કે તપાસ દરમિયાન રિઝવાનને કોઈ પ્રકારની બિનજરૂરી પરેશાની ન થવી જોઈએ.કોર્ટે એ પણ જણાવ્યું હતું કે એજન્સીએ પોતાની પાસે રાખેલી વસ્તુઓ, ખાસ કરીને મોબાઇલ ફોન પરત મેળવવા માટે રિઝવાન સંબંધિત અધિકારક્ષેત્ર ધરાવતી કોર્ટનો સંપર્ક કરી શકે છે.

રિઝવાને પૂછ્યું- તપાસ કયા મામલે થઈ રહી છે?

પોતાના પત્રમાં રિઝવાને કહ્યું છે કે કોર્ટના નિર્દેશો બાદ પણ NCCIA તરફથી અત્યાર સુધી તેમનો સંપર્ક કરવામાં આવ્યો નથી.તેમણે એજન્સી પાસે લેખિતમાં જણાવવાની માંગ કરી છે કે તેમની સામે કઈ ઘટના અથવા કયા ચોક્કસ મામલાને લઈને તપાસ ચાલી રહી છે. સાથે જ તેમણે એ પણ પૂછ્યું છે કે તેમને NCCIA સમક્ષ ક્યારે અને કયા હેતુથી હાજર થવાનું રહેશે.

તપાસમાં સહયોગ કર્યો હોવાનો રિઝવાનનો દાવો

રિઝવાને પોતાના પત્રમાં જણાવ્યું છે કે તેમણે ઇંગ્લેન્ડમાં રહેતા સમયે સ્વેચ્છાએ પોતાનો ફોન એજન્સીને સોંપ્યો હતો. તેમના કહેવા પ્રમાણે, ફોન સોંપવો તેમના માટે કાયદાકીય રીતે ફરજિયાત નહોતો, તેમ છતાં તેમણે તપાસમાં સહયોગ આપવાના હેતુથી ફોનનો એક્સેસ આપ્યો હતો.રિઝવાને એજન્સીને પોતાના ફોનનો પાસવર્ડ પણ આપ્યો હોવાનું જણાવ્યું છે. તે સમયે તેમને ફોન થોડા કલાકમાં પરત આપવાનું કહેવામાં આવ્યું હતું.હવે ચાર અઠવાડિયા બાદ પણ ફોન NCCIA પાસે હોવાને કારણે રિઝવાને એજન્સી પાસેથી સ્પષ્ટતા માગી છે. તેમનું કહેવું છે કે તેમણે તપાસમાં સહયોગ આપ્યો છે અને હવે એજન્સીએ પણ એ જ ભાવનાથી કાર્યવાહી કરવી જોઈએ.

આ પણ વાંચો – APL T20 2026 : પાકિસ્તાન ક્રિકેટ ટીમને મોટો ઝટકો, અફઘાન T20 લીગના દરવાજા બંધ!