રવિવારથી શરૂ થયેલા ભારે વરસાદ, તેજ પવન અને વાવાઝોડાના કારણે શહેરના અનેક વિસ્તારોમાં પાણી ભરાઈ ગયા છે, જેના કારણે રસ્તાઓ પર વાહનવ્યવહાર ખોરવાઈ ગયો છે. નીચાણવાળા વિસ્તારોમાં પાણી ભરાતા લોકોને ભારે હાલાકીનો સામનો કરવો પડી રહ્યો છે.

ભારે વરસાદની અસર મુંબઈ એરપોર્ટ પર પણ જોવા મળી

ભારે વરસાદની અસર મુંબઈ એરપોર્ટ પર પણ જોવા મળી રહી છે. ખરાબ હવામાનના કારણે અનેક ફ્લાઇટોના સંચાલનમાં વિલંબ થયો છે, જ્યારે કેટલીક ફ્લાઇટોના સમયપત્રકમાં ફેરફાર કરવામાં આવ્યો છે. મુસાફરોને એરપોર્ટ જતાં પહેલાં પોતાની ફ્લાઇટની સ્થિતિ તપાસવાની સલાહ આપવામાં આવી છે.

અનેક વૃક્ષો ધરાશાયી થયાની ઘટનાઓ સામે આવી

શહેરના વિવિધ વિસ્તારોમાં વરસાદ અને તેજ પવનના કારણે અનેક વૃક્ષો ધરાશાયી થયાની ઘટનાઓ સામે આવી છે. આ ઉપરાંત કેટલાક સ્થળોએ વીજ પુરવઠો પણ ખોરવાયો હતો. રવિવારે સાંજે માનખુર્દ વિસ્તારમાં આવેલી એક બહુમાળી ચાલ અચાનક ધરાશાયી થઈ ગઈ હતી. ઘટનાની જાણ થતાં જ ફાયર બ્રિગેડ, પોલીસ અને બચાવ દળ તાત્કાલિક સ્થળ પર પહોંચી ગયા હતા અને બચાવ કામગીરી હાથ ધરી હતી. સદનસીબે સમયસર કાર્યવાહી થતાં મોટો જાનહાનિનો ભય ટળી ગયો હોવાનું પ્રાથમિક માહિતીમાં સામે આવ્યું છે.

ભારે વરસાદ પડવાની સંભાવના

આ દરમિયાન ભારતીય હવામાન વિભાગ (IMD)એ 6 જુલાઈ માટે પણ મુંબઈ અને આસપાસના વિસ્તારોમાં ભારેથી અતિભારે વરસાદની આગાહી કરી છે. વિભાગે તેજ પવન સાથે ભારે વરસાદ પડવાની સંભાવના વ્યક્ત કરતાં લોકોને જરૂરી હોય ત્યારે જ ઘર બહાર નીકળવાની અપીલ કરી છે. સમુદ્રમાં ઊંચા મોજાં ઉછળવાની શક્યતા હોવાથી માછીમારોને પણ દરિયો ન ખેડવાની ચેતવણી આપવામાં આવી છે.

BMCએ સાવચેતીના પગલાં તરીકે મહત્વપૂર્ણ નિર્ણય લીધો 

હવામાન વિભાગના એલર્ટને ધ્યાનમાં રાખીને BMCએ સાવચેતીના પગલાં તરીકે મહત્વપૂર્ણ નિર્ણય લીધો છે. સોમવાર, 6 જુલાઈના રોજ BMC સંચાલિત તમામ શાળાઓ ઉપરાંત શહેરની તમામ સરકારી અને ખાનગી શાળાઓમાં રજાની જાહેરાત કરવામાં આવી છે. વિદ્યાર્થીઓ અને વાલીઓની સુરક્ષાને પ્રાથમિકતા આપતા આ નિર્ણય લેવામાં આવ્યો હોવાનું BMCએ જણાવ્યું છે.

ભારે વરસાદને કારણે આગામી 24 કલાક મુંબઈ માટે મહત્વપૂર્ણ

BMC દ્વારા નાગરિકોને પાણી ભરાયેલા રસ્તાઓથી દૂર રહેવા, તૂટી પડેલા વૃક્ષો અને વીજ તારોથી સાવચેત રહેવા તેમજ કોઈપણ ઇમરજન્સીની સ્થિતિમાં તાત્કાલિક સંબંધિત વિભાગનો સંપર્ક કરવાની અપીલ કરવામાં આવી છે. ભારે વરસાદને કારણે આગામી 24 કલાક મુંબઈ માટે મહત્વપૂર્ણ માનવામાં આવી રહ્યા છે, તેથી પ્રશાસન સંપૂર્ણ સતર્ક સ્થિતિમાં છે. શહેરમાં રાહત અને બચાવ માટેની તમામ ટીમોને તૈનાત રાખવામાં આવી છે જેથી કોઈપણ આપાતકાલીન પરિસ્થિતિનો ઝડપથી સામનો કરી શકાય.