નેપાળમાં આવેલા ભયાનક પૂરના કારણે સ્થિતિ અત્યંત ગંભીર બની છે, જેમાં અત્યાર સુધીમાં 157 લોકોના મોત થયા છે અને હજારો લોકો બેઘર બન્યા છે. પૂરના કારણે ભારે નુકસાનની આશંકા સેવાઈ રહી છે, જ્યારે 750થી વધુ લોકો લાપતા છે જેમાં ઘણા ભારતીયોનો પણ સમાવેશ થાય છે. પરિસ્થિતિ વણસતાં મૃત્યુઆંકમાં સતત વધારો થઈ રહ્યો છે. આ સ્થિતિને કારણે ભારતમાં પણ હાઈ એલર્ટ જાહેર કરાયું છે. બિહારના 9 જિલ્લામાં હાઈ એલર્ટ કરવામાં આવ્યું છે. ત્યાં એનડીઆરએફ સહિતની ટીમો ગોઠવી દેવાઈ છે.
ગૃહ મંત્રાલય સમગ્ર સ્થિતિ પર સતત નજર રાખી રહ્યું છે
નેપાળના પૂરને પગલે ભારતમાં પણ એલર્ટ જાહેર કરવામાં આવ્યું છે, જેમાં ખાસ કરીને ઉત્તર પ્રદેશ અને બિહારને હાઈ એલર્ટ પર રાખવામાં આવ્યા છે. કોસી અને ગંગા નદીમાં પૂરનો ભય સેવાઈ રહ્યો છે અને આવતીકાલે પૂરના પાણી આવે તેવી આશંકા છે. કોઈપણ અનિચ્છનીય પરિસ્થિતિને પહોંચી વળવા NDRF અને SDRFની ટીમોને એલર્ટ રાખવામાં આવી છે, જ્યારે ગૃહ મંત્રાલય સમગ્ર સ્થિતિ પર સતત નજર રાખી રહ્યું છે.
બિહારના 9 જિલ્લાઓમાં હાઈ એલર્ટ જાહેર
બિહારના જે 9 જિલ્લાઓમાં હાઈ એલર્ટ જાહેર કરવામાં આવ્યું છે તેમાં પશ્ચિમી ચંપારણ, પૂર્વી ચંપારણ, ગોપાલગંજ, મુઝફ્ફરપુર, સિવાન, સારણ, શિવહર, સીતામઢી અને વૈશાલીનો સમાવેશ થાય છે. વડાપ્રધાન અને ગૃહમંત્રી એલર્ટ પર હોવાથી બિહાર અને યુપીના મુખ્યમંત્રીઓ પણ એક્શન મોડમાં આવી ગયા છે. પરિસ્થિતિની ગંભીરતાને ધ્યાનમાં રાખીને બિહારના મુખ્યમંત્રી સમ્રાટ ચૌધરીએ અધિકારીઓ સાથે ઈમરજન્સી બેઠક યોજી હતી, જ્યારે બીજી તરફ યુપીના સીએમ યોગી આદિત્યનાથે મહારાજગંજ અને કુશીનગર જિલ્લામાં ગંડક અને નારાયણી નદીઓના જળસ્તર પર નજર રાખવાનો આદેશ આપ્યો છે. રાજ્ય સરકારોના નિર્દેશો મળતાં જ વરિષ્ઠ અધિકારીઓ ઘટનાસ્થળે તૈનાત થઈ ગયા છે અને સતત મોનિટરિંગ કરી રહ્યા છે.
હિમાલયની આપત્તિ ભારત માટે પણ આપત્તિ બની શકે
નેપાળમાં આવેલ પૂરે વધુ એક વખત સાબિત કર્યું છે કે હિમાલયની આપત્તિ ભારત માટે પણ આપત્તિ બની શકે છે. હાલમાં સૌથી મોટો ભય ગંડક નદી તંત્ર દ્વારા બિહાર અને યુપીના સરહદી વિસ્તારો પર તોળાઈ રહ્યો છે. પ્રશાસને તૈયારીઓ શરૂ કરી દીધી છે, પરંતુ આગામી 24 કલાક નદીના જળસ્તર અને નેપાળથી આવતા પાણીની દેખરેખના દ્રષ્ટિકોણથી અત્યંત મહત્વપૂર્ણ છે. નેપાળની ભોટેકોશી નદી આગળ જઈને ત્રિશૂલી નદી તંત્ર સાથે જોડાય છે અને ત્રિશૂલી દેવઘાટ પાસે કાલી ગંડકી સાથે મળીને નારાયણી નદી બનાવે છે, જે ભારતમાં પ્રવેશ્યા બાદ ગંડક તરીકે ઓળખાય છે, તેથી નેપાળના ઉપરી વિસ્તારમાં અચાનક આવેલો મોટો જળપ્રવાહ ભારતમાં સીધો ગંડકના જળસ્તર પર અસર કરી શકે છે.