બિહારના જમુઈમાં સગીર યુવતી અને તેના સાથી સાથે બનેલી છેડતી તથા મારપીટની ઘટનામાં હવે તસવીર જાહેર કરવાના મામલે મોટી કાનૂની કાર્યવાહી થઈ છે. પીડિતા અને તેના પરિવારજનોની તસવીર સોશિયલ મીડિયા પર જાહેર કરવામાં આવતા પટનાના સચિવાલય પોલીસ સ્ટેશનમાં મુખ્યમંત્રી કાર્યાલયના એક કર્મચારી સામે એફઆઈઆર નોંધાઈ છે.

25 સપ્ટેમ્બરે સોશિયલ મીડિયા પર તસવીર અપલોડ

એફઆઈઆર મુજબ, 19 સપ્ટેમ્બર 2026ના રોજ જમુઈમાં સગીર યુવતી અને તેના સાથી સાથે છેડતી, અભદ્ર વર્તન અને મારપીટની ઘટના બની હતી. ઘટનાનો વીડિયો સોશિયલ મીડિયા પર વાયરલ થયા બાદ કાયદેસરની કાર્યવાહી ચાલી રહી હતી. દરમિયાન 25 સપ્ટેમ્બરે પીડિતા અને તેના પરિવારજનોની તસવીર ‘એક્સ’ પર અપલોડ કરવામાં આવી હતી.

તસવીર વાયરલ થતાં ઓળખ જાહેર થવાનો આરોપ

તસવીર સોશિયલ મીડિયા પર જાહેર થયા બાદ અન્ય પ્લેટફોર્મ પર પણ ઝડપથી વાયરલ થઈ હતી. પોલીસ ફરિયાદમાં આરોપ મૂકવામાં આવ્યો છે કે તસવીર જાહેર થવાથી પીડિતાની ઓળખ સામે આવી શકે છે. આને તેની ખાનગીતા અને ગરિમાના ભંગ સાથે પોક્સો કાયદાની જોગવાઈઓનું ઉલ્લંઘન ગણાવવામાં આવ્યું છે.

મુખ્યમંત્રી કાર્યાલયના આશુલિપિક પર આરોપ

પોલીસના ચકાસણી દરમિયાન સામે આવ્યું હોવાનું જણાવાયું છે કે સંવેદનશીલ તસવીર મુખ્યમંત્રી કાર્યાલયના સ્ટેનોગ્રાફર સાગર પ્રસાદ દ્વારા ‘એક્સ’ પર અપલોડ કરવામાં આવી હતી. ત્યારબાદ સચિવાલય પોલીસ સ્ટેશનમાં પોલીસ અધિકારી અમિતા કુમારીની અરજીના આધારે કેસ નોંધવામાં આવ્યો છે.

બીએનએસ, પોક્સો અને માહિતી ટેક્નોલોજી કાયદા હેઠળ કેસ

આ મામલે આરોપી સહિત તસવીરને આગળ પ્રસારિત કરનારા અન્ય લોકો સામે ભારતીય ન્યાય સંહિતા, 2023ની કલમ 73, પોક્સો અધિનિયમ, 2012ની કલમ 23 તથા માહિતી ટેક્નોલોજી અધિનિયમ, 2000ની કલમ 66(ઈ) અને 67 હેઠળ કેસ નોંધાયો છે.

તપાસ સબ-ઇન્સ્પેક્ટર સીમા કુમારીને સોંપાઈ

મામલાની ગંભીરતાને ધ્યાનમાં રાખીને સચિવાલય પોલીસ સ્ટેશને તપાસ શરૂ કરી છે. તપાસની જવાબદારી સબ-ઇન્સ્પેક્ટર સીમા કુમારીને સોંપવામાં આવી છે. તસવીર કોણે અપલોડ કરી, કોણે તેને આગળ પ્રસારિત કરી અને તેના પ્રસાર પાછળની સમગ્ર કડી અંગે પોલીસ તપાસ કરી રહી છે.

 આ પણ વાંચો  :   Sandesh Indepth : શેષનના ‘બે ગધેડા’થી આજની અસંમતિ સુધી, ચૂંટણી પંચમાં વિવાદોની કહાની