પાકિસ્તાન ક્રિકેટમાં હાલમાં ટીમ અને મેનેજમેન્ટને લઈને ફેરફારોની ચર્ચા ચાલી રહી છે. આ વચ્ચે પૂર્વ ફાસ્ટ બોલર શોએબ અખ્તરનું નામ પાકિસ્તાન ક્રિકેટ બોર્ડ (PCB)ની નવી વ્યવસ્થામાં મહત્વની ભૂમિકા માટે સામે આવ્યું હતું. ખાસ કરીને તેને પાકિસ્તાનની પુરુષ ક્રિકેટ ટીમના ચીફ સિલેક્ટર પદ સાથે જોડીને અહેવાલો આવ્યા હતા. પરંતુ હવે શોએબ અખ્તરે આ તમામ અટકળો પર ખુદ સ્પષ્ટતા કરી છે. પાકિસ્તાની ટીવી ચેનલ પર વાત કરતી વખતે તેણે PCBમાં કોઈપણ ભૂમિકા લેવાની વાતને નકારી કાઢી હતી. શોએબે આ અહેવાલોને સ્પષ્ટ શબ્દોમાં ‘ફેક’ ગણાવ્યા હતા. 

‘મને PCBમાં જવામાં કોઈ રસ નથી’

શોએબ અખ્તરે કહ્યું કે PCB સાથે જોડાવાની વાતોમાં કોઈ સત્ય નથી અને તે બોર્ડમાં જવા માટે બિલકુલ રસ ધરાવતો નથી. તેણે ચીફ સિલેક્ટર બનવાના અહેવાલો વિશે પણ કહ્યું કે તે આવા સમાચાર સાંભળી રહ્યો છે, પરંતુ તેમાં કોઈ હકીકત નથી. શોએબે કહ્યું કે તે પાકિસ્તાન ક્રિકેટનું ભલું ઈચ્છે છે અને દેશની ક્રિકેટ માટે કામ કરવા માગે છે, પરંતુ તેના માટે PCBમાં ઔપચારિક રીતે જોડાવું જરૂરી નથી. તેના જણાવ્યા પ્રમાણે પાકિસ્તાન ક્રિકેટની સેવા કરવાની ઘણી બીજી રીતો છે. 

માતાની સલાહનો પણ કર્યો ઉલ્લેખ

ટીવી કાર્યક્રમ દરમિયાન એન્કરે શોએબને તેની માતાની જૂની સલાહ યાદ અપાવી હતી. શોએબે અગાઉ જણાવ્યું હતું કે તેની માતાએ તેને PCB અને પાકિસ્તાની રાજકારણથી દૂર રહેવાની સલાહ આપી હતી. આ અંગે શોએબે કહ્યું કે તે પોતાની માતાની વાત પર હજુ પણ કાયમ છે. એટલે કે PCBમાં જોડાવા અંગે ચાલી રહેલી ચર્ચા છતાં તે બોર્ડનો હિસ્સો બનવા જઈ રહ્યો નથી. 

મોહસિન નકવી સાથે મુલાકાતની વાત પણ સામે આવી હતી

શોએબ અખ્તરનું નામ PCB સાથે જોડાવાનું કારણ અગાઉ આવેલા કેટલાક મીડિયા રિપોર્ટ્સ હતા. 30 સપ્ટેમ્બરના અહેવાલમાં દાવો કરવામાં આવ્યો હતો કે PCB ચેરમેન મોહસિન નકવી અને શોએબ અખ્તર વચ્ચે મુલાકાત થઈ હતી. આ મુલાકાતમાં પાકિસ્તાન ક્રિકેટ અને ટીમના ભવિષ્યને લઈને ચર્ચા થઈ હોવાનો દાવો કરવામાં આવ્યો હતો. અહેવાલોમાં એવું પણ કહેવામાં આવ્યું હતું કે PCB પોતાના ક્રિકેટ સેટઅપમાં ફેરફાર કરવા વિચારી રહ્યું છે અને શોએબને કોઈ મહત્વની જવાબદારી મળી શકે છે. જોકે, તે સમયે પણ ચોક્કસ પદ અંગે સત્તાવાર જાહેરાત કરવામાં આવી નહોતી. હવે શોએબે કહ્યું છે કે મોહસિન નકવીના નેતૃત્વવાળા PCB સાથે તેની આવી કોઈ ચર્ચા થઈ નથી. તેણે જણાવ્યું કે હાલમાં તે હ્યુસ્ટનમાં ખાનગી મુલાકાતે છે. 

પાકિસ્તાન ક્રિકેટમાં ફેરફારની ચર્ચા કેમ?

શોએબનું નામ એવા સમયે સામે આવ્યું જ્યારે પાકિસ્તાન ક્રિકેટ ટીમને ઈંગ્લેન્ડ સામેની 3 ટેસ્ટની સિરીઝમાં 0-3થી હારનો સામનો કરવો પડ્યો હતો. ત્યારબાદ પાકિસ્તાનના કોચિંગ અને સિલેક્શન સેટઅપમાં ફેરફારની ચર્ચા તેજ બની હતી. આ જ પૃષ્ઠભૂમિમાં શોએબ અખ્તરને ચીફ સિલેક્ટર અથવા અન્ય કોઈ મોટી ભૂમિકા મળવાની અટકળો શરૂ થઈ હતી. જોકે, હવે શોએબની સ્પષ્ટતા બાદ તેના PCBમાં જોડાવાની અટકળો પર હાલ માટે વિરામ લાગી ગયો છે. તેણે ફરી એક વખત કહ્યું છે કે તેનો હેતુ પાકિસ્તાન ક્રિકેટનું ભલું કરવાનો છે, પરંતુ તે કામ PCBમાં પદ લીધા વિના પણ કરી શકે છે.

શોએબ અખ્તરે પાકિસ્તાન માટે 46 ટેસ્ટ, 163 ODI અને 15 T20I મેચ રમી છે. તેની કારકિર્દી બાદ પણ તે પાકિસ્તાન ક્રિકેટ સાથે જોડાયેલા મુદ્દાઓ પર ખુલ્લેઆમ પોતાનો અભિપ્રાય આપતો રહ્યો છે.

આ પણ વાંચો: ટેસ્ટ ક્રિકેટના 150 વર્ષ, ટિકિટ માટે જબરદસ્ત માંગ, રમાશે પહેલી પુરુષ ડે-નાઇટ ટેસ્ટ