વડાપ્રધાન નરેન્દ્ર મોદી કિર્ગીસ્તાનની રાજધાની બિશ્કેક પહોંચી ગયા છે. અહીં તેઓ 26મી શાંઘાઈ કોઓપરેશન ઓર્ગેનાઈઝેશન (SCO) સમિટમાં ભાગ લેશે. વડાપ્રધાનની મુલાકાતને લઈને કિર્ગીસ્તાનમાં વસતા ભારતીય સમુદાય તેમજ સ્થાનિક નાગરિકોમાં ભારે ઉત્સાહ જોવા મળી રહ્યો છે.
વડાપ્રધાનનું કિર્ગીસ્તાન આવવું સન્માન અને ગૌરવની વાત
વડાપ્રધાન મોદીના આગમન અંગે ભારતીય નાગરિક દીપક જોશીએ કહ્યું કે તેમના માટે વડાપ્રધાનનું કિર્ગીસ્તાન આવવું સન્માન અને ગૌરવની વાત છે. તેમણે છેલ્લા 12 વર્ષ દરમિયાન ભારતમાં થયેલા પરિવર્તનનો ઉલ્લેખ કરતા વડાપ્રધાન મોદીને તેનો શ્રેય આપ્યો. ઉત્તરાખંડના વતની દીપક જોશીએ જણાવ્યું કે તેમના પિતાનું ગામ વર્ષ 2017માં વીજળી સાથે જોડાયું હતું. તેમણે દેશની રક્ષા ક્ષમતામાં થયેલા વિકાસની પણ પ્રશંસા કરી અને ઓપરેશન સિંદૂરનો ઉલ્લેખ કરતા કહ્યું કે સંરક્ષણ ક્ષેત્રે ભારતે નોંધપાત્ર પ્રગતિ કરી છે.
ભારતીયોની પ્રતિષ્ઠામાં મોટો ફેરફાર આવ્યો
દીપક જોશીએ વધુમાં કહ્યું કે છેલ્લા 10થી 12 વર્ષમાં ભારતીય પાસપોર્ટની કિંમત અને વિશ્વમાં ભારતીયોની પ્રતિષ્ઠામાં મોટો ફેરફાર આવ્યો છે. વિદેશમાં રહેતા ભારતીયો માટે આ ગૌરવની વાત હોવાનું તેમણે જણાવ્યું.
વડાપ્રધાનને આવકારવા માટે ખૂબ ઉત્સાહિત
બીજી તરફ કિર્ગીસ્તાનની નાગરિક ઝારા બેઈમ ગાસાનોવાએ પણ વડાપ્રધાન મોદીના આગમન અંગે ખુશી વ્યક્ત કરી. તેમણે જણાવ્યું કે તેઓ ભારતીય દૂતાવાસમાં હિન્દી ભાષા શીખી રહ્યા છે અને વડાપ્રધાનને આવકારવા માટે ખૂબ ઉત્સાહિત છે. ઝારાએ કહ્યું કે કિર્ગીસ્તાનના લોકો ભારત અને ભારતીયોને પસંદ કરે છે. તેમણે ભારત પ્રત્યેના પોતાના પ્રેમ અને લાગણી વ્યક્ત કરતાં કહ્યું કે વડાપ્રધાન મોદીના આગમનને લઈને તેઓ તેમને જોવા અને આવકારવા માટે તૈયાર છે. વડાપ્રધાન મોદીની SCO સમિટમાં હાજરી દરમિયાન પ્રાદેશિક સુરક્ષા, વેપાર, કનેક્ટિવિટી અને સહયોગ સહિતના મહત્વના મુદ્દાઓ પર ચર્ચા થવાની અપેક્ષા છે.