પંજાબમાં બહુચર્ચિત મેડ સંધુ (Med Sandhu) ની તીક્ષ્ણ હથિયારો અને તાબડતોબ ગોળીબાર કરીને કરવામાં આવેલી ભયાનક હત્યાના મામલે અમદાવાદ ક્રાઈમ બ્રાન્ચને મોટી સફળતા સાંપડી છે. પંજાબમાં આચરેલા આ સનસનાટીભર્યા હત્યાકાંડ બાદ આરોપીઓ ગુજરાતમાં આશરો લઈને છુપાયા હોવાની ચોક્કસ ગુપ્ત બાતમી અમદાવાદ ક્રાઈમ બ્રાન્ચને મળી હતી. બાતમીના આધારે પોલીસે ત્વરિત કાર્યવાહી કરીને સર્ચ ઓપરેશન હાથ ધર્યું હતું.
અમદાવાદના વાડજ વિસ્તારમાંથી આરોપી દબોચાયો
અમદાવાદ ક્રાઈમ બ્રાન્ચની ટીમે ટેકનિકલ સર્વેલન્સ અને બાતમીદારોના નેટવર્કની મદદથી શહેરના વાડજ વિસ્તારમાં દરોડો પાડ્યો હતો. આ સઘન દરોડા દરમિયાન મેડ સંધુની ગોળી મારીને હત્યા કરવાના કેસમાં સંડોવાયેલા મુખ્ય આરોપી પરમવિંદર ઉર્ફે કાકાની સફળતાપૂર્વક ધરપકડ કરી લેવામાં આવી છે. પંજાબ પોલીસને ચકમો આપીને વાડજમાં ગુપ્ત રીતે રહી રહેલા આરોપીને પોલીસે આકસ્મિક કોર્ડન કરીને દબોચી લીધો હતો.
પંજાબ પોલીસને જાણ કરાઈ, ટ્રાન્સફર વોરંટથી કબ્જો અપાશે
અમદાવાદ ક્રાઈમ બ્રાન્ચે આરોપી પરમવિંદર કાકાની કડક પૂછપરછ હાથ ધરીને પંજાબ પોલીસનો સંપર્ક સાધ્યો છે. પંજાબમાં અંજામ આપવામાં આવેલા આ ગંભીર ક્રાઈમ સંબંધે પંજાબ પોલીસની એક વિશેષ ટીમ અમદાવાદ આવવા રવાના થઈ છે. ક્રાઈમ બ્રાન્ચ દ્વારા કાયદેસરની પ્રક્રિયા પૂર્ણ કર્યા બાદ ટ્રાન્સફર રિમાન્ડ/વોરંટથી આરોપીનો કબ્જો પંજાબ પોલીસને સોંપવામાં આવશે.