રાજકોટ શહેરમાં કાયદો અને વ્યવસ્થાની સ્થિતિ સામે ગંભીર સવાલો ઊભા કરતી એક સનસનાટીભરી ઘટના સામે આવી છે. 150 ફૂટ રિંગ રોડ પર આવેલા આંબેડકર સર્કલ પાસે મોડી રાત્રે સમાધાનના બહાને બોલાવીને એક યુવકની છરીના ઘા ઝીંકીને ક્રૂરતાપૂર્વક હત્યા કરવામાં આવી છે. આ ખૂની ખેલના સીસીટીવી ફૂટેજ પણ સામે આવ્યા છે, જે સોશિયલ મીડિયા પર વાયરલ થતાં સમગ્ર શહેરમાં ભારે ચકચાર મચી ગઈ છે.

જૂની માથાકૂટના સમાધાન સમયે તીક્ષ્ણ હથિયારથી હુમલો

મળતી માહિતી મુજબ, 28 વર્ષીય પરેશભાઈ ચૌહાણ નામના યુવકને અગાઉ રાધે રાઠોડ નામના વ્યક્તિ સાથે બાઇક અથડાવવા બાબતે માથાકૂટ થઈ હતી. આ જૂના વિવાદમાં સમાધાન કરવા માટે મોડી રાત્રે બંને પક્ષો ભેગા થયા હતા. પરંતુ સમાધાન દરમિયાન મામલો ઉગ્ર બનતાં પરેશભાઈ પર તીક્ષ્ણ હથિયાર વડે હુમલો કરવામાં આવ્યો હતો અને તેમના શરીર પર છરીના 6 થી 7 ઘા ઝીંકી દેવાતાં તેઓ લોહીલુહાણ હાલતમાં ઢળી પડ્યા હતા.

હોસ્પિટલમાં દમ તોડ્યો, પોલીસે તપાસનો ધમધમાટ શરૂ કર્યો

ગંભીર રીતે ઘવાયેલા પરેશભાઈને તાત્કાલિક હોસ્પિટલ ખસેડવામાં આવ્યા હતા, પરંતુ ટૂંકી સારવાર દરમિયાન તેમનું કરુણ મોત નીપજ્યું હતું. બનાવની જાણ થતાં જ પોલીસ કાફલો ઘટનાસ્થળે દોડી ગયો હતો. પોલીસે સીસીટીવી ફૂટેજના આધારે આરોપીઓની ઓળખ મેળવીને તેમની ધરપકડ માટે ચક્રો ગતિમાન કર્યા છે અને સમગ્ર મામલે ગુનો નોંધી આગળની કાયદેસરની તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો