રાજકોટ ગ્રામ્ય વિસ્તારમાં અસામાજિક પ્રવૃત્તિઓ અને જુગારધામો પર લગામ કસવા માટે રાજકોટ રેન્જ આઈજીની ટીમે મોટી કાર્યવાહી કરી છે. ઉપલેટા પોલીસ સ્ટેશન વિસ્તાર હેઠળ આવતા કોબાનીગારી વાડીની સીમમાં આવેલા એક મકાનમાં ગેરકાયદે જુગારધામ ચાલી રહ્યું હોવાની ગુપ્ત બાતમી રેન્જ આઈજીની ટીમને મળી હતી. આ બાતમીના આધારે પોલીસે દરોડો પાડીને સ્થળ પરથી રમી રહેલા 8 શકુનીઓને આબેહૂબ જુગાર રમતા ઝડપી પાડ્યા છે.

રૂ. 1.85 લાખની રોકડ સહિત 3.13 લાખનો મુદ્દામાલ જપ્ત

પોલીસ ટીમે જુગારના અડ્ડા પરથી સ્થળ પરથી રૂ. 1,85,000 ની રોકડ રકમ, મોબાઈલ ફોન અને અન્ય સામગ્રી મળીને કુલ રૂ. 3,13,000 નો મુદ્દામાલ કબજે કર્યો છે. પકડાયેલા તમામ 8 આરોપીઓ સામે જુગારધારા હેઠળ ગુનો દાખલ કરીને ઉપલેટા પોલીસ સ્ટેશને આગળની કાયદેસરની કાર્યવાહી હાથ ધરી છે.

સ્થાનિક જુગારીઓમાં ફફડાટ

સ્થાનિક પોલીસને થાપ આપીને સીમ વિસ્તારમાં છૂપી રીતે ચાલતા આ મોટા જુગારધામ પર સીધી રેન્જ આઈજીની ટીમે દરોડો પાડીને સફળતા મેળવતા સમગ્ર ઉપલેટા અને આસપાસના ગ્રામ્ય વિસ્તારના જુગારીઓ તેમજ તત્વોમાં ભારે ફફડાટ વ્યાપી ગયો છે.

આ પણ વાંચો – 23 August Top News: 23 ઓગસ્ટના રોજ બનનારી મહત્વની ઘટનાઓ