રક્ષાબંધન ભાઈ-બહેનના અતૂટ પ્રેમ, સ્નેહ અને રક્ષણનું પર્વ છે. પરંતુ અમદાવાદમાં ભાઈ-બહેનના સંબંધની એવી ભાવુક અને પ્રેરણાદાયક મિસાલ સામે આવી છે, જ્યાં બહેનોએ માત્ર ભાઈના કાંડે રાખડી જ નથી બાંધી, પરંતુ પોતાના શરીરનો એક અંગ આપીને ભાઈને નવું જીવન આપ્યું છે. છેલ્લા 5 વર્ષમાં 41 બહેનોએ પોતાના ભાઈને કિડની દાન કરી હોવાના આંકડા સામે આવ્યા છે.
બહેનો બની ભાઈ માટે જીવનદાતા
અમદાવાદની કિડની હોસ્પિટલમાં છેલ્લા 5 વર્ષ દરમિયાન ભાઈ-બહેન વચ્ચે કિડની દાનના કુલ 45 કિસ્સા નોંધાયા છે. તેમાં 41 બહેનોએ પોતાના ભાઈને કિડની દાન કરી જીવન બચાવવાનો પ્રયાસ કર્યો છે, જ્યારે 4 કિસ્સામાં બહેનોએ પોતાના ભાઈ પાસેથી કિડની મેળવી છે. રક્ષાબંધનના પર્વે સામે આવેલા આ આંકડા ભાઈ-બહેનના સંબંધની એક અલગ જ વ્યાખ્યા રજૂ કરે છે.
ભાઈઓ પણ બહેન માટે આવ્યા આગળ
આ સંબંધમાં માત્ર બહેનો જ જીવનદાતા બની નથી. ભાઈઓએ પણ પોતાના ભાઈ અને બહેન માટે કિડની દાન કરીને સંબંધની સાચી કિંમત સાબિત કરી છે. કુલ 27 કિસ્સામાં ભાઈએ કિડની દાન કરી છે. જેમાં 6 કિસ્સામાં ભાઈએ બહેનને કિડની આપી છે, જ્યારે 21 કિસ્સામાં ભાઈએ પોતાના ભાઈને કિડની દાન કરી છે.
કિડની ફેલ્યોરના વધતા કેસ વચ્ચે આશાનું કિરણ
કિડની ફેલ્યોરના વધતા કેસ વચ્ચે ટ્રાન્સપ્લાન્ટની જરૂરિયાત પણ વધી રહી છે. આવા સંજોગોમાં લોહીના સંબંધીઓ દ્વારા થતું અંગદાન અનેક દર્દીઓ માટે જીવનદાયી સાબિત થઈ રહ્યું છે. ભાઈ કે બહેન પોતાના સ્વજનને નવું જીવન આપવા આગળ આવે ત્યારે રાખડીના સંબંધમાં પ્રેમ, ત્યાગ અને સમર્પણનો અર્થ વધુ ઊંડો બની જાય છે.
બિનવારસી દર્દીઓના કાંડે માનવતાની રાખડી
રક્ષાબંધનના પર્વે અમદાવાદ સિવિલ હોસ્પિટલમાં પણ માનવતાની અનોખી ઉજવણી જોવા મળી હતી. પોતાના કોઈ નથી તેવા બિનવારસી દર્દીઓના કાંડે ડોક્ટર અને નર્સિંગ સ્ટાફે રાખડી બાંધી હતી. પરિવારથી દૂર અને એકલા દર્દીઓના ચહેરા પર સ્મિત લાવવાનો આ પ્રયાસ રક્ષાબંધનના પર્વને માનવતાના બંધન સાથે જોડતો જોવા મળ્યો હતો.
રાખડી માત્ર દોરો નથી, જીવનનો સંકલ્પ છે
રક્ષાબંધન માત્ર હાથ પર બાંધવામાં આવતો દોરો નથી, પરંતુ સુખ-દુઃખમાં સાથે ઊભા રહેવાનો સંબંધ છે. જ્યારે 41 બહેનો પોતાના ભાઈને કિડની દાન કરીને નવું જીવન આપે છે, ત્યારે આંકડાઓ પાછળ છુપાયેલી પ્રેમ અને ત્યાગની આ કહાની રક્ષાબંધનના પર્વને વધુ અર્થપૂર્ણ બનાવી દે છે.
આ પણ વાંચો : Sandesh Indepth : હવે ડ્રાયફૂટ અને મીઠાઇમાં ભાવ વધારો, કાજુ કતરી 800થી સીધી 1200 રુપિયા સુધી પહોંચી