દેશમાં સતત વધી રહેલા ફુગાવાએ રિઝર્વ બેંક ઓફ ઇન્ડિયા (RBI) ની ચિંતામાં મોટો વધારો કર્યો છે, જેની સીધી અસર હવે સામાન્ય માણસના ખિસ્સા પર પડવાની શક્યતા છે. બ્લૂમબર્ગના એક અહેવાલ મુજબ, RBI આગામી ડિસેમ્બર મહિનામાં રેપો રેટમાં 50 થી 75 બેસિસ પોઇન્ટનો વધારો કરી શકે છે. હાલમાં રેપો રેટ 5.50% પર છે, જે વધીને 6.25% સુધી પહોંચી શકે છે. જો આ નિર્ણય લેવાશે, તો હોમ લોન, કાર લોન અને અન્ય પર્સનલ લોનના માસિક હપ્તા (EMI) ફરી એકવાર વધી જશે.
છૂટક ફુગાવો બે વર્ષની ટોચ પર પહોંચ્યો
ઓક્ટોબર મહિનામાં છૂટક ફુગાવો બે વર્ષની ટોચ પર પહોંચી ગયો છે અને તેણે RBI ની 6% ની નિર્ધારિત મર્યાદાને પણ વટાવી દીધી છે. ગત મહિને જ કેન્દ્રીય બેંકે લગભગ ચાર વર્ષમાં પ્રથમ વખત વ્યાજ દરમાં વધારો કર્યો હતો, પરંતુ હવે ફુગાવાને કાબૂમાં લેવા માટે વધુ કડક પગલાં ભરવા અનિવાર્ય બન્યા છે. મોંઘવારી અને ઊંચા વ્યાજ દરોનો આ બેવડો માર સામાન્ય પરિવારોનું બજેટ ખોરવી શકે છે અને બજારની માંગને પણ નબળી પાડી શકે છે. જોકે, નાણાકીય વર્ષ 2026-27 ના પ્રથમ ક્વાર્ટરમાં 7.8% ના મજબૂત GDP વૃદ્ધિ દરને જોતા, અર્થશાસ્ત્રીઓ માને છે કે RBI હાલ વૃદ્ધિ કરતા ફુગાવાને નિયંત્રિત કરવા પર વધુ ધ્યાન કેન્દ્રિત કરશે.
RBI સામે અન્ય પડકારો પણ ઉભા
આર્થિક મોરચે સરકાર અને RBI સામે અન્ય પડકારો પણ ઉભા થયા છે. મધ્ય પૂર્વમાં ચાલી રહેલા સંઘર્ષને કારણે આંતરરાષ્ટ્રીય બજારમાં ક્રૂડ ઓઇલના ભાવ પ્રતિ બેરલ $100 ની આસપાસ પહોંચી ગયા છે, જેનાથી ભારતનું આયાત બિલ અને સબસિડીનો બોજ વધી રહ્યો છે. ઓક્ટોબરમાં ભારતની વેપાર ખાધ પણ એક વર્ષની ટોચે પહોંચી છે. આ ઉપરાંત, ઓછા વરસાદ અને ‘અલ નીનો’ ના ભયને કારણે કૃષિ ઉત્પાદન પર દબાણ વધ્યું છે, જે આગામી સમયમાં ખાદ્ય ચીજોના ભાવમાં વધુ ભડકો કરી શકે છે.
ડિસેમ્બરમાં લોન મોંઘી થવાની શક્યતા
બીજી તરફ, વૈશ્વિક બજારમાં યુએસ ફેડરલ રિઝર્વ દ્વારા વ્યાજ દર વધારવાની શક્યતાને કારણે ભારતીય બજારમાંથી વિદેશી રોકાણકારો ભંડોળ પાછું ખેંચી રહ્યા છે. ઓક્ટોબર સુધીમાં $30 બિલિયનથી વધુનું રોકાણ પાછું ખેંચાતા રૂપિયા પર દબાણ વધ્યું છે. આ તમામ પરિબળોને જોતા ડિસેમ્બરમાં લોન મોંઘી થવી લગભગ નિશ્ચિત માનવામાં આવી રહી છે.
આ પણ વાંચોઃ Hair Fall: ખરતા વાળ થશે એકદમ બંધ, ઘરે જ આ રીતે બનાવો નેચરલ હેર પેક
