Rinku Singhના લગ્નમાં આવશે PM મોદી? પરિવાર સાથે મળીને આપ્યું લગ્નનું આમંત્રણ

📅 Published: November 16, 2026 | 📂 Category: cricket

ભારતીય ક્રિકેટર રિન્કુ સિંહના લગ્નની તૈયારીઓ શરૂ થઈ ગઈ છે. હવે આ લગ્નમાં રાજકારણ અને ક્રિકેટ જગતની મોટી હસ્તીઓ હાજરી આપે તેવી શક્યતા છે. રિન્કુએ પોતાના પરિવાર સાથે વડાપ્રધાન નરેન્દ્ર મોદી સાથે મુલાકાત કરીને તેમને લગ્નનું આમંત્રણ આપ્યું હતું. રિન્કુએ આ મુલાકાતની તસવીર સોશિયલ મીડિયા પર શેર કરી હતી અને તેને પોતાના પરિવાર માટે ખાસ ક્ષણ ગણાવી હતી.

PM મોદીને મળીને લગ્નનું આમંત્રણ આપ્યું

રિન્કુ સિંહે 15 નવેમ્બરે પરિવાર સાથે વડાપ્રધાન નરેન્દ્ર મોદી સાથે મુલાકાત કરી હતી. આ દરમિયાન તેમણે 4 ડિસેમ્બરે યોજાનારા પોતાના લગ્નમાં હાજરી આપવા માટે વડાપ્રધાનને આમંત્રણ આપ્યું હતું. મુલાકાતની તસવીર ઇન્સ્ટાગ્રામ પર શેર કરતાં રિન્કુએ લખ્યું હતું કે વડાપ્રધાનને પરિવાર સાથે મળીને લગ્નનું આમંત્રણ આપવું અને તેમના આશીર્વાદ મેળવવા તેમના માટે ખરેખર ખાસ ક્ષણ હતી.

પ્રિયા સરોજ સાથે 4 ડિસેમ્બરે લગ્ન

રિન્કુ સિંહ સમાજવાદી પાર્ટીનાં લોકસભા સાંસદ પ્રિયા સરોજ સાથે લગ્ન કરવા જઈ રહ્યા છે. બંનેના લગ્ન 4 ડિસેમ્બરે ઉત્તર પ્રદેશના લખનઉમાં યોજાશે. પ્રિયા સરોજ ઉત્તર પ્રદેશની મછલીશહેર લોકસભા બેઠકનું પ્રતિનિધિત્વ કરે છે. બંનેએ 8 જૂન, 2025ના રોજ લખનઉમાં સગાઈ કરી હતી. હવે લગભગ દોઢ વર્ષ બાદ બંને લગ્નના બંધનમાં બંધાશે. 

યોગી આદિત્યનાથને પણ આપ્યું આમંત્રણ

રિન્કુના પરિવારે ઉત્તર પ્રદેશના મુખ્યમંત્રી યોગી આદિત્યનાથને પણ લગ્નનું આમંત્રણ આપ્યું છે. રિન્કુની માતા બીના દેવી, ભાઈ સોનુ સિંહ અને બહેન નેહા સિંહે લખનઉમાં મુખ્યમંત્રીના નિવાસસ્થાને જઈને તેમને આમંત્રણ કાર્ડ આપ્યું હતું. આ લગ્નમાં ક્રિકેટ અને રાજકારણ જગતની અનેક જાણીતી હસ્તીઓ હાજરી આપે તેવી શક્યતા છે. વડાપ્રધાન મોદી અને મુખ્યમંત્રી યોગી આદિત્યનાથને આમંત્રણ મળતાં લગ્નની ચર્ચા વધુ વધી છે.

કેવી રીતે શરૂ થઈ હતી રિન્કુ-પ્રિયાની લવ સ્ટોરી?

રિન્કુ અને પ્રિયાની ઓળખાણ કોરોના મહામારીના સમયગાળામાં સોશિયલ મીડિયા દ્વારા થઈ હતી. રિન્કુએ અગાઉ એક મુલાકાતમાં જણાવ્યું હતું કે તેમણે સોશિયલ મીડિયા પર પ્રિયાનો ફોટો જોયો હતો. શરૂઆતમાં તેમને પ્રિયાને સંદેશ મોકલવામાં સંકોચ થતો હતો, પરંતુ પ્રિયાએ તેમની કેટલીક તસવીરો પસંદ કર્યા બાદ તેમણે વાતચીત શરૂ કરી હતી. ધીમે-ધીમે બંને વચ્ચે વાતચીત વધતી ગઈ અને સંબંધ પ્રેમમાં બદલાયો. જૂન 2025માં બંનેએ સગાઈ કરીને પોતાના સંબંધને સત્તાવાર બનાવ્યો હતો.

ક્રિકેટમાં પણ રિન્કુની વ્યસ્તતા વધશે

લગ્નની તૈયારીઓ વચ્ચે રિન્કુ સિંહ ક્રિકેટમાં પણ વ્યસ્ત રહેવાના છે. તેમને આગામી એશિયા કપ રાઇઝિંગ સ્ટાર્સ ટૂર્નામેન્ટ માટે ભારત-એ ટીમના ઉપકપ્તાન તરીકે પસંદ કરવામાં આવ્યા છે. આ ટૂર્નામેન્ટ 19થી 29 નવેમ્બર દરમિયાન કતારના દોહામાં રમાશે.

રિન્કુ ભારત માટે અત્યાર સુધી 48 ટી20 આંતરરાષ્ટ્રીય અને બે વનડે મેચ રમી ચૂક્યા છે. તેઓ 2026ના ટી20 વર્લ્ડ કપ જીતનાર ભારતીય ટીમનો પણ ભાગ હતા.

આ પણ વાંચો: Virat Kohli: 7 વર્ષથી SENAમાં નથી ફટકારી સદી, શું વર્લ્ડ કપમાં કોહલી માટે બનશે મુશ્કેલી?


📱 Share on WhatsApp 🌐 View Original Article

Leave a Reply

Your email address will not be published. Required fields are marked *