વર્લ્ડ ટેસ્ટ ચેમ્પિયન દક્ષિણ આફ્રિકાની ટીમને પોતાના જ મેદાન પર ઓસ્ટ્રેલિયા સામે મુશ્કેલ પરિસ્થિતિનો સામનો કરવો પડી રહ્યો છે. ડરબનમાં રમાઈ રહેલી ટેસ્ટ મેચમાં શરૂઆતમાં પ્રભુત્વ જમાવનાર દક્ષિણ આફ્રિકાની ટીમ ત્રીજા દિવસના અંત સુધીમાં પાછળ રહી ગઈ હતી. ઓસ્ટ્રેલિયાએ પ્રથમ ઇનિંગમાં 390 રન બનાવ્યા હતા, જ્યારે દક્ષિણ આફ્રિકાની ટીમ 284 રનમાં સમેટાઈ ગઈ હતી. પરિણામે ઓસ્ટ્રેલિયાને પ્રથમ ઇનિંગના આધારે 106 રનની સરસાઈ મળી હતી. ત્યારબાદ બીજી ઇનિંગમાં ઓસ્ટ્રેલિયાએ વિકેટ ગુમાવ્યા વિના 33 રન બનાવીને પોતાની સ્થિતિ વધુ મજબૂત કરી હતી.

દક્ષિણ આફ્રિકાની બેટિંગ ફ્લોપ

ઓસ્ટ્રેલિયાના બેટર મેટ રેનશોએ શાનદાર સદી ફટકારીને ટીમને મુશ્કેલીમાંથી બહાર કાઢી હતી.ઓસ્ટ્રેલિયાએ પ્રથમ ઇનિંગમાં 390 રનનો મજબૂત સ્કોર બનાવ્યો હતો. જવાબમાં દક્ષિણ આફ્રિકાએ ત્રીજા દિવસની શરૂઆત 1 વિકેટે 27 રનથી કરી હતી. એડન માર્કરમ અને ડેવિડ બેડિંગહમે ટીમને સારી શરૂઆત અપાવીને સ્કોર 84 રન સુધી પહોંચાડ્યો હતો.પરંતુ માર્કરમની વિકેટ પડ્યા બાદ દક્ષિણ આફ્રિકાની ઇનિંગ લથડવા લાગી હતી. માત્ર 99 રનમાં ટીમની 4 વિકેટ પડી ગઈ હતી. આ દરમિયાન ઓસ્ટ્રેલિયાના અનુભવી ખેલાડી સ્ટીવ સ્મિથે સ્લિપમાં શાનદાર કેચ પકડીને ટીમની સફળતામાં મહત્વનો ફાળો આપ્યો હતો. તેણે દક્ષિણ આફ્રિકાના કેપ્ટન ટેમ્બા બાવુમા અને બેડિંગહમના કેચ ઝડપીને બેટિંગ પર દબાણ વધાર્યું હતું

પોતાની જ રણનીતિ દક્ષિણ આફ્રિકાને ભારે પડી

દક્ષિણ આફ્રિકાએ પોતાની પ્લેઇંગ ઇલેવનમાં 2 સ્પિનરોને સ્થાન આપ્યું હતું. જોકે, આ રણનીતિનો લાભ યજમાન ટીમને મળ્યો નહોતો.ઓસ્ટ્રેલિયાના ઝડપી બોલરો પેટ કમિન્સ, મિચેલ સ્ટાર્ક અને જોશ હેઝલવુડે પોતાની જવાબદારી સારી રીતે નિભાવી હતી. પરંતુ અનુભવી સ્પિનર નાથન લાયન બંને ટીમ વચ્ચેનો મહત્વનો તફાવત સાબિત થયો હતો.દક્ષિણ આફ્રિકાના બંને સ્પિનરો મળીને માત્ર 1 વિકેટ લઈ શક્યા હતા, જ્યારે લાયને 2 વિકેટ ઝડપી હતી. તેણે રન પર અંકુશ રાખીને બેટરો પર દબાણ પણ બનાવ્યું હતું.લાયનની બોલિંગ સામે દક્ષિણ આફ્રિકાના બેટરો રિવર્સ સ્વીપ જેવા જોખમી શોટ રમવા ગયા હતા. ટેમ્બા બાવુમા અને વિકેટકીપર કાયલ વેરેનાએ આ પ્રકારના શોટ રમતાં પોતાની વિકેટ ગુમાવી હતી. બંને પ્રસંગે સ્ટીવ સ્મિથે સ્લિપમાં શાનદાર કેચ પકડ્યા હતા.

ઓસ્ટ્રેલિયાની સ્થિતિ મજબૂત

દક્ષિણ આફ્રિકાની પ્રથમ ઇનિંગ 284 રનમાં પૂરી થતાં ઓસ્ટ્રેલિયાને 106 રનની સરસાઈ મળી હતી. દિવસની રમત ખરાબ પ્રકાશને કારણે વહેલી પૂરી કરવી પડી હતી. તે સમયે ઓસ્ટ્રેલિયાએ બીજી ઇનિંગમાં કોઈ વિકેટ ગુમાવ્યા વિના 33 રન બનાવી લીધા હતા.આમ, દક્ષિણ આફ્રિકાએ સ્પિનરોને મદદરૂપ પીચ તૈયાર કરીને ઓસ્ટ્રેલિયાને મુશ્કેલીમાં મૂકવાની યોજના બનાવી હતી, પરંતુ નાથન લાયનની અસરકારક બોલિંગ અને ઓસ્ટ્રેલિયાની શાનદાર ફિલ્ડિંગે યજમાન ટીમની મુશ્કેલીઓ વધારી દીધી હતી. હવે દક્ષિણ આફ્રિકા માટે મેચમાં વાપસી કરવી મોટો પડકાર બની ગયો હતો.

આ પણ વાંચો – PAK vs SL : શ્રીલંકા સામે પાકિસ્તાનનો દબદબો: ઘરઆંગણે રચ્યો ઈતિહાસ