સાબરકાંઠા જિલ્લાના ઇડર પંથકમાંથી કાયદો અને વ્યવસ્થાને પડકારતી એક અત્યંત ગંભીર ઘટના સામે આવી છે. ઇડરના સાપાવાડા રોડ ઉપર આવેલ લાલોડા અને સાપાવાડા રોડ પર કુક્ડીયા ચોકડી પાસે એક વૃદ્ધને નિશાન બનાવીને જીવલેણ હુમલો કરવામાં આવ્યો હતો. પ્રાપ્ત વિગતો મુજબ, ગાડી પાર્કિંગ જેવી સામાન્ય બાબતની અદાવત રાખીને અગાઉના મનદુઃખનો બદલો લેવા માટે કેટલાક શખ્સોએ અગાઉથી જ ઘડાયેલા પ્લાન મુજબ હુમલો કર્યો હતો. ખાસ કરીને ગાડીમાં સવાર થઈને આવેલા અને પોતાના મોઢા બાંધીને આવેલા શખ્સોએ અચાનક તીક્ષ્ણ હથિયારો અને પટ્ટા વડે હુમલો કરીને વૃદ્ધને લોહીલુહાણ કરી દીધા હતા.

માથા અને શરીરના ભાગે ગંભીર ઈજાઓ

દિવાળીના તહેવારો ટાણે જ પોતાના વિસ્તારમાં રોફ જમાવવા અને દહેશત ફેલાવવાના ઈરાદાથી કરાયેલા આ હુમલામાં વૃદ્ધને માથા તેમજ શરીરના અન્ય ગંભીર ભાગો પર ભારે ઇજાઓ પહોંચી હતી. હુમલા બાદ ઇડર પોલીસે ત્વરિત કાર્યવાહી કરીને પીડિત પરિવારની ફરિયાદના આધારે ધ્રુવીત, નવદીપ, કિરીટ પટેલ તેમજ અન્ય ત્રણ અજાણ્યા શખ્સો સહિત કુલ પાંચ સામે સત્તાવાર રીતે ગુનો નોંધી લીધો છે. ધોળા દિવસે થયેલા આ હિચકારા હુમલાથી સ્થાનિક રહીશોમાં પણ ભારે રોષ અને ફફડાટ ફેલાઈ ગયો છે.

માથાભારે શખ્સોની શોધખોળ અર્થે ચક્રો ગતિમાન

આ ગંભીર બનાવ અંગે ઇડર પોલીસ સ્ટેશનના અધિકારીઓએ જણાવ્યું હતું કે આરોપીઓ વિરુદ્ધ કાયદાકીય જોગવાઈઓ અનુસાર વિવિધ કલમો હેઠળ ગુનો દાખલ કરવામાં આવ્યો છે. હાલ પોલીસની અલગ-અલગ ટીમો દ્વારા આ કેસમાં સંડોવાયેલા તમામ ફરાર આરોપીઓને ઝડપી પાડવા માટે ચક્રો ગતિમાન કરવામાં આવ્યા છે. દિવાળીના માહોલ વચ્ચે કાયદો હાથમાં લઈને ગુનાહિત પ્રવૃત્તિ આચરનાર આવા તત્વો સામે પોલીસ દ્વારા કડકથી કડક દાખલારૂપ કાર્યવાહી કરવામાં આવશે તેવી ખાતરી આપવામાં આવી છે.

આ પણ વાંચો : Gandhinagar News : 108 ઘંટના રણકાર સાથે ગુંજી ઉઠશે મહુડીધામ, કાળી ચૌદશની વિશેષ ઉજવણી કરાઈ…