સમગ્ર વિશ્વના દેશોએ સાઉદી અરેબિયા પર હુતી બળવાખોરો દ્વારા કરવામાં આવેલા તાજેતરના હુમલાઓ અંગે ચિંતા વ્યક્ત કરી છે. હુતીઓએ બેલિસ્ટિક મિસાઇલો અને ડ્રોનનો ઉપયોગ કરીને ખમીસ મુશૈત, અભા અને તાઈફ શહેરોને નિશાન બનાવ્યા હતા, જેના પરિણામે ઘણા નાગરિકો ઘાયલ થયા હતા અને માળખાગત સુવિધાઓને નુકસાન થયું હતું. આ હુમલાઓ સાઉદી અરેબિયા માટે ચિંતાનો વિષય બન્યા છે. આ પરિસ્થિતિ વચ્ચે, ભારતે એક નિવેદન બહાર પાડીને આ હુમલાઓની નિંદા કરી છે અને તેને અસ્વીકાર્ય ગણાવ્યા છે.

ભારતે સાઉદી અરેબિયા પર હુતી બળવાખોરોના હુમલાને અસ્વીકાર્ય ગણાવ્યા અને જણાવ્યું કે તે પ્રાદેશિક સુરક્ષાને નબળી પાડે છે. ભારતે વધુમાં નોંધ્યું હતું કે આ હુમલાઓ મહત્વપૂર્ણ ‘બાબ-અલ-મંદેબ’ જળમાર્ગમાં જહાજોની અવરજવર માટે ખતરો ઊભો કરે છે. ભારતે સાઉદી અરેબિયાની વ્યાવસાયિક સુવિધાઓ પરના હુમલા અને મક્કા શહેર પર હુમલાના પ્રયાસની પણ નિંદા કરી છે.

બગડતી પરિસ્થિતિ અંગે ભારતની ચિંતા

ભારતીય વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે યમનમાં બગડતી સુરક્ષા સ્થિતિ અંગે ભારત ખૂબ જ ચિંતિત છે. તેમણે કહ્યું, “અમે સાઉદી અરેબિયાના સાર્વભૌમ પ્રદેશ – ખાસ કરીને નાગરિકો અને વ્યાવસાયિક સુવિધાઓને નિશાન બનાવવાની તેમજ મક્કા શહેર પર હુમલાના પ્રયાસની નિંદા કરીએ છીએ.”

‘હુમલા પ્રાદેશિક સુરક્ષા અને સ્થિરતાને નબળી પાડે છે’

મીડિયા સાથે વાત કરતા રણધીર જયસ્વાલે કહ્યું કે આવા હુમલા પ્રાદેશિક સુરક્ષા અને સ્થિરતાને નબળી પાડે છે અને બાબ-અલ-મંદેબ સામુદ્રધુનીમાં જહાજોની મુક્ત અવરજવર માટે ખતરો ઊભો કરે છે, જે ભારત માટે અસ્વીકાર્ય છે. તેમણે ઉમેર્યું કે ભારત આ પ્રદેશમાં શાંતિ અને સ્થિરતાની વહેલી પુનઃસ્થાપનાની આશા રાખે છે.

પાકિસ્તાનનું સાઉદી અરેબિયાને સમર્થનનું વચન

પાકિસ્તાને પણ આ હુમલાઓ અંગે નિવેદન બહાર પાડ્યું છે. પાકિસ્તાનના એક વરિષ્ઠ લશ્કરી અધિકારીએ જણાવ્યું હતું કે ઈસ્લામાબાદ સાઉદી અરેબિયાના બચાવ માટે કોઈપણ હદ સુધી જશે. તેમણે પુષ્ટિ કરી કે ગલ્ફ દેશની સુરક્ષા પ્રત્યે ઈસ્લામાબાદની પ્રતિબદ્ધતા બિનશરતી છે. પાકિસ્તાન આર્મીના પ્રવક્તા લેફ્ટનન્ટ જનરલ અહેમદ શરીફ ચૌધરીએ એક ઈન્ટરવ્યુમાં જણાવ્યું હતું કે પાકિસ્તાન રાજદ્વારી અને ભૌતિક એમ બંને રીતે સાઉદી અરેબિયાના કિંગડમ (રાજ્ય) સાથે મક્કમતાથી ઊભું છે. તેમણે પુષ્ટિ કરી કે તેઓ કિંગડમને સમર્થન આપવા માટે કોઈપણ હદ સુધી જશે.

મક્કા સંયુક્ત સંરક્ષણ કરાર પર હસ્તાક્ષર

ગયા મહિને, પાકિસ્તાન, સાઉદી અરેબિયા અને તુર્કીએ ‘મક્કા સંયુક્ત સંરક્ષણ કરાર’ પર હસ્તાક્ષર કર્યા હતા. આ કરાર હેઠળ, ત્રણેય દેશોમાંથી કોઈપણ એક પર સશસ્ત્ર હુમલો થાય તો તેને તે તમામ પરનો હુમલો માનવામાં આવે છે. આ સંદર્ભમાં, પાકિસ્તાનનું નિવેદન અત્યંત મહત્વપૂર્ણ માનવામાં આવે છે.

સાઉદી અરેબિયા અને હુતી બળવાખોરો વચ્ચે તણાવ

સાઉદી અરેબિયા અને યમનના હુતી બળવાખોરો વચ્ચે તણાવ સતત વધી રહ્યો છે. તાજેતરના સમયમાં હુતી બળવાખોરોએ સાઉદીના લક્ષ્યો પર હુમલા કર્યા છે અને લાલ સમુદ્રમાં વ્યૂહાત્મક રીતે અત્યંત મહત્વપૂર્ણ એવા ‘બાબ અલ-મંદબ’ જળમાર્ગ (સ્ટ્રેટ) પર નિયંત્રણ સ્થાપિત કર્યું છે. હુતીઓએ સાઉદીના તેલ સંસાધનો અને અન્ય મહત્વપૂર્ણ માળખાગત સુવિધાઓને નિશાન બનાવી છે, જેનાથી પશ્ચિમ એશિયામાં પરિસ્થિતિ વધુ વણસી છે.

આ પણ વાંચો: America નો કોઈપણ દુશ્મન હવે… ડેનમાર્ક-ગ્રીનલેન્ડને લઈને ટ્રમ્પે કરી મોટી જાહેરાત