SBI Card: તહેવારોની સીઝન શરૂ થાય તે પહેલાં SBI Cardએ પોતાના ગ્રાહકો માટે એક નવી અને સુવિધાજનક સુવિધાની જાહેરાત કરી છે. કંપનીએ FD-બેકડ (Fixed Deposit-backed) ‘Advantage SBI Card’ માટે ડિજિટલ અરજીની સુવિધા SBI YONO એપ પર શરૂ કરી છે. 23 સપ્ટેમ્બરે કરવામાં આવેલી જાહેરાત મુજબ, જે ગ્રાહકોનું SBIમાં ફિક્સ્ડ ડિપોઝિટ છે, તેઓ હવે કોઈ કાગળની કાર્યવાહી કર્યા વગર સીધા YONO એપ દ્વારા સિક્યોર્ડ ક્રેડિટ કાર્ડ માટે અરજી કરી શકે છે.

ચાર અલગ-અલગ કાર્ડ પસંદ કરવાનો વિકલ્પ

SBI Cardએ પોતાના સિક્યોર્ડ કાર્ડ હેઠળ ગ્રાહકોને ચાર અલગ-અલગ વેરિઅન્ટમાંથી પસંદગી કરવાનો વિકલ્પ આપ્યો છે. તેમાં SBI Card Elite, SBI Card Prime, SimplyClick SBI Card અને SimplySAVE SBI Card સામેલ છે. આ નવી સુવિધાનો સૌથી મોટો ફાયદો એ છે કે ગ્રાહકોને આ કાર્ડ માટે અલગથી પ્રક્રિયા કરવા માટે ક્યાંય જવું નહીં પડે. તેઓ સીધા SBIના મુખ્ય બેંકિંગ પ્લેટફોર્મ પરથી જ અરજી કરી શકશે.

FD-બેઝ્ડ સિક્યોર્ડ ક્રેડિટ કાર્ડ શું છે?

સિક્યોર્ડ ક્રેડિટ કાર્ડ એવું કાર્ડ છે જે બેંકમાં જમા તમારી FD (ફિક્સ્ડ ડિપોઝિટ)ની સુરક્ષાના આધારે આપવામાં આવે છે. એટલે કે તમારી FD બેંક પાસે ગેરંટી અથવા જામીન તરીકે કામ કરે છે. SBI Cardનું માનવું છે કે આ સુવિધાથી પહેલીવાર ક્રેડિટ કાર્ડ લેનારા લોકો અથવા પોતાનો ક્રેડિટ સ્કોર (CIBIL Score) સુધારવા કે મજબૂત કરવા માંગતા લોકો માટે ક્રેડિટ મેળવવાનો માર્ગ સરળ બની શકે છે. જોકે, આ યોજના માટે કયા ગ્રાહકો પાત્ર રહેશે તે અંગે કંપનીએ હજુ સ્પષ્ટ માહિતી આપી નથી.

10 મિનિટમાં ડિજિટલ અરજી અને પ્રક્રિયા

કંપનીના જણાવ્યા મુજબ, ગ્રાહકો YONO એપ દ્વારા માત્ર 10 મિનિટમાં આ સંપૂર્ણ ડિજિટલ પ્રક્રિયા પૂરી કરીને ક્રેડિટ કાર્ડ માટે અરજી કરી શકે છે. જોકે, આ 10 મિનિટની સમયમર્યાદા સાથે કઈ શરતો જોડાયેલી છે અને અરજી કર્યા બાદ કેટલા સમય પછી કાર્ડથી ટ્રાન્ઝેક્શન શરૂ કરી શકાશે, તેની વિગતવાર માહિતીની હજુ રાહ જોવાઈ રહી છે. આ સુવિધાનો મુખ્ય હેતુ અરજી પ્રક્રિયાને સંપૂર્ણપણે ડિજિટલ અને સરળ બનાવવાનો છે. જોકે, તેની સાથે કોઈ ખાસ ફેસ્ટિવ કેશબેક અથવા ફી માફી જેવી ઓફરની જાહેરાત કરવામાં આવી નથી.

SBI Cardની CEOએ શું કહ્યું?

SBI Cardના મેનેજિંગ ડિરેક્ટર (MD) અને ચીફ એક્ઝિક્યુટિવ ઓફિસર (CEO) સલીલા પાંડેએ આ નવી સુવિધાની શરૂઆત અંગે કહ્યું કે તેનો હેતુ ગ્રાહકો માટે અરજીની પ્રક્રિયાને સરળ અને સુવિધાજનક બનાવવાનો છે. તેમણે જણાવ્યું કે હવે ગ્રાહકો 100% પેપરલેસ અને ડિજિટલ પ્રક્રિયા દ્વારા સરળતાથી સિક્યોર્ડ ક્રેડિટ કાર્ડ મેળવી શકશે.

કેટલીક મહત્વની શરતો અંગે હજુ સ્પષ્ટતા નથી

ડિજિટલ અરજીની પ્રક્રિયા સરળ બનાવવામાં આવી છે, પરંતુ આ કાર્ડ સાથે જોડાયેલી કેટલીક મહત્વની માહિતી હજુ સામે આવી નથી. જેમ કે કાર્ડ માટે ઓછામાં ઓછી કેટલી રકમની FD જરૂરી છે, FDની રકમના કેટલા ટકા સુધી ક્રેડિટ લિમિટ મળશે અને ચારેય કાર્ડ વેરિઅન્ટની જોડાવાની અથવા વાર્ષિક ફી કેટલી હશે. આ ઉપરાંત, કાર્ડ બંધ કર્યા બાદ જામીન તરીકે રાખવામાં આવેલી FDને રિલીઝ કરવાની પ્રક્રિયા શું હશે, તે અંગે પણ સ્પષ્ટતા બાકી છે. અરજી કરતા ગ્રાહકો માટે આ તમામ શરતો અને ચાર્જની માહિતી જાણવી જરૂરી રહેશે. 

આ પણ વાંચો: SBI ક્રેડિટ કાર્ડ ગ્રાહકો માટે મોટાં સમાચાર, બદલાઇ ગયા 1 સપ્ટેમ્બરથી આ મોટાં નિયમ