એશિયન ગેમ્સ 2026માં ભારતીય મહિલા ક્રિકેટ ટીમે શાનદાર પ્રદર્શન કરીને ગોલ્ડ મેડલ મેચમાં સ્થાન મેળવી લીધું છે. સેમિફાઇનલમાં ભારતે બાંગ્લાદેશને 114 રનથી હરાવ્યું. ભારતની આ મોટી જીતમાં ઓપનર શેફાલી વર્માએ ઐતિહાસિક સદી ફટકારી અને એક સાથે અનેક રેકોર્ડ પોતાના નામે કર્યા.શેફાલીએ માત્ર 49 બોલમાં સદી પૂરી કરી હતી. પોતાની અણનમ 100 રનની ઇનિંગ્સ દરમિયાન તેમણે 9 સિક્સ ફટકારી. આ શાનદાર પ્રદર્શન સાથે શેફાલીએ મહિલા T20Iમાં ભારત તરફથી સૌથી વધુ સિક્સ ફટકારનારી બેટરનો રેકોર્ડ પણ પોતાના નામે કરી લીધો.

થોડા જ સમયમાં મંધાનાનો રેકોર્ડ તૂટ્યો

બાંગ્લાદેશ સામેની આ જ મેચમાં સ્મૃતિ મંધાનાએ 37 રનની ઇનિંગ્સ રમી હતી. પોતાની ઇનિંગ્સ દરમિયાન મંધાનાએ 2 સિક્સ ફટકારી અને મહિલા T20Iમાં 100 સિક્સ પૂરી કરનારી પ્રથમ ભારતીય મહિલા બેટર બની હતી.મંધાનાએ આ સિદ્ધિ 178મી મેચમાં હાંસલ કરી હતી. જોકે, થોડા જ સમય બાદ શેફાલીએ પોતાની ઇનિંગ્સ દરમિયાન 100 સિક્સનો આંકડો પાર કર્યો. તેમણે માત્ર 118 મેચમાં આ સિદ્ધિ મેળવીને સૌથી ઝડપી ભારતીય મહિલા બેટર તરીકે પણ રેકોર્ડ બનાવ્યો.હવે મહિલા T20Iમાં ભારત તરફથી સૌથી વધુ સિક્સ ફટકારનારી બેટર્સમાં શેફાલી 104 સિક્સ સાથે પ્રથમ સ્થાને છે, જ્યારે સ્મૃતિ મંધાના 100 સિક્સ સાથે બીજા સ્થાને છે.

એક કેલેન્ડર વર્ષમાં સૌથી વધુ સિક્સનો રેકોર્ડ

શેફાલી વર્માએ આ સાથે વધુ એક મોટો રેકોર્ડ પોતાના નામે કર્યો છે. 2026માં અત્યાર સુધી મહિલા T20Iમાં શેફાલીએ 35 સિક્સ ફટકારી છે. આ સાથે તે એક કેલેન્ડર વર્ષમાં સૌથી વધુ સિક્સ ફટકારનારી મહિલા T20I બેટર બની ગઈ છે.આ પહેલાં આ રેકોર્ડ શ્રીલંકાની ચમારી અટાપટ્ટુના નામે હતો. તેમણે 2024માં મહિલા T20Iમાં કુલ 32 સિક્સ ફટકારી હતી. શેફાલીએ 35 સિક્સ સાથે હવે આ રેકોર્ડ પોતાના નામે કરી લીધો છે.

એક કેલેન્ડર વર્ષમાં સૌથી વધુ T20I સિક્સરનો રેકોર્ડ 

ભારતે બાંગ્લાદેશને 114 રનથી હરાવ્યું

ભારતીય મહિલા ટીમે સેમિફાઇનલમાં બાંગ્લાદેશ સામે પ્રથમ બેટિંગ કરીને મોટો સ્કોર બનાવ્યો હતો. શેફાલી વર્માની સદી અને અન્ય બેટર્સના યોગદાનથી ભારતે મજબૂત સ્કોર ઊભો કર્યો હતો. ત્યારબાદ ભારતીય બોલરોએ બાંગ્લાદેશની બેટિંગને દબાણમાં રાખી અને ભારતે 114 રનથી મોટી જીત મેળવી.આ જીત સાથે ભારતે એશિયન ગેમ્સ 2026ની મહિલા ક્રિકેટ સ્પર્ધાની ગોલ્ડ મેડલ મેચમાં સ્થાન નિશ્ચિત કર્યું છે. શેફાલી વર્મા માટે પણ આ મેચ ખાસ બની રહી, કારણ કે તેમણે સદી ઉપરાંત મહિલા T20Iના સિક્સના આંકડામાં બે મોટી સિદ્ધિઓ હાંસલ કરી.

આ પણ વાંચો – IND W vs BAN W : સેમીફાઇનલમાં ભારતે બાંગ્લાદેશને 114 રને હરાવ્યું, નંદની શર્માએ 3 વિકેટ લીધી