ભારતીય ક્રિકેટ ટીમના પૂર્વ દિગ્ગજ ઓપનર શિખર ધવનના નામનો તેમની પરવાનગી વિના દુરુપયોગ થતો હોવાનો એક ચોંકાવનારો મામલો સામે આવ્યો છે. આ ઘટનાને પગલે ધવને સોશિયલ મીડિયા પર ભારે નારાજગી વ્યક્ત કરી છે. ગબ્બરે સ્પષ્ટ કર્યું છે કે આ છેતરપિંડી સામે તેઓ ખૂબ જ ટૂંક સમયમાં કડક કાનૂની પગલાં લેવા જઈ રહ્યા છે.આ આખો વિવાદ વર્લ્ડ T20 કોન્ટિનેન્ટ કપ સાથે જોડાયેલો છે, જેમાં ધવન પોતે રમવાના ન હોવા છતાં તેમનું નામ એક સક્રિય ખેલાડી તરીકે પ્રમોટ કરવામાં આવી રહ્યું છે.
ધવનનો દાવો છે કે ટૂર્નામેન્ટના આયોજકોએ તેમની કોઈ જાણકારી કે લેખિત મંજૂરી વિના જ આ લીગમાં તેમનું નામ જોડી દીધું છે. આ ગંભીર બાબત સામે આવ્યા બાદ ધવન અને તેમની લીગલ ટીમે એક્શન મોડમાં આવીને કાનૂની કાર્યવાહીની તૈયારીઓ શરૂ કરી દીધી છે.
ગબ્બરે સોશિયલ મીડિયા પર કર્યો મોટો ધડાકો
શિખર ધવને 13 ઓક્ટોબરની રાત્રે પોતાના સત્તાવાર X હેન્ડલ પર એક પોસ્ટ શેર કરીને ફેન્સને આ બાબતે જાગૃત કર્યા હતા. તેમણે જણાવ્યું કે, તેમને માહિતી મળી છે કે વર્લ્ડ T20 કોન્ટિનેન્ટ કપમાં ભાગ લેનારા ખેલાડીઓની યાદીમાં તેમનું નામ પણ દર્શાવવામાં આવી રહ્યું છે.ધવને સ્પષ્ટ શબ્દોમાં કહ્યું, “મેં આ ટૂર્નામેન્ટમાં રમવા માટે કોઈ પણ પ્રકારની સંમતિ આપી નથી. મારી મંજૂરી વિના મારા નામનો ઉપયોગ કરવામાં આવી રહ્યો છે, જેનાથી ક્રિકેટ ચાહકોમાં મોટી ગેરસમજ ઊભી થઈ શકે છે કે હું આ ટૂર્નામેન્ટનો ભાગ છું.” ધવને આ મામલાને અત્યંત ગંભીર ગણાવ્યો છે. જો કે, આ વિવાદ પર ટૂર્નામેન્ટના સત્તાવાર આયોજકો તરફથી હજુ સુધી કોઈ પ્રતિક્રિયા કે સ્પષ્ટતા સામે આવી નથી.
ફેન્સ સાથે મોટો દગો કરવાનો આક્ષેપ
જ્યારે પણ શિખર ધવન જેવા લોકપ્રિય આંતરરાષ્ટ્રીય ક્રિકેટરનું નામ કોઈ ટૂર્નામેન્ટ સાથે જોડાય છે, ત્યારે લાખો ચાહકો તેમની બેટિંગ જોવા માટે ટિકિટ ખરીદતા હોય છે અથવા ડિજિટલ પ્લેટફોર્મ પર મેચ જોતા હોય છે. આવી સ્થિતિમાં, ખેલાડીની સંમતિ વિના તેના નામનો ઉપયોગ કરવો એ માત્ર પ્રોફેશનલ એથિક્સની વિરુદ્ધ નથી, પરંતુ ક્રિકેટપ્રેમીઓ સાથે પણ એક પ્રકારની છેતરપિંડી છે. ધવને આ પ્રમોશનલ હથકંડા સામે કડક વલણ અપનાવ્યું છે.
ઓગસ્ટ 2024માં જ ક્રિકેટને કહી ચૂક્યા છે અલવિદા
તમને જણાવી દઈએ કે શિખર ધવને ઓગસ્ટ 2024માં આંતરરાષ્ટ્રીય અને સ્થાનિક ક્રિકેટના તમામ ફોર્મેટમાંથી સત્તાવાર રીતે નિવૃત્તિ જાહેર કરી દીધી હતી. રિટાયરમેન્ટ લીધા બાદ પણ ધવન દુનિયાભરની વિવિધ લિજેન્ડ્સ T20 લીગ અને સ્પોર્ટ્સ ઇવેન્ટ્સને કારણે સતત લાઈમલાઈટમાં રહે છે. કોઈપણ પ્રોફેશનલ લીગમાં રમવા માટે ખેલાડી સાથે રીતસરનો કરાર (કોન્ટ્રાક્ટ) કરવો જરૂરી હોય છે, જેનો આ કેસમાં સરેઆમ ભંગ થયો હોવાનું દેખાઈ રહ્યું છે.
હવે કાનૂની લડાઈ પર રહેશે નજર
શિખર ધવનના આ ખુલાસા બાદ સોશિયલ મીડિયા પર ક્રિકેટ ફેન્સ ટૂર્નામેન્ટના આયોજકોને ટ્રોલ કરી રહ્યા છે અને ધવનના સમર્થનમાં આવ્યા છે. ધવનની લીગલ ટીમ આગામી દિવસોમાં આયોજકોને નોટિસ મોકલી શકે છે. હવે આ કેસ કયો નવો વળાંક લે છે અને આયોજકો આ મોટી ભૂલ પાછળ શું સફાઈ આપે છે, તેના પર રમત જગતની નજર ટકેલી રહેશે.
આ પણ વાંચો – IND vs WI 4th T20I : હૈદરાબાદમાં મેચ પહેલાં સામે આવી હવામાનની મોટી આગાહી!