ભારત અને વેસ્ટ ઈન્ડિઝ વચ્ચે રમાયેલી 3 મેચની વનડે શ્રેણી ભારતીય ટીમે 2-1થી પોતાના નામે કરી. શ્રેણીની છેલ્લી મેચમાં વેસ્ટ ઈન્ડિઝે ભારતને 5 વિકેટે હરાવ્યું હતું. જોકે આ શ્રેણીમાં ભારતના બે અનુભવી બેટર રોહિત શર્મા અને વિરાટ કોહલીનું પ્રદર્શન ચર્ચામાં રહ્યું. બંને ખેલાડીઓએ પોતાની બેટિંગથી ફરી એકવાર પોતાની ક્ષમતા સાબિત કરી.ત્રીજી વનડે બાદ ભારતીય કેપ્ટન શુભમન ગિલને રોહિત શર્મા અને વિરાટ કોહલીના ભવિષ્ય તથા 2027ના વનડે વિશ્વ કપમાં તેમની ભૂમિકા અંગે સવાલ કરવામાં આવ્યો. ગિલે સ્પષ્ટ શબ્દોમાં કહ્યું કે બંને ખેલાડીઓ હાલમાં ખૂબ સારી બેટિંગ કરી રહ્યા છે અને તેમની ક્ષમતા અંગે કોઈ શંકા નથી.

રોહિત-કોહલી પર ગિલનો સ્પષ્ટ જવાબ

પ્રેસ કોન્ફરન્સમાં રોહિત અને કોહલીને લઈને સવાલ પૂછવામાં આવ્યો ત્યારે શુભમન ગિલે કહ્યું કે બંને અનુભવી ખેલાડીઓ ખૂબ સારી બેટિંગ કરી રહ્યા છે.ગિલે ખાસ કરીને રોહિત શર્માની છેલ્લી કેટલીક ઇનિંગ્સનો ઉલ્લેખ કર્યો. તેમણે કહ્યું કે રોહિતે છેલ્લી 4 ઇનિંગ્સમાં શાનદાર બેટિંગ કરી છે અને જો એક તક વધુ મળી હોત તો તેમની ત્રીજી સદી પણ આવી શકતી હતી.ગિલે વિરાટ કોહલીના પ્રદર્શનની પણ પ્રશંસા કરી.તેમના મતે વિરાટ જ્યારે પણ મેદાન પર આવ્યા ત્યારે તેમણે ટીમ માટે મહત્વપૂર્ણ યોગદાન આપ્યું છે. કેએલ રાહુલની પણ ગિલે પ્રશંસા કરતા કહ્યું કે જ્યારે પણ તેને તક મળી છે ત્યારે તેણે ટીમ માટે સારું પ્રદર્શન કર્યું છે.આ નિવેદનથી સ્પષ્ટ થાય છે કે ભારતીય ટીમ મેનેજમેન્ટ અનુભવી ખેલાડીઓના પ્રદર્શનથી સંતુષ્ટ છે.

2027 વિશ્વ કપ પહેલાં હવે પ્રયોગોનો સમય ઓછો

2027ના વનડે વિશ્વ કપનું શેડ્યૂલ જાહેર થઈ ચૂક્યું છે.વિશ્વ કપ શરૂ થવામાં હવે એક વર્ષથી પણ ઓછો સમય બાકી છે.આવી સ્થિતિમાં ભારતીય ટીમના સંયોજન અંગે પણ સવાલો થઈ રહ્યા છે.આ અંગે શુભમન ગિલે કહ્યું કે હવે ટીમ પાસે વધારે પ્રયોગ કરવાનો સમય નથી. ટીમ જે ખેલાડીઓ અને સંયોજન સાથે વિશ્વ કપમાં રમવા માગે છે, તે જ સંયોજનને આગામી શ્રેણીઓમાં તૈયાર કરવાનો પ્રયાસ કરવામાં આવશે.ગિલે આશા વ્યક્ત કરી કે આગામી શ્રેણીથી ટીમના તમામ ઉપલબ્ધ ખેલાડીઓ સાથે રમવાની તક મળશે. ત્યારબાદ વિશ્વ કપ માટે જરૂરી સંયોજનને વધુ મજબૂત બનાવવામાં આવશે.

રોહિત અને કોહલીનો અનુભવ ભારત માટે મહત્વપૂર્ણ

રોહિત શર્મા અને વિરાટ કોહલી લાંબા સમયથી ભારતીય વનડે ટીમના મહત્વપૂર્ણ ખેલાડીઓ રહ્યા છે. બંનેએ અનેક મોટી આંતરરાષ્ટ્રીય મેચોમાં ભારત માટે શાનદાર પ્રદર્શન કર્યું છે.2027ના વિશ્વ કપ પહેલાં તેમની બેટિંગ ફોર્મ ભારત માટે મહત્વપૂર્ણ રહેશે. વેસ્ટ ઈન્ડિઝ સામેની શ્રેણીમાં બંનેએ જે રીતે બેટિંગ કરી તેનાથી ટીમ મેનેજમેન્ટને પણ રાહત મળી હશે.ખાસ વાત એ છે કે હવે વિશ્વ કપ પહેલાં ટીમને ખેલાડીઓના પ્રદર્શનની સાથે યોગ્ય સંયોજન પર પણ ધ્યાન આપવું પડશે. શુભમન ગિલના નિવેદન પરથી સંકેત મળે છે કે આગામી સમયમાં ભારતીય ટીમમાં મોટા પ્રયોગો કરતાં વિશ્વ કપ માટેની ટીમને તૈયાર કરવા પર વધુ ભાર રહેશે.

આ પણ વાંચો – Vaibhav Sooryavanshiના નામે ઐતિહાસિક રેકોર્ડ,આ મામલે સૌથી યુવા ભારતીય બન્યો