સુરત શહેરના ઉધના વિસ્તારમાં આવેલી કૈલાશ નગર સોસાયટીમાં ચાંદીના દાગીના સાફ કરી આપવાના બહાને ઠગાઈ આચરવાની એક ચોંકાવનારી ઘટના સામે આવી છે. બે શંકાસ્પદ ઈસમો કૈલાશ નગરમાં દાગીના ચમકાવવાનું કહીને ફરી રહ્યા હતા અને એક મહિલાને પોતાની જાળમાં ફસાવી ચાંદીની ચેઇન સાફ કરવાના નામે છેતરપિંડી આચરી હતી. જોકે, મહિલાને પોતાની સાથે ઠગાઈ થઈ હોવાનો ખ્યાલ આવી જતાં તેમણે બૂમાબૂમ કરી મૂકી હતી, જેને પગલે સમગ્ર વિસ્તારમાં ચકચાર મચી ગઈ હતી.
સતર્ક સ્થાનિકોએ બંને આરોપીઓને પકડી મેથીપાક ચખાડ્યો
ઠગાઈની જાણ થતાં જ આસપાસના સ્થાનિક રહીશોએ અસાધારણ સતર્કતા દાખવી હતી અને ભાગવાનો પ્રયાસ કરી રહેલા બંને શંકાસ્પદ ઠગબાજોને રંગેહાથ ઝડપી પાડ્યા હતા. છેતરપિંડીના આ બનાવથી રોષે ભરાયેલા લોકોએ બંને આરોપીઓને રસ્તા વચ્ચે જ પકડીને બરાબરનો મેથીપાક ચખાડ્યો હતો. આ દરમિયાન ભોગ બનનાર મહિલાએ પણ ભારે ગુસ્સામાં આવીને બંને ઠગબાજોને જાહેરમાં ચપ્પલ વડે માર માર્યો હતો. જાહેરમાં થયેલા આ હંગામાને જોવા માટે લોકોના ટોળેટોળાં એકઠા થઈ ગયા હતા.
લોકોએ પાઠ ભણાવી બંને ઠગબાજોને પોલીસ હવાલે કર્યા
કૈલાશ નગરના સ્થાનિકોએ બંને ઈસમોને કાયદાનો પાઠ ભણાવ્યા બાદ બનાવ અંગે તાત્કાલિક સ્થાનિક પોલીસને જાણ કરી હતી. ઘટનાસ્થળે પહોંચેલી ઉધના પોલીસની ટીમને સ્થાનિકોએ બંને આરોપીઓને સોંપી દીધા હતા. પોલીસે બંને ઠગબાજોની અટકાયત કરીને તેમની સામે છેતરપિંડીનો ગુનો નોંધવાની કાનૂની કાર્યવાહી હાથ ધરી છે. આ સાથે જ પોલીસે આ શખ્સોએ અગાઉ વિસ્તારમાં અન્ય કોઈ મહિલાઓ સાથે આ પ્રકારની ઠગાઈ આચરી છે કે કેમ તે અંગે પણ ઊંડાણપૂર્વક તપાસ શરૂ કરી છે.