સુરત શહેરના અત્યંત ધમધમતા અને પોશ વિસ્તાર ગણાતા ઘોડદોડ રોડ પર આવેલા વેસ્ટફિલ્ડ શોપિંગ સેન્ટરમાંથી અચાનક આગ લાગવાની એક દુર્ઘટના સામે આવી છે. શોપિંગ સેન્ટરના ગ્રાઉન્ડ ફ્લોર પર આવેલી એક દુકાનમાં અચાનક આગ ભભૂકી ઉઠી હતી. જોતજોતામાં આગના કાળા ડિબાંગ ધુમાડાના ગોટેગોટા નીકળવા લાગતાં સમગ્ર શોપિંગ કોમ્પ્લેક્સમાં હાજર વેપારીઓ, ગ્રાહકો અને સ્થાનિક લોકોમાં ભારે નાસભાગ અને અફરાતફરી સર્જાઈ ગઈ હતી.
ફાયર બ્રિગેડે ઘટનાસ્થળે પહોંચી આગ પર કાબૂ મેળવ્યો
આગ લાગવાની જાણ થતાં જ સ્થાનીકો દ્વારા તાત્કાલિક સુરત ફાયર બ્રિગેડની ટીમને ઘટના અંગે જાણ કરવામાં આવી હતી. બનાવની ગંભીરતાને ધ્યાનમાં રાખીને ફાયર ફાઈટરોની ટીમ તાત્કાલિક ઘોડદોડ રોડ સ્થિત ઘટનાસ્થળે દોડી આવી હતી. ફાયર વિભાગના જવાનોએ ભારે જહેમત અને સમયસૂચકતા દાખવીને પાણીનો મારો ચલાવી ટૂંક સમયમાં જ આગ પર સંપૂર્ણ કાબૂ મેળવી લીધો હતો, જેના કારણે મોટી હોનારત અને આસપાસની અન્ય દુકાનોમાં આગ ફેલાતાં અટકી ગઈ હતી.
દુકાનનો સામગ્રી બળીને ખાખ, કોઈ જાનહાનિ નહીં
આ આકસ્મિક આગની ઘટનામાં જે દુકાનમાં આગ લાગી હતી તેમાં મુકેલો તમામ કિંમતી સામાન સંપૂર્ણપણે બળીને ખાખ થઈ ગયો છે, જેનાથી દુકાનદારને મોટું આર્થિક નુકસાન પહોંચ્યું છે. સદનસીબે, ફાયર બ્રિગેડની સમયસરની કામગીરીના કારણે કોઈ જાનહાનિ કે કોઈ વ્યક્તિને ઈજા થઈ નથી. આ ઘટના બાદ પોલીસે પણ ઘટનાસ્થળે પહોંચી તપાસ હાથ ધરી છે અને આગ શોર્ટ સર્કિટના કારણે લાગી હતી કે અન્ય કોઈ કારણસર, તે દિશામાં પ્રાથમિક તપાસ શરૂ કરી છે.