સુરત શહેરના ડિંડોલી-ભેસ્તાન રોડ પર મોબાઈલ સ્નેચિંગની એક ચોંકાવનારી ઘટના સામે આવી છે. રસ્તા પરથી પસાર થઈ રહેલા એક રાહદારીના હાથમાંથી મોબાઈલ ફોન છીનવીને ભાગી રહેલા આરોપીને સ્થાનિક લોકોએ હિંમત દાખવીને રંગેહાથ ઝડપી પાડ્યો હતો. આ ઘટના બનતાની સાથે જ આસપાસના લોકો એકઠા થઈ ગયા હતા અને સ્નેચરને ભાગવા દીધો ન હતો.

500 મીટર સુધી પીછો કરીને આરોપી ઝડપાયો

રાહદારીનો મોબાઈલ સ્નેચ કરીને આરોપી ભાગવા લાગતાં જ જાગૃત નાગરિકોએ તેની પાછળ દોડ મૂકી હતી. લોકોએ આશરે 500 મીટર સુધી આરોપીનો પીછો કરીને તેને ઘેરી લીધો હતો અને ઝડપી પાડ્યો હતો. લોકોએ આરોપીના કબજામાંથી ચોરી કરેલો મોબાઈલ ફોન પણ સલામત રીતે કબ્જે કરી લીધો હતો અને તાત્કાલિક ડિંડોલી પોલીસને ઘટના અંગે જાણ કરી હતી.

પોલીસે આરોપીની અટકાયત કરી કાર્યવાહી શરૂ કરી

ઘટના અંગે માહિતી મળતાં જ ડિંડોલી પોલીસનો કાફલો તાત્કાલિક સ્થળ પર દોડી આવ્યો હતો. સ્થાનિક લોકોએ પકડેલા આરોપીને પોલીસના હવાલે કર્યો હતો. ડિંડોલી પોલીસે આરોપીની અટકાયત કરીને તેની વિરુદ્ધ કાનૂની કાર્યવાહી હાથ ધરી છે. આ ઉપરાંત, આ આરોપી ભૂતકાળમાં પણ આવી અન્ય સ્નેચિંગ કે ચોરીની ઘટનાઓમાં સામેલ છે કે કેમ તે દિશામાં પોલીસે તપાસ શરૂ કરી છે.

ગુજરાતના વધુ સમાચાર વાંચવા માટે ક્લિક કરો