સુરતના કતારગામ વિસ્તારમાં રહેતો અને શિવાલિક રેસિડેન્સીમાં નિવાસ કરતો પટેલ પરિવાર ઉત્તરાખંડ ખાતે ચારધામ યાત્રાએ ગયો હતો, જ્યાં ગંગોત્રીથી દર્શન કરીને પરત ફરતી વખતે તેમની ઈનોવા કારને ઉત્તરકાશી પાસે ગંભીર અકસ્માત નડ્યો હતો. કાર અચાનક કાબૂ ગુમાવતાં આશરે 300 ફૂટ ઊંડી ખીણમાં થઈને સીધી ભાગીરથી નદીમાં ખાબકી હતી, જેના કારણે પરિવાર પર આફતનો પહાડ તૂટી પડ્યો છે.

પિતા-પુત્રીનું મૃત્યુ, પુત્ર ઋષિકેશ એઈમ્સમાં સારવાર હેઠળ

આ દર્દનાક દુર્ઘટનામાં સુરતમાં વકીલાત કરતા અશોકભાઈ પટેલ અને તેમની પુત્રી સહિત પરિવારના સભ્યોના મોત નીપજ્યા છે. જ્યારે અશોકભાઈના પુત્રને ગંભીર ઈજાઓ પહોંચતા તેમને ઋષિકેશની એઈમ્સ હોસ્પિટલમાં સારવાર અર્થે ખસેડવામાં આવ્યા છે. યુવકને છાતી અને માથાના ભાગે ગંભીર ઈજાઓ થઈ હોવાનું જાણવા મળ્યું છે. આ ઉપરાંત પરિવારની અન્ય મહિલા સભ્યો લાપતા હોવાની પણ માહિતી સામે આવી છે.

સંબંધીઓ દ્વારા સાંસદ મુકેશ દલાલ સમક્ષ રજૂઆત

પરિવાર પર આવેલા આ વજ્રાઘાત બાદ, સુરતના મૃતક અને ઇજાગ્રસ્ત પરિવારના સંબંધીઓએ તાત્કાલિક સુરતના સાંસદ મુકેશ દલાલનો સંપર્ક કર્યો હતો અને તેમને રૂબરૂ મળીને રાહત તેમજ બચાવ કામગીરી ઝડપથી કરવા માટે ઉગ્ર રજૂઆત કરી હતી. સંબંધીઓએ સાંસદ સમક્ષ લાગણી વ્યક્ત કરી હતી કે, એઈમ્સ હોસ્પિટલમાં સારવાર લઈ રહેલા ઇજાગ્રસ્ત યુવકને છાતી અને માથાના ભાગે ગંભીર ઈજાઓ પહોંચી છે, જેથી તેને એર એમ્બ્યુલન્સ દ્વારા સુરત અથવા ગુજરાતની કોઈ ઉત્તમ હોસ્પિટલમાં ખસેડવામાં આવે જેથી તેને સમયસર યોગ્ય સારવાર મળી શકે.

સાંસદ મુકેશ દલાલની ત્વરિત દોડધામ અને સહાયતા

પરિવારની વેદના સાંભળીને સાંસદ મુકેશ દલાલે ત્વરિત પગલાં ભર્યા હતા. તેમણે ઉત્તરાખંડના ડિઝાસ્ટર મેનેજમેન્ટ તંત્ર સાથે ટેલિફોનિક ચર્ચા કરી સ્થિતિનો તાગ મેળવ્યો હતો. આ ઉપરાંત, ઉત્તરાખંડના સંબંધિત સાંસદને પત્ર લખીને અકસ્માતમાં લાપતા થયેલી બે બહેનો (મહિલા સંબંધીઓ) ને વહેલી તકે શોધી કાઢવા માટે યુદ્ધના ધોરણે સર્ચ ઓપરેશન ચલાવવા રજૂઆત કરી છે. સાંસદે ઋષિકેશ એઈમ્સ હોસ્પિટલના ડોક્ટરો સાથે પણ વાતચીત કરીને ઇજાગ્રસ્ત યુવકના સ્વાસ્થ્ય અંગેની અપડેટ મેળવીને પરિવારને શાંત્વના પાઠવી છે.

મૃતદેહોને હરિદ્વાર સિવિલ હોસ્પિટલમાં રખાયા

પ્રાપ્ત માહિતી અનુસાર, અકસ્માતમાં મૃત્યુ પામેલા બાપ-દીકરી અને અન્ય એક સંબંધીના મૃતદેહને હાલ હરિદ્વારની સિવિલ હોસ્પિટલ ખાતે રાખવામાં આવ્યા છે. લાપતા બનેલા સુધાબેન અને અન્ય મહિલા સંબંધીઓની ભાળ મળ્યા બાદ અને કાગળની કાર્યવાહી પૂર્ણ થયા પછી જ તમામ મૃતદેહોને સુરત લાવવામાં આવશે, જેને લઈને પરિવાર અને સંબંધીઓમાં ભારે આતુરતા અને ગમગીની જોવા મળી રહી છે.

આ પણ વાંચો: Suratમાં મહિલા તબીબના રહસ્યમય મોતથી ચકચાર, લગ્નજીવનના વિવાદ વચ્ચે 25 વર્ષીય BHMS ડૉક્ટરનું કરુણ અવસાન