સુરત શહેરના પાંડેસરા વિસ્તારમાં એક અત્યંત દર્દનાક અને કાળજુ કંપાવી દેનારો અકસ્માત સર્જાયો છે. પાંડેસરા સ્થિત દક્ષેશ્વર મંદિર પાસેથી પસાર થઈ રહેલા 18 વર્ષીય આલોક કુમાર નામના યુવકને એક ખાનગી સ્કૂલ બસે ભયાનક અડફેટે લીધો હતો. સ્કૂલ બસની ટક્કર એટલી જોરદાર હતી કે આલોક કુમાર રસ્તા પર ફેંકાઈ ગયો હતો અને ગંભીર ઈજાઓ પહોંચવાના કારણે ઘટનાસ્થળે જ તેનું કરૂણ મોત નિપજ્યું હતું.

18 વર્ષીય યુવકનું ઘટનાસ્થળે જ કરૂણ મોત

આ સમગ્ર ઘટનાના કાળજા કંપાવી દે તેવા CCTV ફૂટેજ પણ સામે આવ્યા છે. સીસીટીવીમાં સ્પષ્ટપણે જોઈ શકાય છે કે કઈ રીતે પુરપાટ ઝડપે આવી રહેલી સ્કૂલ બસે યુવકને અડફેટે લીધો હતો. અકસ્માત સર્જાયા બાદ સ્થાનિક લોકોના ટોળાં ઘટનાસ્થળે એકઠા થઈ ગયા હતા. બનાવ અંગે જાણ થતાં જ પાંડેસરા પોલીસ મથકની ટીમ તાત્કાલિક સ્થળ પર પહોંચી ગઈ હતી. પોલીસે યુવકના મૃતદેહનો કબજો મેળવીને પોસ્ટમોર્ટમ અર્થે સુરત સિવિલ હોસ્પિટલ ખાતે ખસેડવાની કામગીરી હાથ ધરી હતી.

આશાસ્પદ પુત્રના મોતથી પરિવારમાં અરેરાટી

માત્ર 18 વર્ષની નાની વયે આશાસ્પદ પુત્ર આલોક કુમારનું અકસ્માતમાં કરૂણ મોત થતાં તેના પરિવારજનો પર દુઃખનો પહાડ તૂટી પડ્યો છે. પરિવારજનોએ સિવિલ હોસ્પિટલ ખાતે પહોંચીને ભારે આક્રંદ કર્યું હતું. આ બનાવ અંગે પોલીસે સ્કૂલ બસના ચાલક સામે ગુનો નોંધી આગળની કાયદેસરની તપાસ હાથ ધરી છે, તો બીજી તરફ પીડિત પરિવારે બેદરકાર બસ ચાલક સામે સખતમાં સખત કાર્યવાહી થાય અને તેમને યોગ્ય ન્યાય મળે તેવી આક્રોશભરી માંગ કરી છે.

ગુજરાતના વધુ સમાચાર વાંચવા માટે ક્લિક કરો