સુરત શહેરમાં અસામાજિક તત્વોનો ત્રાસ અને ગુનાખોરીનો ગ્રાફ સતત વધી રહ્યો છે, ત્યારે વેસુ વિસ્તારમાં મોડી રાત્રે હત્યાની એક સનસનાટીભરી ઘટના સામે આવી છે. વેસુ ફાયર સ્ટેશન નજીક બનેલા આ બનાવને પગલે સમગ્ર વિસ્તારમાં ભય અને સન્નાટો વ્યાપી ગયો હતો. અંગત રકઝક કે જૂની અંજપોઝના કારણે ખેલાયેલા આ લોહિયાળ ખેલમાં એક યુવકે જીવ ગુમાવ્યો છે.
35 વર્ષીય મુકુલ ઠાકુરની હત્યા, એક ઈજાગ્રસ્ત
વેસુ ફાયર સ્ટેશન પાસે મોડી રાત્રે તીક્ષ્ણ હથિયારો વડે હુમલો કરવામાં આવ્યો હતો. આ હુમલામાં 35 વર્ષીય મુકુલ બાદશાહ ઠાકુર નામના યુવકનું ઘટનાસ્થળે જ ગંભીર ઈજાઓના કારણે કરુણ મોત નિપજ્યું હતું. આ ઘટના દરમિયાન જીતેન્દ્ર લાલ સહાની નામનો અન્ય એક યુવક પણ ગંભીર રીતે ઈજાગ્રસ્ત થયો હતો. હુમલા બાદ લોહીલુહાણ હાલતમાં ઈજાગ્રસ્ત યુવકને તાત્કાલિક સારવાર અર્થે નવી સિવિલ હોસ્પિટલ ખસેડવામાં આવ્યો છે, જ્યાં તેની હાલ સારવાર ચાલી રહી છે.
જીતેન્દ્ર નામના શખ્સ સામે શંકા: વેસુ પોલીસની તપાસ શરૂ
આ હત્યા પાછળ જીતેન્દ્ર નામના શખ્સનો હાથ હોવાની પ્રબળ શંકા સેવાઈ રહી છે. બનાવની જાણ થતાં જ વેસુ પોલીસ મથકનો કાફલો ઘટનાસ્થળે દોડી ગયો હતો અને મૃતદેહને પોસ્ટમોર્ટમ અર્થે ખસેડીને કાનૂની પ્રક્રિયા હાથ ધરી હતી. વેસુ પોલીસે આ સમગ્ર મામલે હત્યાનો ગુનો નોંધીને આરોપીને ઝડપી પાડવા ચક્ર ગતિમાન કર્યા છે અને ઈજાગ્રસ્તના નિવેદન આધારે વધુ તપાસ ચલાવી રહી છે.