વાણિજ્ય અને ડાયમંડ નગરી ગણાતા સુરત શહેરમાંથી સાયબર ક્રાઈમને લગતી એક અત્યંત ચોંકાવનારી અને ચિંતાજનક ઘટના સામે આવી છે. સુરત શહેરમાં સાયબર માફિયાઓ અને ઠગો એટલા બેફામ બન્યા છે કે માત્ર એક જ દિવસમાં અલગ-અલગ 11 નિર્દોષ નાગરિકોને પોતાનો શિકાર બનાવીને તેમની સાથે મોટી ઠગાઈ આચરવામાં આવી છે. સાયબર ઠગોએ જુદી-જુદી યુક્તિઓ અપનાવીને આ 11 લોકો પાસેથી 24 લાખ રૂપિયાથી વધુની રકમ ખંખેરી લીધી છે, જેના કારણે સમગ્ર શહેરમાં ખળભળાટ મચી ગયો છે.

મોબાઇલ અપડેટ, ક્રેડિટ કાર્ડના નામે ઠગાઈ

સાયબર ઠગોએ નાગરિકોને ફસાવવા માટે અવનવા કીમિયા અપનાવ્યા હતા. આ બનાવમાં અલગ-અલગ 11 લોકોને અલગ અલગ બહાના હેઠળ નિશાન બનાવવામાં આવ્યા છે, 1. મોબાઈલ અપડેટ અને નકલી એપ્લિકેશન્સ: મોબાઈલ ફોન અપડેટ કરવા અથવા પ્લે સ્ટોર પરથી નકલી અને શંકાસ્પદ એપ્સ ડાઉનલોડ કરાવીને ફોનનો એક્સેસ મેળવી લીધો હતો. 2. ક્રેડિટ કાર્ડ અને રોકાણના પ્રલોભનો: ક્રેડિટ કાર્ડના રિવાર્ડ પોઈન્ટ્સ રીડીમ કરવા અથવા ઊંચા વળતરની લાલચ આપીને ઓનલાઈન રોકાણ કરાવવાના નામે છેતરપિંડી આચરાઈ હતી. 3. ટેલિગ્રામ ટાસ્કનું બહાનું: સોશિયલ મીડિયા પર ઘરે બેઠા રૂપિયા કમાવવાની લાલચ આપીને ટેલિગ્રામ પર અલગ-અલગ ટાસ્ક પૂર્ણ કરવાના બહાને લાખો રૂપિયા પડાવવામાં આવ્યા હતા.

સુરત સાયબર ક્રાઈમ સેલ પોલીસ સ્ટેશનમાં ગુનો દાખલ

એ જ દિવસમાં એકસાથે 11 જેટલા લોકો સાથે આ પ્રકારે લાખો રૂપિયાની ઠગાઈ થવાની ઘટના સામે આવતા સુરત પોલીસ બેડામાં દોડધામ મચી ગઈ છે. ભોગ બનનાર નાગરિકો દ્વારા તાત્કાલિક સમગ્ર મામલે સુરત સાયબર ક્રાઈમ સેલ પોલીસ સ્ટેશન ખાતે સત્તાવાર રીતે ફરિયાદો નોંધાવવામાં આવી છે. પોલીસ દ્વારા આ તમામ ટ્રાન્ઝેક્શન, બેંક એકાઉન્ટ્સ અને મોબાઈલ નંબરોના આધારે સાયબર માફિયાઓને પકડી પાડવા માટે સઘન તપાસના ચક્રો ગતિમાન કરવામાં આવ્યા છે. પોલીસ દ્વારા નાગરિકોને પણ સાયબર ફ્રોડથી સાવચેત રહેવા અપીલ કરવામાં આવી છે.

ગુજરાતના વધુ સમાચાર વાંચવા માટે ક્લિક કરો