સુરત શહેરમાંથી શ્રમિક પરિવારો અને વાલીઓ માટે અત્યંત હ્રદયદ્રાવક અને આંખ ઉઘાડતી ઘટના સામે આવી છે. સુરતના ભેસ્તાન આવાસ પાસે આવેલી સાઈ પવિત્ર રેસિડેન્સી ખાતે કન્સ્ટ્રક્શનની એક સાઈટ ચાલી રહી હતી. આ સાઈટ પર મૂળ મધ્યપ્રદેશના વતની એવા શ્રમિક દંપતી કડિયા કામ કરી રહ્યા હતા. તેમની બે વર્ષીય માસૂમ પુત્રી રક્ષા પવાર સાઈટ પર જ રમતી હતી. દરમિયાન, રમતા-રમતા માસૂમ બાળકી અચાનક બીજા માળની ખુલ્લી જગ્યા પર પહોંચી ગઈ હતી અને અચાનક પગ લપસી જવાના કારણે બીજા માળેથી નીચે પટકાઈ હતી.

સિવિલ હોસ્પિટલમાં ટૂંકી સારવાર બાદ કરુણ મોત

બાળકી થોડીવાર દેખાઈ નહીં ત્યારે તેના પિતાએ તેની આસપાસ ભારે શોધખોળ શરૂ કરી હતી. પિતાએ જ્યારે નીચે નજર કરી ત્યારે બાળકી ગંભીર ઇજાગ્રસ્ત હાલતમાં નીચે પટકાયેલી જોવા મળી હતી, જેનાથી માતા-પિતાના પગ નીચેથી જમીન સરકી ગઈ હતી. તાત્કાલિક ધોરણે લોહીથી લથપથ માસૂમ બાળકીને સારવાર અર્થે સુરતની સરકારી સિવિલ હોસ્પિટલ ખાતે ખસેડવામાં આવી હતી. જોકે, હોસ્પિટલમાં ટૂંકી સારવાર દરમિયાન જ માસૂમ રક્ષાએ પોતાના પ્રાણ છોડી દીધા હતા અને તબીબોએ તેને મૃત જાહેર કરી હતી.

પરિવાર પર આભ ફાટી પડ્યું

આ દુર્ઘટનાનો ભોગ બનેલો પરિવાર મૂળ મધ્યપ્રદેશનો રહેવાસી હતો અને પેટિયું રળવા માટે માત્ર દસ દિવસ અગાઉ જ સુરત કામ અર્થે આવ્યા હતા. પરિવારમાં માત્ર માતા-પિતા અને આ એકમાત્ર લાડકી દીકરી રક્ષા જ હતી. આકસ્મિક રીતે બનેલી આ ઘટનાએ પરિવારના સપનાઓ રોળ નાખ્યા છે અને માતા-પિતા પર જાણે આભ ફાટી પડ્યું હોય તેવી કરુણ સ્થિતિ સર્જાઈ છે. માસૂમ દીકરીના અકાળે અવસાનથી સમગ્ર શ્રમિક પરિવાર અને આસપાસના લોકો શોકમાં ડૂબી ગયા છે, જે કન્સ્ટ્રક્શન સાઈટો પર કામ કરતા શ્રમિકોના બાળકોની સલામતી સામે પણ મોટો સવાલ ઊભો કરે છે.

આ પણ વાંચો : Bagdana ધામમાં ગરમાયું રાજકારણ! કોળી સમાજ સાથે અન્યાયના મુદ્દે મહિલાઓનો વિરોધ અને ગંભીર આક્ષેપોથી ચકચાર