સુરત શહેરના ડુમ્મસ અને ભીમપોર વિસ્તારના માછીમારોએ પોતાની પડતર અને ગંભીર સમસ્યાઓને લઈને સુરત કલેક્ટર કચેરી ખાતે ભવ્ય મોરચો યોજ્યો હતો. દરિયામાં માછીમારી દરમિયાન થતા ભારે આર્થિક નુકસાન અને સ્થાનિક દરિયાખેડુઓની રોજીરોટી પર ઊભા થયેલા સંકટ અંગે જિલ્લા કલેક્ટરને આવેદનપત્ર આપીને તાત્કાલિક યોગ્ય ન્યાય અને ઉકેલ લાવવા માટે માછીમારો દ્વારા ઉગ્ર રજૂઆત કરવામાં આવી હતી.

જાફરાબાદના માછીમારોની ‘બોક્સ ફિશિંગ’ બની મુસીબત

માછીમારોએ સત્તાવાળાઓ સમક્ષ આક્ષેપ કર્યો હતો કે જાફરાબાદ વિસ્તારના માછીમારો સુરતના ડુમ્મસ અને ભીમપોરના દરિયાઈ કક્ષામાં આવીને આક્રમક રીતે માછીમારી કરી રહ્યા છે. જાફરાબાદના માછીમારો ‘બોક્સ ફિશિંગ’ પદ્ધતિનો ઉપયોગ કરે છે, જેમાં ખૂબ જ મોટી અને ભારે જાળનો ઉપયોગ થાય છે. તેની સામે સ્થાનિક ડુમ્મસ અને ભીમપોરના માછીમારો પરંપરાગત ‘તરતી જાળ’ (ફ્લોટિંગ નેટ) વડે માછીમારી કરે છે, જે કદમાં ખૂબ જ નાની હોય છે.

જાળીઓ ફસાઈ જતાં સાધનો તૂટી જાય છે, તંત્ર પાસે કડક કાર્યવાહીની માગ

જાફરાબાદના માછીમારોની રાક્ષસી કદની બોક્સ જાળીઓને કારણે સુરતના માછીમારોની નાની અને તરતી જાળીઓ તેમાં ફસાઈને તૂટી જાય છે અથવા સંપૂર્ણપણે નષ્ટ થઈ જાય છે. આ ગંભીર ઘર્ષણના કારણે ડુમ્મસ અને ભીમપોરના સ્થાનિક માછીમારોને દર વર્ષે લાખો અને કરોડો રૂપિયાનું આર્થિક ફટકો વેઠવાનો વારો આવે છે. સ્થાનિક માછીમારોના હિત અને આજીવિકાનું રક્ષણ કરવા માટે જાફરાબાદના માછીમારોના અનધિકૃત પ્રવેશો અને બોક્સ ફિશિંગ પર સખત નિયંત્રણ લાવવા કલેક્ટર તંત્ર પાસે કડક કાનૂની પગલાં ભરવાની માગણી કરાઈ છે.

આ પણ વાંચો : Bhavnagar News : મફતનગરના મકાનમાં ચાલતું હતું ડ્રગ્સનું નેટવર્ક, એન્ટી નાર્કોટિક્સ ટીમે ઝડપ્યા 12 છોડ